Read Hmong Daw Levis Kevcai 3 Bible Online

Levis Kevcai 3 - Hmong Daw bible

Levis Kevcai 3

¹Yog leejtwg muab nws tus heev nyuj lossis tus maum nyuj tua fij ua kev sib raug zoo, mas tus nyuj ntawd yuav tsum yog tus uas tsis muaj ib qho phem hlo li.

²Tus txivneej ntawd yuav tsum tsa nws txhais tes rau saum tus nyuj lub taubhau thiab muab tus nyuj ntawd tua rau ntawm tus TSWV lub Tsevntaub sib ntsib lub qhovrooj. Ces Aloos cov tub uas yog cov povthawj muab cov ntshav coj mus hliv ywg thoob plaws lub thaj,

³thiab muab tus tsiaj ntawd tej nqaij li nram no coj mus ua khoom fij sib raug zoo rau tus TSWV: tagnrho cov npluag roj uas npog lub plab, cov hnyuv,

⁴ob lub raum thiab tej roj uas npog ob lub raum, thiab nplooj siab uas zoo tshaj plaws.

⁵Cov povthawj yuav tsum muab tagnrho tej ntawd hlawv rau saum lub thaj uas yog hlawv nrog tej khoom fij. Tej pa khoom fij no tsw qab ntxiag ua rau tus TSWV txaus siab.

⁶Yog muab yaj lossis tshis los tua ua khoom fij ua kev sib raug zoo, muab tus txiv lossis tus maum los tau, tiamsis yuav tsum muab tus uas tsis muaj ib qho phem hlo li.

⁷Yog leejtwg muab ib tug yaj fij,

⁸nws yuav tsum tsa nws txhais tes rau saum tus yaj ntawd taubhau thiab muab tus yaj ntawd tua rau ntawm hauv ntej tus TSWV lub Tsevntaub sib ntsib. Ces cov povthawj mam li muab cov ntshav coj mus hliv ywg thoob plaws rau lub thaj,

⁹thiab muab tus tsiaj ntawd tej nqaij li nram no coj mus ua khoom fij rau tus TSWV: cov roj, tus tw nrog cov roj uas txiav ti nkaus ntawm tus pobtxha ntsag, tej npluag roj uas npog lub plab, cov hnyuv,

¹⁰ob lub raum thiab tej roj uas npog ob lub raum, thiab nplooj siab uas zoo tshaj plaws.

¹¹Dua li cov ntawd lawm, tus povthawj mam li muab coj mus hlawv tagnrho rau saum lub thaj ua khoom fij rau tus TSWV.

¹²Yog leejtwg muab ib tug tshis fij,

¹³nws yuav tsum tsa tes rau saum tus tshis ntawd lub taubhau thiab muab tus tshis ntawd tua rau ntawm hauv ntej tus TSWV lub Tsevntaub sib ntsib. Ces cov povthawj mam li muab cov ntshav coj mus hliv ywg thoob plaws lub thaj,

¹⁴thiab muab tus tsiaj ntawd tej nqaij li nram no coj mus fij rau tus TSWV: cov npluag roj uas npog lub plab thiab cov hnyuv,

¹⁵ob lub raum thiab tej roj uas npog ob lub raum, thiab nplooj siab uas zoo tshaj plaws.

¹⁶Dua li cov ntawd lawm, tus povthawj mam li muab coj mus hlawv tagnrho rau saum lub thaj ua khoom fij tsw qab ntxiag rau tus TSWV. Tagnrho cov roj puavleej yog tus TSWV tug.

¹⁷Tsis pub cov Yixalayees ib tug twg noj tej roj lossis tej ntshav li; qhov no yog ib txoj kevcai rau cov Yixalayees uas nyob rau txhua qhov coj mus ibtxhis li.