Read Hmong Daw Yelemis 47 Bible Online

Yelemis 47 - Hmong Daw bible

Yelemis 47

¹Ua ntej uas Falaus tuaj tua lub nroog Nkaxas, tus TSWV hais rau kuv txog cov Filitees.

²Nws hais tias, “Nej saib! Dej yuav nphau nphwv sab qaumteb tuaj thiab yuav kuav ib yam li dej nyab. Dej yuav nyab puv nkaus lub tebchaws thiab txhua yam, yuav nyab tej nroog thiab tej neeg huv tibsi. Tej neeg yuav quaj qw thov kev pab; neeg thoob ntiajteb txhua tus yuav quaj qhuav siab qhawv.

³Lawv yuav hnov tej suab nees dhia nrov, tej tsheb nees caij tua rog thiab tej log tsheb nrov doog diaj. Tej niam tej txiv yuav khiav tsis tig saib lawv tej menyuam; lawv tej npab yuav tsaug dai vias.

⁴Twb txog lub sijhawm uas rhuav cov Filitees kom puastsuaj lawm, kuv yuav txiav lub nroog Tiles thiab lub nroog Xidoos kev pab cov Filitees uas seem. Rau qhov kuv uas yog tus TSWV yuav rhuav cov Filitees uas nyob raws ntug hiavtxwv Keletes kom puastsuaj.

⁵Cov neeg uas nyob hauv Nkaxas yuav quaj ntsuag, cov neeg uas nyob hauv Asekeloos puastsuaj tas lawm. Cov Filitees yuav quaj ntsuag mus txog thaum twg?

⁶Nej cia li qw hais tias, ‘Tus TSWV rab ntaj! Thaum twg koj mam li tseg tsis tua neeg? Cia li rov mus rau hauv koj lub hnab thiab so!’

⁷Tiamsis yuav ua li cas rab ntaj thiaj so tau thaum kuv tseem kom nws ua haujlwm? Kuv samhwm kom nws tua cov neeg uas nyob hauv lub nroog Asekeloos thiab cov neeg uas nyob raws ntug hiavtxwv.”