Read Hmong Daw Levis Kevcai 27 Bible Online

Levis Kevcai 27 - Hmong Daw bible

Levis Kevcai 27

¹Tus TSWV hais rau Mauxes

²kom hais rau cov Yixalayees hais tias, thaum muaj ib tug twg coglus muab nws fij pub rau tus TSWV, tus neeg ntawd yuav tsum tau them nyiaj li nram qab no,

³kom tus nqis raws li nomtswv kevcai: ---tus txivneej uas muaj hnubnyoog nees nkaum xyoo mus txog rau caum xyoo: them tsib caug daim nyiaj ---tus pojniam: them peb caug daim nyiaj tus tub hluas uas muaj hnubnyoog tsib xyoos mus txog nees nkaum xyoo: them nees nkaum daim nyiaj ---tus ntxhais hluas: them kaum daim nyiaj ---tus menyuam tub uas muaj hnubnyoog tsib xyoos rov hauv: them tsib daim nyiaj ---tus menyuam ntxhais uas muaj hnubnyoog tsib xyoos rov hauv: them peb daim nyiaj ---tus txivneej uas muaj hnubnyoog rau caum xyoo rov saud: them kaum tsib daim nyiaj ---tus pojniam uas muaj hnubnyoog rau caum xyoo rov saud: them kaum daim nyiaj.

⁸Yog tus neeg uas coglus tseg ntawd, txomnyem them tsis taus raws li tus nqi uas kom tseg no los yuav tsum coj tus neeg ntawd mus cuag tus povthawj, thiab tus povthawj yuav muab tus nqi txo kom tsawg, raws li tus neeg ntawd muaj peevxwm them taus rau nws them.

⁹Yog tus neeg ntawd coglus muab tus tsiaj uas tsimnyog mus fij rau tus TSWV, mas txhua yam ntawd yuav tsum yog yam dawbhuv,

¹⁰tus neeg uas coglus ntawd yuav tsum tsis txhob muab dua lwm tug tsiaj tuaj hloov tus tsiaj ntawd chaw. Yog nws hloov, ces ob tug tsiaj ntawd puavleej yog tus TSWV tug.

¹¹Tiamsis yog nws coglus muab tus tsiaj uas tsis tsimnyog fij rau tus TSWV, tus txivneej ntawd yuav tsum coj tus tsiaj ntawd mus rau tus povthawj.

¹²Ces tus povthawj mam li muab tus tsiaj ntawd los kom nqi raws li tus tsiaj ntawd zoo lossis phem, thiab tsuas ntaus tus nqi raws li ntawd xwb.

¹³Yog tus neeg ntawd xav txhiv tus tsiaj ntawd rov qab, nws yuav tsum them nees nkaum feem pua ntxiv rau tus nqi tsiaj ntawm.

¹⁴Thaum muaj ib tug twg muab nws lub tsev fij rau tus TSWV, tus povthawj yuav tsum muab ntaus nqi raws li lub tsev ntawd zoo lossis phem, tsuas ntaus tus nqi li ntawd xwb.

¹⁵Yog tus uas fij lub tsev ntawd xav txhiv lub tsev rov qab, nws yuav tsum tau them nees nkaum feem pua ntxiv rau tus nqi tsev ntawd.

¹⁶Yog ib tus twg muab nws daim teb ib feem fij rau tus TSWV, tus povthawj yuav tsum muab ntaus nqi kom tsimnyog raws li daim teb ntawd yuav tseb tau noob qoob npaum li cas rau hauv, qhov uas txaus tseb ib kawm noob nplej ntaus nqi kaum daim nyiaj.

¹⁷Yog dhau plaws Xyoo Thim nws txawm muab nws daim teb fij, ces muab ntaus nqi kom puv nkaus rau nws them.

¹⁸Yog twb dhau Xyoo Thim lawm, nws mam muab nws daim teb fij, tus povthawj yuav nrog kom tus nqi raws li tej xyoo ntawd mus txog Xyoo Thim, thiab muab tus nqi txo kom qis.

¹⁹Yog tus uas fij nws daim teb ntawd xav txhiv rov qab, nws yuav tsum them nees nkaum feem pua ntxiv rau tus nqi ntawd.

²⁰Yog nws tsis xav txhiv nws daim teb rov qab lossis nws twb xub muab muag rau lwm tus lawm, ces nws tsis muaj cai txhiv daim teb ntawd rov qab li lawm.

²¹Ces thaum rov txog Xyoo Thim daim teb ntawd yuav ua tus TSWV tug mus li; thiab yuav yog cov povthawj tug.

²²Yog ib tug twg muab nws daim teb uas nws yuav los fij rau tus TSWV,

²³tus nqi yuav tsum kom raws li tej xyoo mus txog rau Xyoo Thim, thiab tus neeg ntawd yuav tsum them tus nqi rau hnub ntawd; cov nyiaj ntawd yog tus TSWV tug.

²⁴Thaum txog Xyoo Thim yuav tsum muab daim teb ntawd thim rov rau tus tswv qub lossis nws cov xeebntxwv.

²⁵Txhua yam nqi yuav tsum muab kom, kom raws li nomtswv txoj cai.

²⁶Thawj tug menyuam tsiaj yeej yog tus TSWV tug li lawm, tsis pub leejtwg muab tus tsiaj ntawd tuaj fij ua kev zoo siab rau nws, tsis hais menyuam nyuj, menyuam yaj lossis menyuam tshis los puavleej yog tus TSWV tug,

²⁷tiamsis yog cov tsiaj uas tsis huv thawj tus menyuam yuav tsum tau txhiv rov qab raws li tus nqi uas tau kom tseg thiab ntxiv ib feem tsib rau tus nqi ntawd. Yog nws tsis txhiv tus tsiaj ntawd rov qab, ces muab muag rau lwm tus raws li tus nqi uas tau kom tseg lawm los tau.

²⁸Txhua yam uas tau coglus muab fij rau tus TSWV lawm, txawm yog neeg lossis tsiaj txhu lossis liaj teb, tsis pub muab muag lossis txhiv rov qab li. Rau qhov tej ntawd yog yam dawbhuv heev rau tus TSWV lawm.

²⁹Yog tau coglus nrog tus TSWV lawm hais tias, yuav muab ib tug twg ua kom puastsuaj mus, mas tsis pub txhiv rov qab li lawm; yuav tsum muab tus ntawd tua kom tuag xwb.

³⁰Tagnrho tej qoobloo hauv tej teb lossis tej txiv hmab txiv ntoo ib feem kaum, yeej yog tus TSWV tug.

³¹Yog leejtwg xav txhiv qee yam rov qab, nws yuav tsum them ib feem tsib ntxiv rau tus nqi uas tau kom tseg.

³²Tagnrho tej tsiaj nyeg los ib feem kaum yeej yog tus TSWV tug. Thaum suav tej tsiaj txhu, kaum tus muab ib tug ua tus TSWV tug.

³³Tus tswv tsiaj tsis txhob xaiv tus tsiaj zoo tawm ntawm tus tsiaj phem, thiab tsis txhob muab tej tsiaj los sib hloov. Yog nws muab tus tsiaj no mus hloov tus tsiaj tod chaw, ces ob tug tsiaj ntawd puavleej yog tus TSWV tug huv tibsi, thiab txhiv tsis tau rov qab li lawm.

³⁴Ntawm no yog cov lus samhwm uas tus TSWV hais rau Mauxes saum Roob Xinais, kom coj los qhia rau cov Yixalayees.