Read Hmong Daw Yaxayas 51 Bible Online

Yaxayas 51 - Hmong Daw bible

Yaxayas 51

¹Tus TSWV hais tias, “Nej cov uas nrhiav txojkev ncaj ncees thiab xav nrhiav tus TSWV, nej cia li mloog kuv hais. Cia li saib lub pobzeb uas nej muab txaug thiab qhov chaw uas nej khawb pobzeb.

²Cia li saib nej yawgkoob Anplahas, thiab nej pogkoob Xalas, tus uas yug nej cov uas ua xeebntxwv; thaum kuv hu Anplahas, nws tsis muaj ib tug menyuam li, tiamsis kuv foom koob hmoov rau nws thiab pub rau nws muaj menyuam; kuv pub rau nws muaj xeebntxwv coob suav tsis txheeb li.

³“Tus TSWV yuav nplig cov neeg hauv lub nroog Yeluxalees, thiab cov neeg nyob hauv lub nroog uas raug puastsuaj tas lawm siab, thiab yuav muab lub nroog Yeluxalees tej nras mojsab ua kom zoo li lub Vaj Edees. Yeluxalees tej tiaj suabpuam yuav zoo li tus TSWV lub vaj; yuav muaj kev zoo siab thiab kev kaj siab nyob hauv Yeluxalees, yuav muaj lub suab hu nkauj qhuas kuv thiab ua kuv tsaug.

⁴“Kuv haivneeg, nej cia li mloog kuv hais, thiab nej cia li tig pobntseg mloog kuv tej lus; kuv txoj kevcai thiab txojkev ncaj ncees yuav ua lub teeb ci rau txhua haivneeg pom kev.

⁵Kuv yuav los cawm lawv sai sai ntag; kuv txojkev cawm dim twb los lawm, thiab kuv txhais npab yuav kav txhua haivneeg. Cov tebchaws uas nyob deb tos nrhw kuv, thiab cia siab ntsoov rau kuv txhais npab uas yuav cawm lawv dim.

⁶Nej cia li tsa qhovmuag saib saum nruab ntug, thiab saib rau hauv ntiajteb, vim lub ntuj yuav yaj ntshis ib yam li tej pa taws; lub ntiajteb yuav ntuag tas ib yam li tej qub ris tsho, thiab tej neeg uas nyob hauv ntiajteb yuav tuag tas ib yam li tej yoov. Tiamsis kuv txojkev cawm dim yuav nyob mus ibtxhis, thiab kuv txojkev ncaj ncees yuav nyob mus tsis paub kawg li.

⁷“Nej cov uas paub txojkev ncaj ncees, nej cia li mloog kuv hais; cov neeg uas khaws kuv txoj kevcai rau nruab siab, nej tsis txhob ntshai thaum neeg thuam thiab saib tsis taus nej;

⁸vim ntsaum kabrwg yuav noj lawv ib yam li noj tej qub ris tsho, thiab kas yuav noj lawv ib yam li noj tej tawv yaj; tiamsis kuv txojkev ncaj ncees yuav nyob mus ibtxhis, thiab kuv txojkev cawm dim yuav muaj rau txhua tiam neeg.”

⁹Tus TSWV, sawv los pab peb lauj! Siv koj lub hwjchim cawm peb ib yam li koj tau ua los lawm. Tsis yog koj twb muab Lahaj txiav ua tej thooj, thiab muab tus zaj hauv hiavtxwv tsuav tu tas lawm los?

¹⁰Twb yog koj ua rau dej hiavtxwv nqhuab, thiab ua kev qhuav qhawv hauv dej mus rau sab tim ub, kom cov neeg uas koj twb cawm dim lawm mus dhau dej rau sab tid.

¹¹Cov neeg uas koj twb cawm dim lawm, yuav rov qab los thiab hu nkauj zoo siab hauv lub nroog Yeluxalees, lawv yuav muaj kev zoo siab thiab kaj siab lug mus ibtxhis; kev txomnyem quaj ntsuag thiab kev tu siab yuav tsis raug lawv lawm.

¹²Tus TSWV hais tias, “Kuv yog tus txhawb nej lub zog, vim li cas nej yuav ntshai cov neeg uas txawj tuag uas twb tsis muaj sia nyob ntev npaum li tej nyom?

¹³Nej tsis nco qab tus TSWV uas tsim nej, tus uas nthuav lub ntuj thiab pua lub ntiajteb lawm los? Vim li cas nej ua neej nyob ntshai rwg cov neeg uas tsimtxom nej thiab xav kom nej puastsuaj? Lawv tej kev nruj tsiv yeej ua tsis tau li cas rau nej.

¹⁴Tshuav tsis ntev, kuv yuav tso cov neeg raug txim dim los; lawv yuav tsis tuag thiab tsis tau mus rau hauv lub qhov ntxa, thiab lawv yuav tsis tu ncua zaub mov noj li lawm.

¹⁵“Kuv uas yog tus TSWV tus uas yog nej tus Vajtswv, kuv yog tus do hiavtxwv kom ntas nphau tej niag nthwv thiab nrov nroo ntws. Kuv lub npe hu ua tus TSWV tus uas muaj hwjchim loj kawg nkaus!

¹⁶Kuv muab kuv tej lus qhia cob rau nej thiab kuv txhais tes tiv thaiv nej, kuv nthuav lub ntuj thiab pua lub ntiajteb, kuv hais rau cov neeg hauv lub nroog Yeluxalees hais tias, ‘Nej yog kuv haivneeg.’ ”

¹⁷Yeluxalees, sawv los mas! Koj cia li sawv tsees los! Koj twb haus tus TSWV lub khob uas yog txojkev txiav txim lawm, lub khob ntawd yog nws txojkev chim uas ua rau koj ntog pujpoog.

¹⁸Cov menyuam uas koj yug tsis muaj ib tug coj koj kev, cov menyuam uas koj tu hlob tsis muaj ib tug los tuav koj tes.

¹⁹Yuav muaj ob yam kev puastsuaj los raug nej; nej lub tebchaws yuav muaj kev tsov kev rog kom piamsij tas, nej haivneeg yuav tuag tas rau kev tshaib kev nqhis thiab hniav ntaj hniav riam. Yuav tsis muaj leejtwg tuaj nplig nej siab.

²⁰Nej cov menyuam yuav tsaug muag; lawv pw pawglug ntawm tej kev, lawv zoo ib yam li tus muaslwj uas mag tus neeg tua nqaij lub vas. Lawv raug nej tus Vajtswv tej lus chim thiab nws tej lus cem.

²¹Nej cov uas raug kev txomnyem hauv lub nroog Yeluxalees, nej ntog pujpoog li qaug cawv, tiamsis tsis yog haus cawv;

²²tus TSWV uas yog nej tus Vajtswv, tus uas tuaj nws haivneeg tog hais tias, “Nej saib, kuv muab lub khob uas yog kuv txojkev chim tshem tawm ntawm nej mus lawm; lub tais uas yog kuv txojkev chim nej tsis tau haus ntxiv lawm.

²³Kuv yuav muab lub khob ntawd rau tus neeg uas tsimtxom nej uas hais rau nej tias, ‘Nej cia li pw hauv av ua kev rau peb tsuj; thiab muab nej lub nraubqaum ua kev rau peb taug.’ ”