Read Hmong Daw Yaxayas 60 Bible Online

Yaxayas 60 - Hmong Daw bible

Yaxayas 60

¹Lub nroog Yeluxalees, cia li sawv, vim qhov kaj twb los rau koj, thiab tus TSWV lub tshwjchim ci ntsa iab los rau saum koj lawm.

²Kev tsaus ntuj roos tagnrho lub ntiajteb, thiab kev tsaus ntuj dub nciab npog txhua haivneeg, tiamsis tus TSWV yuav ua qhov kaj los rau koj pom kev, thiab luag yuav pom nws lub tshwjchim uas ci ntsa iab saum koj.

³Txhua haivneeg yuav los rau hauv koj txojkev kaj, thiab tej vajntxwv yuav los rau hauv tus duab tshav ntuj uas nyuam qhuav tawm hnub tshiab.

⁴Cia li tsa qhovmuag saib ibncig koj thiab ntsia tej uas tabtom tshwmsim los: Koj haivneeg tabtom sib sau ua ke yuav rov los tsev! Koj cov tub yuav taug kev deb rov los. Luag yuav puag koj cov ntxhais ib yam li puag menyuam los.

⁵Thaum koj pom tej no koj yuav zoo siab kawg li. Koj lub siab yuav tshee hnyo thiab zoo siab kawg nkaus. Lawv yuav nqa lwm haivneeg tej nyiaj los rau koj; tej nyiaj thiab txhua yam yuav hla hiavtxwv los cuag koj.

⁶Yuav muaj ntau pab ntxhuav los tim tebchaws Midias thiab lub nroog Efas los nyob puv nkaus hauv koj lub tebchaws. Cov ntxhuav ntawd yuav thauj kub thiab tshuaj tsw qab hauv tebchaws Senpas tuaj rau koj. Neeg yuav piav txog txoj xov zoo uas tus TSWV tau ua lawm rau sawvdaws mloog.

⁷Luag yuav coj cov neeg Kedas thiab cov neeg Nenpayaus tej yaj tuaj rau koj tua ua khoom fij thiab muab hlawv rau saum lub thaj kom haum tus TSWV siab. Tus TSWV yuav ua kom nws lub Tuamtsev muaj koob meej dua qub.

⁸Cov nkoj uas txawj ya ib yam li tej huab thiab txawj ya ib yam li tej nquab uas ya los rau hauv zes ntawd yog cov twg?

⁹Cov nkoj ntawd tuaj ntawm tej tebchaws uas nyob deb tuaj, yog xa Vajtswv haivneeg los tsev. Lawv thauj nyiaj thiab kub los pub rau tus TSWV tus uas yog cov Yixalayees tus Vajtswv uas dawbhuv kom tau koob meej, Vajtswv ua kom ib tsoom tebchaws hwm nws haivneeg.

¹⁰Tus TSWV hais rau lub nroog Yeluxalees hais tias, “Cov neeg txawv tebchaws yuav puab koj tej ntsa yeej, thiab lawv cov vajntxwv yuav ua koj cov tubtxib; vim kuv chim, kuv thiaj rau txim rau koj, tiamsis vim kuv hmov tshua koj, kuv thiaj hlub koj.

¹¹Koj tej roojvag yuav qhib tas hnub tas hmo, kom txhua haivneeg tej vajntxwv thiaj tau kev coj lawv tej nyiaj tuaj rau koj.

¹²Haivneeg twg lossis lub tebchaws twg uas tsis kam ua koj tubtxib yuav raug kev puastsuaj; lawv tej tebchaws yuav raug muab tso tseg nyob qhuav nquas cia.

¹³“Lenpanoos lub koob meej yuav los rau koj, nws tej ntoo thuv, ntoo npeb thiab ntoo ciab yuav raug txiav los txhim kho kuv lub tuamtsev kom zoo nkauj, kuv yuav ua kom lub nroog Yeluxalees ci ntsa iab.

¹⁴Cov neeg uas tsimtxom koj, lawv tej tub yuav tuaj pe koj, thiab cov neeg uas saib tsis taus koj yuav tuaj txhos caug ntawm koj xubntiag pe koj. Lawv yuav hu koj hais tias, ‘Tus TSWV lub Nroog’ thiab hu hais tias, ‘Xi-oos yog cov Yixalayees tus Vajtswv uas Dawbhuv lub Nroog.’

¹⁵“Luag yuav tsis ntxub koj lossis tso koj tseg ua lub nroog uas nyob lwj siab thiab qhuav nquas cia ib zaug li lawm. Kuv yuav ua kom koj vammeej thiab zoo nkauj, koj yuav yog qhov chaw uas neeg nyob kaj siab lug mus ibtxhis.

¹⁶Txhua haivneeg thiab tej vajntxwv yuav yug koj ib yam li leej niam pub mis rau nws tus menyuam. Koj yuav paub hais tias kuv yog tus TSWV tus uas cawm koj dim, thiab kuv yog cov Yixalayees tus Vajtswv tus uas muaj hwjchim loj kawg nkaus pab koj dim.

¹⁷“Kuv yuav muab kub los hloov tooj liab, muab nyiaj thiab tooj liab los hloov hlau thiab ntoo, thiab yuav muab hlau los hloov pobzeb rau koj; Koj tej nomtswv yuav tsis quab yuam koj ntxiv lawm. Kuv yuav kom lawv kav ncaj ncees thiab kom muaj kev thajyeeb.

¹⁸Neeg yuav tsis hnov tej suab sib ntaus sib tua nyob hauv koj lub tebchaws; koj lub tebchaws yuav tsis raug kev puastsuaj ntxiv lawm. Tiamsis kuv yuav tiv thaiv koj ib yam li tus ntsa yeej, koj yuav qhuas kuv rau qhov kuv twb pab koj dim lawm.

¹⁹“Nruab hnub lub hnub yuav tsis ci rau koj, lossis hmo ntuj lub hli yuav tsis ci rau koj lawm thiab; Tiamsis kuv uas yog koj tus TSWV yuav ci kaj nrig rau koj mus ibtxhis, kuv lub tshwjchim yuav ci ntsa iab rau saum koj.

²⁰Koj lub hnub yuav tsis poob qho, thiab koj lub hli yuav tsis tsaus ntxiv lawm. Vim tus TSWV yuav ua lub teeb ci rau koj pom kev mus ibtxhis, thiab koj tej kev nyuaj siab twb yuav xaus.

²¹Koj haivneeg yuav ua ncaj; lawv yuav tau lub tebchaws los ua lawv tug mus ibtxhis. Kuv tsim lawv, kuv cog lawv, kom lawv qhia kuv lub hwjchim rau sawvdaws.

²²Tsevneeg uas tsawg yuav dhau mus ua ib xeem, thiab xeem uas tsawg yuav dhau mus ua ib haivneeg uas muaj hwjchim; Kuv yog tus TSWV, kuv yuav ua kom tej no muaj los sai sai ntag.”