Read Hmong Daw Yelemis 9 Bible Online

Yelemis 9 - Hmong Daw bible

Yelemis 9

¹Kuv xav kom kuv lub taubhau yog lub qhovdej txhawv, thiab cia kuv ob lub qhovmuag ua ciav dej rau kua muag ntws; kuv thiaj tau quaj tas hnub tas hmo rau kuv haivneeg uas raug luag tua tuag.

²Kuv xav kom muaj ib lub chaw rau kuv nyob tom tiaj suabpuam, kom kuv nyob nrug deb kuv haivneeg. Lawv txhua tus yog neeg tsis ncaj thiab yog neeg ntxeev siab.

³Lawv nyiam hais lus dag; lawv tsis hais lus tseeb tiamsis lawv hais lus dag thoob tebchaws. Tus TSWV hais tias, “Kuv haivneeg ua kev phem kev qias ib yam tas ib yam tuaj, thiab lawv tsis lees paub hais tias kuv yog lawv tus Vajtswv.”

⁴Txhua tus yuav tsum ceevfaj nws tus phoojywg, thiab tsis muaj leejtwg ntseeg nws tus kwvtij siab; rau qhov tej kwvtij puavleej hais lus dag ib yam li Yakhauj, thiab txhua tus puavleej txob thuam nws tej phoojywg.

⁵Lawv txhua tus ua tsis ncaj rau lawv tej phoojywg thiab tsis muaj ib tug hais lus tseeb li; lawv cob lawv tus nplaig kom hais lus dag thiab tsis tso lawv tej kev txhaum tseg. Lawv ua kev phem ib yam tas ib yam tuaj thiab ib leeg dag ib leeg. Tus TSWV hais tias nws haivneeg tso nws tseg lawm.

⁷Vim li no tus TSWV uas muaj hwjchim loj kawg nkaus thiaj li hais tias, “Kuv haivneeg ua phem ua qias heev, kuv yuav ua li cas rau lawv? Kuv yuav sim lawv, kuv yuav muab kuv haivneeg nchuav dua tshiab ib yam li nchuav nyiaj.

⁸Lawv tus nplaig ntse zuag plias ib yam li tej xubvos, lawv ibtxwm hais lus dag. Lawv ua txuj hais lus zoo rau lawv tej neeg zejzog, tiamsis yog lawv cuab hmuv tos luag kev xwb.

⁹Kuv yuav tsis rau txim rau lawv vim tej uas lawv ua ntawd los? Kuv yuav tsis ua pauj haivneeg uas ua li no los? Kuv yog tus TSWV uas hais li ntawd.”

¹⁰Yelemis hais tias, “Kuv yuav quaj ntsuag rau tej hauv roob thiab quaj rau tej tshav zaub, rau qhov tej ntawd qhuav tas lawm, thiab tsis muaj leejtwg taug kev hla qhov ntawd li. Tsis hnov tej tsiaj nyeg ua suabsab qhov twg li; tej noog thiab tej tsiaj qus los khiav tas lawm.”

¹¹Tus TSWV hais tias, “Kuv yuav ua kom lub nroog Yeluxalees puastsuaj tas thiab cia ua chaw rau tej hma nyob; tej nroog hauv tebchaws Yudas yuav ua suabpuam tsis muaj neeg nyob.”

¹²Kuv nug hais tias, “Tus TSWV, vim li cas lub tebchaws no yuav qhuav ua suabpuam tas, thiab tsis muaj neeg taug kev hla qhov ntawd li lawm? Leejtwg thiaj yog tus ntse thiab totaub tej no? Koj yuav qhia rau leejtwg kom nws mus piav rau lwm tus?”

¹³Tus TSWV teb hais tias, “Tej no tshwmsim twb yog vim kuv haivneeg tso kuv tej lus uas kuv qhia rau lawv tseg lawm. Lawv tsis mloog thiab tsis ua raws li kuv tej lus.

¹⁴Tiamsis, lawv tawv ncauj thiab mus pe tej mlom Npa-as ib yam li lawv cov yawgkoob qhia lawv pe.

¹⁵Yog li ntawd, koj cia li saib tej uas kuv uas yog tus TSWV, cov Yixalayees tus Vajtswv uas muaj hwjchim loj kawg nkaus yuav ua: kuv yuav muab nroj iab rau kuv haivneeg noj thiab muab tshuaj muaj taug rau lawv haus.

¹⁶Kuv yuav muab lawv ntiab mus nrog lwm haivneeg uas lawv thiab lawv cov yawgkoob tsis tau paub thiab tsis tau pom dua nyob, thiab kuv yuav cia yeebncuab tuaj tawmtsam lawv mus txog hnub uas muab lawv rhuav puastsuaj tas.”

¹⁷Tus TSWV uas muaj hwjchim loj kawg nkaus hais tias, “Nej xav saib yuav muaj dabtsi tswm los! Cia li hu cov pojniam uas txawj nyiav tuaj nyiav, thiab hu cov pojniam uas txawj hu nkauj quaj ntsuag tuaj hu nkauj.”

¹⁸Tej neeg hais tias, “Cia li kom lawv kavtsij tuaj hu nkauj thiab nyiav rau peb mus txog thaum peb tej kua muag ntws si laim thiab peb tej tawv muag ntub ntsuav kua muag.”

¹⁹Nej mloog tej suab quaj hauv lub nroog Xi-oos: “Peb raug puastsuaj lawm lauj! Peb poob ntsejmuag kawg li! Peb cia li tawm hauv peb lub tebchaws mus; peb tej vajtse luag twb muab rhuav pob puas tas lawm.”

²⁰Kuv hais tias, “Nej cov pojniam cia li mloog tus TSWV hais thiab ua tib zoo mloog nws tej lus. Qhia nej tej ntxhais kom txawj nyiav thiab qhia nej tej phoojywg kom txawj hu nkauj quaj ntsuag.

²¹Kev tuag twb nkag ntawm peb tej qhovrai los rau hauv peb tej tsev, thiab tua peb tej menyuam uas tabtom ua si ntawm tej kev, thiab tej tub hluas uas ncig tom tej kiab tej khw lawm.

²²Tej neeg tuag pawglug rau txhua qhov chaw ib yam li tej quav nyuj tom tej nras, thiab ib yam li tej hnab nplej uas cov neeg hlais nplej ua poob tsis muaj leejtwg sau. Tej lus no yog tus TSWV kom kuv hais.”

²³Tus TSWV hais tias, “Cov neeg txawj ntse tsis txhob khav lawv tej tswvyim, lossis cov neeg muaj zog tsis txhob khav lawv lub zog, lossis cov neeg npluanuj tsis txhob khav lawv tej nyiaj txiag.

²⁴Yog leejtwg xav khav, nws yuav tsum khav hais tias nws paub thiab totaub kuv, rau qhov kuv txojkev hlub nyob mus ibtxhis; kuv ua ncaj thiab hais tseeb xwb. Tej no yog tej uas haum kuv siab. Kuv yog tus TSWV uas hais li ntawd.”

²⁵Tus TSWV hais tias, “Twb txog lub sijhawm uas kuv yuav rau txim rau cov Iziv, cov Yudas, cov Edoos, cov Amoos, cov Mau-am thiab cov neeg uas nyob tom tiaj suabpuam uas pheej nyiam txiav plaubhau luv luv. Cov neeg ntawd puavleej ua kevcai txiav, tiamsis lawv tsis ua raws li kuv tej lus cog tseg. Cov neeg ntawd thiab cov Yixalayees puavleej tsis ua raws li kuv tej lus cog tseg.”