Read Hmong Daw Nkauj Quaj Ntsuag 2 Bible Online

Nkauj Quaj Ntsuag 2 - Hmong Daw bible

Nkauj Quaj Ntsuag 2

¹Tus TSWV txojkev chim los khwb nkaus lub roob Xi-oos tsaus nti. Nws muab Xi-oos lub koob meej uas nto moo lug rhuav puastsuaj tas. Txawm yog nws lub Tuamtsev los hnub uas nws chim nws yeej muab tso povtseg.

²Tus TSWV yuav rhuav txhua lub zos hauv tebchaws Yudas Kom puastsuaj tas tsis hlub tshua leejtwg hlo li. Thiab muab tej chaw fajxwm uas tiv thaiv lub tebchaws rhuav povtseg. Nws ua rau lub tebchaws thiab tej thawjcoj kom raug kev txajmuag.

³Vim tus TSWV chim heev, nws thiaj ua rau cov Yixalayees lub zog ntaug; Nws tsis pab peb thaum cov yeebncuab tuaj tua peb. Nws tawmtsam peb ib yam ib hluavtaws kub txhua yam puastsuaj tas lawm.

⁴Nws taw nws cov xub hneevnti rau peb ib yam li taw rau tej yeebncuab; Nws muab txhua tus uas peb nyiam thiab tshua tua povtseg huv tibsi. Nws hliv nws txojkev chim ib yam li nplaim taws los rau Xi-oos tus ntxhais lub tsevntaub.

⁵Tus TSWV rhuav cov Yixalayees ib yam li nws rhuav tej yeebncuab ntag; Nws muab Yeluxalees tej chaw fajxwm thiab tej tsev rhuav puastsuaj tas. Nws coj txojkev txomnyem uas tsis txawj kawg los rau cov Yudas.

⁶Nws muab lub Tuamtsev uas yog qhov chaw pehawm nws tsoo tawg tas; Tus TSWV ua kom Xi-oos tsis txhob nco qab txog hnub dawbhuv thiab Hnub Xanpataus. Cov vajntxwv thiab cov povthawj puavleej raug nws txojkev chim ib yam nkaus.

⁷Tus TSWV muab nws lub thaj tso tseg thiab ua rau nws lub Tuamtsev dawbhuv ua suabpuam tas. Nws tso cai rau yeebncuab tuaj muab lub Tuamtsev tej ntsa yeej tsoo tawg tas. Lawv qw muaj yeej rau ntawm qhov chaw uas thaum peb pehawm Vajtswv thiab zoo siab.

⁸Tus TSWV yeej txiav txim siab ua kom Xi-oos tus ntxhais tus ntsa yeej raug puastsuaj; nws twb muab hlua ntsuas tib zoo tas lawm; nws yeej tsis cheem nws txhais tes uas rhuav lub nroog ntawd. Tej chaw tsomfaj thiab tej ntsa yeej nimno twb vau tas ua ib pawg lawm.

⁹Tej roojvag puas tas vau rau hauv av, Nws muab tej nqaj roojvag tsoo tawg ua tej daim. Cov vajntxwv thiab cov nomtswv raug luag ntes coj mus lawm; Txoj kevcai los tsis muaj leejtwg qhia, Thiab tus TSWV tsis ua rau cov cev Vajtswv lus ua yogtoog pom li lawm.

¹⁰Yeluxalees cov neeg laus zaum tsaws hauv av tsis hais lus li; Lawv tsuab hmoov av rau saum lawv taubhau thiab muab ntaubtsaj los hnav. Cov ntxhais hluas nyo taubhau ti nkaus rau hauv av.

¹¹Kuv quaj heev thiaj ua rau kuv qhovmuag plooj tas; kuv tus plig ua mob ntsuav. Kuv tu siab heev ua rau kuv lub zog ntaug tas vim kuv haivneeg txojkev puastsuaj. Tej menyuam thiab cov menyuam mos ntog tsis nco qab tas rau ntawm tej kev hauv nroog.

¹²Cov menyuam ntawd quaj rau lawv niam hais tias, “Tshaib plab thiab nqhis dej kawg li;” Lawv ntog pawglug rau ntawm tej kev ua rau lawv tej nqaij to tas, Lawv siav yau zuj zus thiab tuag rau ntawm lawv niam lub xubntiag.

¹³Yeluxalees uas kuv hlub, kuv yuav hais li cas rau koj? Yuav ua li cas kuv thiaj rov nplig tau koj lub siab? Tsis tau muaj dua ib tug twg uas txomnyem npaum li no. Koj txojkev puastsuaj hnyav npaum nkaus li dej hiavtxwv; tsis muaj leejtwg pab tau.

¹⁴Koj cov cev Vajtswv lus tsis muaj dabtsi qhia rau koj lawm, tiamsis lawv dag xwb; Lawv tej lus qhuab qhia yeej nthuav tsis tau koj txojkev txhaum tawm. Lawv ua rau koj xav hais tias tsis tas koj hloov dua siab tshiab.

¹⁵Cov neeg dua kev ntawm lub nroog no saib tsis taus koj kiag li. Lawv co taubhau nto thiab luag lub nroog Yeluxalees uas puastsuaj tas lawm hais tias, “Ntawm no puas yog lub nroog uas zoo nkauj heev? Ntawm no puas yog txojkev zoo siab ntawm lub ntiajteb no?”

¹⁶Tagnrho koj cov yeebncuab puavleej saib tsis taus koj Thiab ua qhovmuag qaujles ntxub koj kawg nkaus li. Lawv zij ncaug thiab ntxi muag rau koj hais tias, “Peb ua rau nws puastsuaj lawm lauj! Hnub no yog hnub uas peb tos ntsoov xav pom heev ntag!”

¹⁷Thaum kawg tus TSWV tau ua raws li nws tau npaj tseg lawm; Nws ua rau peb puastsuaj tas tsis hlub tshua leejtwg, Raws li nws twb ceebtoom rau peb ua ntej ntev los lawm. Nws cia peb cov yeebncuab kovyeej peb, nws cia lawv zoo siab thaum peb ntog lawm.

¹⁸Yeluxalees, cia koj tej ntsa yeej quaj qw rau tus TSWV! Cia koj tej kua muag ntws tawm ib yam li tej dej tas hnub tas hmo; Cia li quaj thiab tu siab kom koj lub zog ntaug.

¹⁹Koj sawv tas los sawv dua los quaj thov tus TSWV ib hmos kaj ntug plaws; Cia li qhib koj lub siab thiab thov kom nws hlub tshua koj tej menyuam, Tej menyuam tuag tshaib pawglug ntawm tej ntug kev.

²⁰Tus TSWV, thov koj tsa qhovmuag ntsia cov neeg uas koj ua rau lawv raug kev txomnyem ntawd lauj! Cov pojniam tabtom noj tej menyuam uas lawv hlub heev! Cov povthawj thiab cov cev Vajtswv lus raug luag tua tuag rau hauv lub Tuamtsev.

²¹Tej laus thiab tej hluas los tuag pawglug rau ntawm tej kev ib yam nkaus, Cov tub hluas thiab ntxhais hluas raug yeebncuab muab ntaj tua tuag tas. Hnub uas koj chim koj muab lawv tua tuag pawglug tsis hlub tshua leejtwg li.

²²Koj caw kuv cov yeebncuab tuaj npaj Rooj noj rooj haus txaus ntshai heev nyob puagncig kuv. Thiab hnub uas koj chim yeej tsis muaj leejtwg khiav dim li. Lawv muab cov menyuam uas kuv tu hlob thiab kuv hlub tua povtseg tas.