Read Hmong Daw Yaxayas 62 Bible Online

Yaxayas 62 - Hmong Daw bible

Yaxayas 62

¹Vim Xi-oos kuv yuav tsis nyob twjywm, thiab vim lub nroog Yeluxalees kuv yuav tsis nyob ntsiag to, mus txog thaum nws txojkev ncaj ncees ci li duab hnub thaum sawv ntxov, thiab nws txojkev cawm dim ci li tes tsau thaum tsaus ntuj.

²Yeluxalees, txhua haivneeg yuav pom koj txojkev muaj yeej, thiab txhua tus vajntxwv yuav pom koj tau koob meej, thiab luag yuav hu koj lub npe tshiab uas tus TSWV muab rau koj.

³Koj yuav yog lub kausmom kub uas zoo nkauj heev ntawm tus TSWV txhais tes, thiab yog lub kausmom vajntxwv uas nyob ntawm koj tus Vajtswv txhais tes.

⁴Luag yuav tsis hu koj hais tias, “Muab tso povtseg,” thiab tsis muab koj lub tebchaws tso tseg nyob qhuav nquas cia; luag yuav hu koj hais tias, “Kuv txojkev zoo siab nyob hauv nws,” thiab yuav hu koj lub tebchaws hais tias, “Sib yuav zoo siab,” vim tus TSWV txojkev zoo siab nyob hauv koj, mas koj yuav zoo li leej txiv rau lub tebchaws.

⁵Ib tug tub hluas yuav ib tug nkaujxwb ua pojniam li cas, mas tus uas tsim koj yuav yuav koj ib yam li ntawd; tus nraug vauv txaus siab rau nws tus pojniam li cas, mas koj tus Vajtswv txaus siab rau koj ib yam li ntawd.

⁶Yeluxalees, kuv cia cov neeg fajxwm nyob saum koj tej ntsa yeej, tsis hais nruab hnub thiab hmo ntuj, lawv hais tsis tseg rau tus TSWV, kom nco ntsoov nws tej lus cog tseg thiab tsis pub kom tus TSWV tso lawv tseg ib zaug li.

⁷Lawv yuav tsis pub tus TSWV mus so txog thaum nws txhim kho lub nroog Yeluxalees tiav, thiab ua kom tau lub nroog rau txhua haivneeg qhuas.

⁸Tus TSWV tau coglus tseg thiab yuav ua kom tiav raws li nws hais: “Kuv yuav tsis pub mov rau nej coj mus yug nej cov yeebncuab ntxiv lawm, thiab cov neeg txawv tebchaws yuav tsis haus tej cawv txiv hmab uas nej ua tau.

⁹Tiamsis koj yog tus cog thiab yog tus sau tej qoobloo ntawd; koj yuav tau noj tej ncuav ntawd thiab ua Vajtswv tsaug. Koj yog tus npaj thiab sau tej txiv hmab los ua ke; koj yuav tau tej txiv hmab ntawd thiab tej cawv txiv hmab los haus nyob hauv kuv lub tuamtsev.”

¹⁰Cov neeg hauv lub nroog Yeluxalees, nej cia li mus kom dhau plaws cov roojvag, rhawv kev rau cov pejxeem sawvdaws taug; cia li ncaws txojkev loj, khaws tej pobzeb hauv plawv kev povtseg, thiab tsa chij rau txhua haivneeg pom.

¹¹Tus TSWV tshaj tawm rau txhua haivneeg hais tias, “Nej cia li qhia rau cov neeg hauv lub nroog Yeluxalees hais tias, ‘Tsa qhovmuag saib, nej txojkev cawm dim twb los lawm lauj!’ Nws coj nqi zog los rau cov neeg uas nws twb cawm dim lawm.”

¹²Luag yuav hu nej hais tias, “Vajtswv haivneeg uas dawbhuv yog haivneeg uas Vajtswv Cawm dim.” Luag yuav hu lub nroog Yeluxalees hais tias, “Lub Nroog Uas Vajtswv Hlub,” thiab “Lub Nroog Uas Vajtswv Tsis Muab Tso Tseg li.”