Read Hmong Daw Yelemis 46 Bible Online

Yelemis 46 - Hmong Daw bible

Yelemis 46

¹Tus TSWV hais rau kuv txog tej haivneeg,

²yog xub hais txog cov Iziv. Tus TSWV hais txog Falaus Nekaus uas yog cov Iziv tus vajntxwv cov tubrog uas Vajntxwv Nenpukajnexales uas kav tebchaws Npanpiloos tuaj tua yeej hauv lub nroog Kakhemis uas nyob ze ntawm tus dej Efalates yog xyoo plaub uas Yehauyakees ua vajntxwv kav tebchaws Yudas:

³“Iziv cov thawj tubrog qw hais tias, ‘Cia li npaj nej tej thaiv hniav ntaj kom txhij mus ntaus rog!

⁴Muab eeb nog rau nej tej nees thiab caij! Cia li ntoo kausmom hlau thiab mus sawv ua tej kab! Hov nej tej hmuv thiab hnav nej tej tsho hlau!’ ”

⁵Tiamsis tus TSWV nug hais tias, “Kuv pom dabtsi? Lawv ntshai thiab thim rov qab. Lawv cov tubrog raug tua ua rau lawv ntshai thiab khiav tsis saib qab li.

⁶Txawm yog cov uas khiav ceev heev los yeej khiav tsis dhau; cov tubrog los khiav tsis dim. Lawv dawm thiab ntog tas rau ntawm tus Dej Efalates sab qaumteb.

⁷Leejtwg thiaj yuav sawv taus nphau nphwv ib yam li tus dej Niles thiab ib yam li tus dej uas huam puv nkaus ntug?

⁸Twb yog Iziv sawv nphau nphwv ib yam li tus dej Niles, thiab ib yam li tus dej uas huam puv nkaus ntug. Iziv hais tias, ‘Kuv yuav huam thiab nyab lub ntiajteb; kuv yuav rhuav tej nroog thiab tej neeg uas nyob hauv kom puastsuaj tas.

⁹Tej nees cia li dhia mus thiab tej tsheb cia li ntog! Cia li txhij cov Sudas thiab cov Linpias tej tubrog uas nqa tej thaiv hniav ntaj, thiab cov Lidias tej tubrog uas txawj tua hneevnti mus.’ ”

¹⁰Hnub no yog tus TSWV uas kav ib puas tsav yam thiab muaj hwjchim loj kawg nkaus hnub: hnub no nws yuav ua pauj; hnub no nws yuav rau txim rau nws cov yeebncuab. Nws rab ntaj yuav noj lawv tej nqaij kom tsau thiab haus lawv tej ntshav kom txaus siab. Hnub no tus TSWV uas muaj hwjchim loj kawg nkaus muab cov uas nws tua tuag lawm, coj mus fij rau ntawm tus Dej Efalates sab qaumteb.

¹¹Cov Iziv, nej cia li mus rau pem cheebtsam Nkile-as thiab nrhiav tshuaj rau nej! Nej tej tshuaj tsis zoo thiab kho tsis tau nej tej mob.

¹²Txhua haivneeg hnov nej tej kev txajmuag, thiab txhua tus hnov nej quaj. Tej tubrog sib dawm ntog rau hauv av.

¹³Thaum Vajntxwv Nenpukajnexales uas kav tebchaws Npanpiloos tuaj tua tebchaws Iziv. Tus TSWV hais rau kuv tias,

¹⁴“Koj cia li mus qhia rau lub nroog Menkidaus, lub nroog Meefis thiab lub nroog Tapahes hauv tebchaws Iziv hais tias, ‘Nej cia li npaj sib tua, rau qhov yuav muaj kev tsov kev rog tuaj ua kom nej puastsuaj.

¹⁵Vim li cas nej tus vajtswv Anpis uas muaj hwjchim vau lawm? Twb yog tus TSWV muab tsoo tawg tas lawm!’

