Read Hmong Daw Yelemis 12 Bible Online

Yelemis 12 - Hmong Daw bible

Yelemis 12

¹“Tus TSWV, yog kuv ua plaub rau koj, koj yuav yog tus uas yeej xwb. Tiamsis kuv xav nug koj txog txojkev ncaj ncees. Vim li cas cov neeg siab phem tsuas muaj vammeej zuj zus xwb? Vim li cas cov neeg siab tsis ncaj ua dabtsi los tiav?

²Koj yog tus cog lawv, lawv thiaj nrhau cag; lawv loj hlob thiab tawg paj txi txiv; lawv niaj hnub hais koj lub npe, tiamsis lawv lub siab tsis npuab koj.

³Tiamsis tus TSWV, koj paub kuv zoo; koj pom ntsoov tej uas kuv ua thiab paub hais tias kuv hlub koj npaum li cas. Thov koj ntiab cov neeg siab phem no mus ib yam li tus yaj uas luag cab mus tua; koj zov rawv lawv mus txog thaum luag muab lawv tua lawm.

⁴Yuav cia peb lub tebchaws qhuav thiab tej nroj tsuag hauv peb tej liaj teb ntsws mus txog thaum twg? Tej tsiaj thiab tej noog tuag tas vim tej kev phem kev qias uas peb cov neeg ua; lawv hais tias, ‘Vajtswv yeej tsis paub tej uas peb ua.’ ”

⁵Tus TSWV hais tias, “Yelemis, yog koj nrog neeg sib tw, koj twb qaug zog lawm, koj yuav ua li cas nrog nees sib tw khiav? Yog hais tias koj twb tsis tau luag nyob hauv tej tiaj nrag no, koj yuav ua li cas tau luag nyob hauv lub havzoov ntawm ntug dej Yauladees?

⁶Koj tej kwvtij thiab koj tsevneeg ntxeev siab rau koj thiab lawv ua ib nqag tawmtsam koj. Txawm yog lawv hais lus zoo rau koj los koj tsis txhob tso siab rau lawv.”

⁷Tus TSWV hais tias, “Kuv tso cov Yixalayees tseg lawm; kuv tsis lees paub haivneeg uas kuv xaiv. Kuv muab haivneeg uas kuv hlub cob rau lawv cov yeebncuab tes.

⁸Haivneeg uas kuv xaiv ntxeev siab rau kuv; lawv nyooj rau kuv ib yam li tus tsov ntxhuav nyooj hauv havzoov, vim li ntawd kuv thiaj ntxub lawv.

⁹Haivneeg uas kuv xaiv zoo ib yam li tus noog uas tej dav ya txhua phab tuaj muab. Cia li hu tej tsiaj qus tuaj nrog noj.

¹⁰Ntau tus nomtswv txawv tebchaws tuaj rhuav kuv lub vaj txiv hmab puastsuaj tas; lawv tuaj tsuj kuv tej teb ua lwj ua liam; lawv ua rau lub tebchaws uas kuv hlub ua suabpuam tas.

¹¹Lawv ua rau kuv lub tebchaws nyob qhuav nquas cia; lub tebchaws quaj saib ntsoov kuv. Thoob plaws lub tebchaws ua suabpuam tas tsis muaj leejtwg quavntsej li.

¹²Cov neeg huab noj huab haus tuaj nyob puv nkaus saum tej roob mojsab qhua. Kuv thiaj tso kev tsov kev rog tuaj rhuav lub tebchaws kom puastsuaj tas; tsis muaj leejtwg tau nyob kaj siab lug li.

¹³Kuv haivneeg cog nplej, tiamsis lawv sau tau txhauv xwb; lawv rau siab ua haujlwm, tiamsis lawv tsis tau ib yam dabtsi li. Twb yog vim kuv txojkev chim lawv thiaj tsis muaj qoob sau.”

¹⁴Tus TSWV hais tias, “Kuv muaj lus yuav hais rau tej haivneeg uas nyob ibncig cov Yixalayees lub tebchaws uas ua rau lub tebchaws uas kuv muab rau cov Yixalayees puastsuaj lawm. Kuv yuav tshem cov neeg siab phem ntawd tawm hauv lawv tej tebchaws mus ib yam li luag dob nroj povtseg, thiab kuv yuav cawm cov Yudas kom dim ntawm lawv cov yeebncuab tes.

¹⁵Tiamsis tom qab uas muab lawv tshem tawm lawm, kuv yuav rov hlub lawv; kuv yuav coj txhua haivneeg rov mus nyob hauv lawv tej tebchaws.

¹⁶Yog lawv ntseeg thiab ua raws li kuv haivneeg txoj kevcai kawg siab kawg ntsws, thiab tuav kuv lub npe coglus hais tias, ‘Tus TSWV muaj sia nyob’, ib yam li lawv kom kuv haivneeg tuav Npa-as lub npe coglus, lawv thiaj yuav muaj feem nrog kuv haivneeg nyob ua ke thiab vammeej.

¹⁷Tiamsis yog ib haivneeg twg tsis mloog kuv lus, kuv yuav tshem haivneeg ntawd thiab ua kom lawv puastsuaj. Kuv yog tus TSWV uas hais li ntawd.”