Read Hmong Daw Yaxayas 52 Bible Online

Yaxayas 52 - Hmong Daw bible

Yaxayas 52

¹Yeluxalees, sawv los mas, cia li sawv; cuab koj lub zog khov kho! Vajtswv lub nroog uas Dawbhuv, cia li hnav tej ris tsho uas zoo tshaj plaws! Cov neeg uas tsis ua kevcai txiav thiab cov neeg tsis huv yuav tsis tuaj rau hauv koj ntxiv lawm.

²Yeluxalees, nchos koj tej hmoov av! Sawv mus zaum saum lub zwmtxwv. Xi-oos tus ntxhais, daws txoj saw hlau uas khi koj cajdab kom plam!

³Tus TSWV uas kav ib puas tsav yam hais rau nws haivneeg hais tias, “Thaum nej mus ua luag qhev, luag twb tsis muab nyiaj yuav nej; ib yam li ntawd, tsis tas yuav muab nyiaj txhiv nej rov qab los li thiab.”

⁴Vim tus TSWV uas yog Vajtswv hais tias: Thawj zaug uas kuv haivneeg mus nyob nram tebchaws Iziv, tsis muaj leejtwg yuam kom lawv mus; tiamsis tom qab ntawd cov Axilias tau tuaj yuam lawv mus thiab tsis them ib yam dabtsi li.

⁵Tus TSWV hais tias, “Nimno tej xwm uas zoo li no twb muaj nyob hauv lub nroog Npanpiloos lawm thiab. Lawv ntes nej mus ua qhev, lawv twb tsis them nqi yuav nej. Cov neeg uas kav nej, lawv muab hlob, khavtheeb thiab saib tsis taus kuv li.

⁶Muaj ib hnub twg nej yuav lees paub hais tias, kuv yog Vajtswv, thiab thaum ntawd nej yuav paub hais tias, kuv twb hais tej lus no rau nej lawm.”

⁷Thaum nej pom tus neeg hla toj roob hauv pes xa xov zoo tuaj, mas nej zoo siab kawg li, nws tuaj qhia txojkev thajyeeb uas yog txojmoo zoo! Nws tshaj tawm txojkev cawm dim, nws hais rau cov neeg hauv lub nroog Yeluxalees hais tias, “Nej tus Vajtswv yog vajntxwv!”

⁸Cov neeg uas zov lub nroog qw zom zaws zoo siab heev. Vim lawv qhovmuag pom ntsoov tus TSWV rov los rau hauv lub nroog Yeluxalees lawm.

⁹Lub nroog Yeluxalees uas tawg tas lawm, cia li hu nkauj zoo siab luag ntxhi! Tus TSWV yuav cawm nws lub nroog Yeluxalees thiab nplig nws haivneeg siab.

¹⁰Ib tsoom neeg thoob ntiajteb yuav pom tus Tswv siv nws lub hwjchim uas loj kawg nkaus cawm nws haivneeg.

¹¹Cia li tawm hauv lub nroog Npanpiloos no mus kom tas! Tsis txhob kov tej uas tsis huv hlo li; nej cov uas nqa tus TSWV tej cuabyeej siv hauv lub Tuamtsev, cia li tawm hauv lub nroog mus thiab ua kevcai ntxuav kom nej huv.

¹²Zaum no tsis tas nej yuav maj tawm, rau qhov tsis yog nej nyiag kev khiav, tus TSWV uas yog nej tus Vajtswv yuav coj nej txoj haukev, thiab cov Yixalayees tus Vajtswv yuav thaiv tom nej qab.

¹³Tus TSWV hais tias, “Kuv tus tubtxib yuav ua nws tes haujlwm kom tiav; nws yuav tau ntsejmuag thiab sawvdaws yuav txhawb nqa nws, yuav tsa nws ua tus loj tshaj plaws.

¹⁴Thaum lawv pom dheev nws, muaj coob leej ntshai thiab yoob tas; nws lub ntsejmuag thiab nws lub cev txawv, zoo tsis thooj li neeg lub.

¹⁵Nimno nws yuav ua rau ntau haivneeg xav tsis thoob, thiab tej vajntxwv yuav yoob tas hais tsis taus ib lo lus li. Tej uas lawv tsis tau paub thiab tsis tau pom dua, lawv yuav pom thiab totaub.”