¹⁶Nej cov tubrog dawm ntog tas lawm; nej ib leeg hais rau ib leeg hais tias, ‘Peb cia li rov mus tsev, mus cuag peb cov neeg, peb thiaj dim yeebncuab tej hniav ntaj hniav riam!’

¹⁷“Lawv tis dua ib lub npe tshiab rau Falaus uas yog cov Iziv tus vajntxwv hu ua ‘Tus uas ua Tsis Tau Dabtsi Cia Nws Lub Sijhawm Dhau Mus.’

¹⁸Kuv yog tus TSWV uas muaj hwjchim loj kawg nkaus uas yog Vajtswv tus uas muaj sia nyob thiab yog vajntxwv. Lub Roob Tanpaus sawv siab tshaj tej hauv roob thiab lub Roob Kalemees sawv siab tshaj hiavtxwv li cas, tus uas yuav tuaj tawmtsam nej muaj zog npaum li ntawd.

¹⁹Cov Iziv, nej cia li sawbsim, luag yuav tuaj ntes nej mus; Meefis yuav ua suabpuam tsis muaj neeg nyob.

²⁰Iziv zoo ib yam li tus xyuas nyuj uas zoo nkauj heev, tiamsis ib tug yoov mosdab yuav tuaj sab qaumteb tuaj tom nws.

²¹Txawm yog tej tubrog uas nws ntiav tuaj pab nws los tsuas zoo ib yam li tus xyuas nyuj ntawd. Lawv tiv tsis tau tej kev sib ntaus sib tua; lawv thim khiav rov qab. Hnub uas lawv raug kev puastsuaj twb los txog lawm, yog hnub uas lawv raug txiav txim.

²²Thaum yeebncuab cov tubrog tuaj ze lawm, Iziv khiav nrov xuav ib yam li nab nkaug. Yeebncuab nqa taus tuaj tua cov Iziv ib yam li ntov ntoo

²³thiab ib yam li luag ntov zoov. Yeebncuab cov tubrog coob heev yeej suav tsis txheeb li; lawv cov tubrog coob tshaj tej kooj txomfav.

²⁴Cov Iziv raug kev txajmuag; lawv yuav swb cov neeg uas tuaj sab qaumteb tuaj. Kuv yog tus TSWV uas hais li ntawd.”

²⁵Tus TSWV uas yog cov Yixalayees tus Vajtswv uas muaj hwjchim loj kawg nkaus hais tias, “Kuv yuav rau txim rau Amoos uas yog Thenpes tus vajtswv, cov Iziv, lawv tej vajtswv thiab lawv tej vajntxwv. Kuv muab Falaus uas kav tebchaws Iziv thiab txhua tus uas tuaj nws tog

²⁶cob rau Vajntxwv Nenpukajnexales uas kav tebchaws Npanpiloos thiab cov tubrog uas xav muab nws tua povtseg. Tom qab ntawd yuav muaj neeg rov qab los nyob hauv tebchaws Iziv ib yam li yav tas los lawm. Kuv yog tus TSWV uas hais li ntawd.”

²⁷“Kuv haivneeg, nej tsis txhob ntshai, haivneeg Yixalayees, nej tsis txhob txhawj! Kuv yuav pab nej cov uas luag ntes mus nyob rau lub tebchaws uas deb heev. Nej yuav tau rov los tsev thiab nyob kaj siab lug; nej yuav nyob tso siab lug thiab tsis muaj leejtwg ua rau nej ntshai.

²⁸Kuv yuav los cuag nej thiab cawm nej. Kuv yuav rhuav txhua haivneeg uas kuv ntiab nej mus nrog nyob kom puastsuaj, tiamsis kuv yuav tsis cia kom nej puastsuaj. Kuv yuav rau txim rau nej, tiamsis thaum kuv rau txim rau nej, kuv yuav ua ncaj. Kuv yog tus TSWV uas hais li ntawd.”