Read Hmong Daw Yaxayas 50 Bible Online

Yaxayas 50 - Hmong Daw bible

Yaxayas 50

¹Tus TSWV hais tias, “Koj xav hais tias kuv tso kuv haivneeg tseg ib yam li tus txivneej uas muab nws tus pojniam nrauj lawm no los? Daim ntawv nrauj nyob qhov twg? Koj xav hais tias kuv muab koj muag rau luag coj mus rau txim ib yam li tus txivneej uas muab nws cov menyuam muag mus ua qhev no los? Tsis yog li ntawd, koj raug muag vim koj tej kev txhaum; koj raug xa mus povtseg vim koj niam tau ua txhaum xwb.

²“Vim li cas, thaum kuv los tsis muaj ib tug neeg nyob ntawd? Vim li cas, thaum kuv hu tsis muaj ib tug neeg teb li? Kuv txhais npab luv heev pab tsis tau koj los? Lossis yog kuv tsis muaj hwjchim tso koj dim? Kuv muaj peevxwm hais kom dej hiavtxwv nqhuab, thiab muab tej hav dej hloov ua suabpuam tej ntses yuav tuag tsw lwj ntxiag.

³Kuv muab kev tsaus ntuj los thaiv lub ntuj thiab muab ntaubtsaj los qhwv lub ntuj.”

⁴Tus TSWV uas yog Vajtswv pub tswvyim rau kuv, yog li ntawd, kuv thiaj txhawb tau cov neeg uas qaug zog. Txhua tagkis nws pub kuv muaj lub siab kub lug mloog tej lus uas nws qhia rau kuv.

⁵Tus TSWV uas yog Vajtswv ua rau kuv txawj totaub, kuv tsis tau ntxeev siab lossis khiav tawm ntawm nws.

⁶Kuv tig nraubqaum rau cov neeg uas nplawm kuv. Kuv tsis tau cheem cov neeg uas thuam kuv, kuv tig xubntiag rau lawv thaum lawv rho kuv cov hwjtxwv, thiab nto qaubncaug rau kuv lub ntsejmuag.

⁷Tiamsis tej lus uas lawv thuam tsis mob kuv li, rau qhov tus TSWV uas yog Vajtswv pab kuv lawm. Kuv ua siab ntev rau lawv. Kuv paub hais tias, kuv yeej tsis raug kev txajmuag ib zaug li,

⁸rau qhov Vajtswv nyob ze kuv, thiab nws paub hais tias kuv yog neeg tsis muaj txim. Leejtwg xav ua plaub rau kuv? Wb cia li ua ke mus rau hauv tsev tu plaub! Leejtwg xav ua yeebncuab rau kuv? Nws sim txav los ze kuv saib!

⁹Tus TSWV uas yog Vajtswv yeej pab kuv; leejtwg thiaj yuav hais tau tias kuv ua txhaum? Lawv yuav ploj tas ib yam li tej ris tsho uas ntsaum kabrwg noj lawm.

¹⁰Nej cov ntawm ko puas muaj leejtwg hwm Vajtswv thiab mloog tej lus uas nws tus tubtxib qhia? Txawm yog nws taug txojkev uas tsaus ntuj nti los nws cia siab rau tus TSWV lub npe thiab tso siab plhuav rau nws tus Vajtswv.

¹¹Nej txhua tus uas tuav tswvyim txov lwm tus, nej tej tswvyim ntawd yuav rov los txov nej. Tus TSWV yuav ua kom tej ntawd los raug nej ntag. Nej yuav raug kev tsimtxom thiab txomnyem kawg li.