Read Hmong Daw Yelemis 10 Bible Online

Yelemis 10 - Hmong Daw bible

Yelemis 10

¹Cov Yixalayees, nej cia li mloog tej lus uas tus TSWV hais rau nej.

²Nws hais tias, “Nej tsis txhob ua kev phem kev qias ib yam li lwm haivneeg ua; tsis txhob cia tej xwm uas tshwmsim saum nruab ntug ua rau nej xav tsis thoob, txawm yog lwm haivneeg ntshai tej ntawd los xij.

³Cov neeg ntawd tej kev ntseeg tsis muaj qabhau dabtsi; lawv mus txiav ntoo hauv havzoov los rau cov kws txua ntoo muab cuabyeej txua

⁴thiab muab nyiaj muab kub vuam rau; lawv muab ntsia hlau ntsia kom tsis txob vau.

⁵Tej mlom ntawd zoo ib yam li tej mojzeej uas luag muab dai rau tom tej teb dib thiab tej mlom ntawd tsis txawj hais lus; luag yuav tsum nqa tej mlom ntawd, rau qhov tej mlom ntawd tsis txawj mus kev. Nej tsis txhob ntshai tej mlom ntawd, rau qhov mlom ua tsis tau phem rau nej thiab pab tsis tau nej.”

⁶Tus TSWV, tsis muaj leejtwg yuav zoo npaum li koj; koj yog tus muaj zog loj zog nchav, koj lub koob lub npe nrov ncha moo lug thiab muaj hwjchim heev.

⁷Tus vajntxwv uas kav txhua haivneeg, leejtwg thiaj tsis kam hwm koj? Koj yog tus uas tsimnyog peb hwm. Txhua haivneeg tej neeg txawj ntse lossis lawv tej vajntxwv tsis muaj ib tug zoo npaum li koj.

⁸Lawv cov ntawd puavleej ruam thiab tsis thoob tsib. Tej mlom ntawd yog ntoo xwb, qhia tsis tau dabtsi rau nej.

⁹Lawv muab tej nyiaj uas coj tim tebchaws Xapees tuaj thiab cov kub uas coj hauv tebchaws Ufas los vuam tej mlom ntawd; tej mlom ntawd puavleej yog cov neeg uas nchuav nyiaj nchuav kub thiab txawj txua ntoo txua xwb; lawv muab tej ris tsho ntaub xiav thiab ntaub tsamxem rau tej mlom ntawd hnav; tej ntaub ntawd yog cov neeg uas txawj ntos ntaub ntos xwb.

¹⁰Tiamsis tus TSWV, koj yog tus Vajtswv tseeb, koj yog tus Vajtswv uas muaj sia nyob, thiab yog tus vajntxwv uas nyob mus ibtxhis. Thaum koj chim lub ntiajteb ua zog koog; txhua haivneeg tiv tsis taus koj txojkev chim. (

¹¹Nej yuav tsum qhia rau lawv hais tias tej mlom ntawd tsis yog cov uas tsim lub ntiajteb thiab lub ntuj, tej mlom ntawd yuav puastsuaj tas; thiab yuav tsis muaj nyob hauv lub ntiajteb no lawm.)

¹²Tus TSWV tsim lub ntiajteb los ntawm nws lub hwjchim; nws tsim lub qab ntuj los ntawm nws lub tswvyim, thiab nthuav lub ntuj los ntawm nws txojkev txawj ntse.

¹³Thaum tus TSWV hais rau tej dej saum nruab ntug, ces tej dej ntawd txawm nrov nroo ntws; nws ua kom muaj huab tsaus nti tim qab ntug los. Nws ua kom muaj xob laim rau thaum nag los, thiab tso cua hauv nws lub txhab tuaj ntsawj.

¹⁴Neeg txhua tus puavleej ruam thiab tsis muaj kev txawj ntse; cov neeg nchuav mlom yuav raug txajmuag, rau qhov tej mlom uas lawv nchuav tsis ciaj sia thiab cuav xwb.

¹⁵Tej mlom ntawd tsis muaj nqis thiab tsimnyog raug thuam; thaum tus TSWV txiav txim rau lawv, lawv yuav puastsuaj tas.

¹⁶Yakhauj tus Vajtswv tsis zoo li tej mlom ntawd; nws yog tus uas tsim ib puas tsav yam thiab nws yog tus xaiv cov Yixalayees ua nws haivneeg. Nws lub npe hu ua tus TSWV uas muaj hwjchim loj kawg nkaus.

¹⁷Cov neeg uas nyob hauv lub nroog Yeluxalees, luag tuaj vij nej lawm! Nej cia li sawbsim nej tej khoom.

¹⁸Tus TSWV yuav ntiab nej tawm hauv lub tebchaws no mus; nws yuav tso kev txomnyem los rau nej mus txog hnub uas nej puastsuaj tas tsis tshuav ib tug seem li. Tus TSWV hais li ntawd.

¹⁹Cov neeg uas nyob hauv lub nroog Yeluxalees quaj hais tias, “Peb raug mob sab kawg li! Peb tej qhov txhab yuav kho tsis zoo li. Peb xav hais tias peb yuav tiv tau tej no.

²⁰Peb tej tsevntaub puastsuaj tas; tej hlua uas rub los po thiab tu tas. Peb tej menyuam ploj tas tsis tshuav ib tug nrog peb nyob pab peb tsa tsevntaub; thiab tsis tshuav ib tug pab peb dai tej ntaub thaiv qhovrai lawm.”

²¹Kuv teb hais tias, “Peb cov thawjcoj ruam kawg li, lawv tsis thov tus TSWV ua tus coj kev. Twb yog vim li no lawv thiaj ua tsis tau ib yam dabtsi li, thiab peb cov neeg thiaj khiav mus nyob ua sab ua sua tas lawm.

²²Nej cia li mloog! Muaj ib tsab xov tuaj! Yog lub suab ua tsov ua rog uas nrov doog diaj sab qaumteb tuaj; lawv yuav tuaj ua kom cov Yudas tej nroog ua suabpuam tas ua chaw rau tej hma nyob.”

²³Tus TSWV, kuv paub hais tias tsis muaj leejtwg uas nws rov ua tus tswv kav nws; thiab tsis muaj leejtwg nws rov tswj nws lub neej.

²⁴Tus TSWV, thov koj ntuas koj haivneeg, tiamsis thaum koj chim, thov koj tsis txhob ua nruj ua tsiv lossis rau txim hnyav rau peb nyob tsam peb tuag lawm.

²⁵Thov tshem koj txojkev chim mus rau txhua haivneeg uas tsis pehawm koj thiab mus rau cov neeg uas tso koj tseg lawm. Lawv tua koj haivneeg; lawv tau ua rau peb puastsuaj tas, thiab ua rau peb lub tebchaws puastsuaj huv tibsi lawm.