Read Hmong Daw Nkauj Quaj Ntsuag 3 Bible Online

Nkauj Quaj Ntsuag 3 - Hmong Daw bible

Nkauj Quaj Ntsuag 3

¹Kuv yog ib tug uas paub hais tias qhov uas Vajtswv rau txim ntawd hnyav npaum li cas.

²Nws ntiab thiab coj kuv mus ti nkaus rau hauv qhov uas tob tshaj plaws thiab tsaus ntuj nti.

³Nws muab kuv ntaus tas los ntaus dua tsis hlub kuv hlo li.

⁴Nws ua rau kuv tej nqaij tej tawv ntuag rua ras thiab tsoo kuv tej pobtxha lov.

⁵Nws muab kuv kaw rau hauv txojkev txomnyem thiab lwj siab.

⁶Nws yuam kuv nyob hauv qhov chaw tsaus ntuj nti ib yam li cov neeg uas twb tuag tau ntev los lawm.

⁷Nws muab saw hlau khi kuv; kuv yog tus neeg raug txim uas tsis muaj kev cia siab hais tias yuav khiav dim li.

⁸Kuv tsa suab hlo quaj nrov nrov thov pab, Tiamsis Vajtswv tsis mloog kuv tej lus thov li.

⁹Kuv mus kev qaug poj qaug poog; Nws muab tej txiag zeb los ua ntsa loog thaiv kuv txhua txoj haukev.

¹⁰Tus TSWV tos kuv kev ib yam li tus dais; Nws dhia tuaj tom kuv ib yam li tus tsov ntxhuav.

¹¹Nws coj kuv mus rau tom ntug kev, Muab kuv dua ntuag ua tej daim, thiab tso kuv povtseg.

¹²Nws nta nws rab hneev thiab muab kuv cuab ua daim phiaj rau nws tua.

¹³Nws tua nws cov xub tuaj raug kuv mus tob heev rau hauv kuv lub nrog cev.

¹⁴Neeg luag kuv plig ib hnub tsaus ntuj; lawv muab kuv tso daj tso luag ua si.

¹⁵Tus TSWV muab txojkev txomnyem uas iab siab heev rau kuv noj thiab haus nkaus xwb.

¹⁶Nws muab kuv lub ntsejmuag coj mus txhuam rau hauv av thiab muab kuv cov hniav tsoo saum pobzeb lov tas.

¹⁷Kuv thiaj tsis nco txog kev noj qab nyob zoo, kev thajyeeb thiab kev zoo siab li lawm.

¹⁸Kuv txojsia nyob tsis ntev lawm; Kuv txojkev cia siab rau tus TSWV twb ploj tas lawm.

¹⁹Kuv xav txog txojkev lwj siab, kuv tsis muaj vajtse nyob, Mas yog tej tshuaj lom uas iab kawg nkaus li.

²⁰Kuv pheej xav txog txojkev lwj siab thiab kuv nyuaj siab kawg nkaus.

²¹Thaum kuv nco txog tej no ua rau kuv rov muaj kev cia siab.

²²Tus TSWV txojkev hlub uas ruaj khov thiab nws txojkev hlub tshua yeej muaj tsis paub kawg,

²³Txojkev hlub ntawd muaj txhua hnub, ib yam li lub hnub niaj tagkis tawm tuaj.

²⁴Kuv tsuas muaj tus TSWV tib leeg xwb, yog li ntawd kuv thiaj cia siab rau nws.

²⁵Tus TSWV yeej ua zoo rau txhua tus uas vamkhom nws,

²⁶Qhov uas zoo tshaj, yog ua lub siab ntev tos mus txog hnub uas nws los cawm peb,

²⁷Thiab qhov uas zoo tshaj, yog peb xyaum ua siab ntev thaum hluas los.

²⁸Thaum peb raug kev txomnyem, peb yuav tsum ua siab ntev zaum ntsiag to.

²⁹Tsimnyog peb txhos caug nyo ti nkaus hauv av, yog ua li ntawd tseem muaj kev cia siab.

³⁰Txawm yog raug ntaus thiab raug thuam los peb yeej zoo siab txais huv tibsi.

³¹Tus TSWV yog tus muaj kev hlub thiab nws yuav tsis tso peb tseg mus ibtxhis.

³²Txawm yog nws ua rau peb raug kev ntxhov siab los nws yeej hlub peb raws li nws txojkev hlub uas ruaj khov.

³³Tus TSWV yeej tsis muaj pluaj siab cia peb raug kev ntxhov siab lossis kev tsimtxom.

³⁴Thaum peb raug luag caij tsuj hauv tsev lojcuj los tus TSWV yeej paub;

³⁵Tus TSWV paub thaum peb tsis ua ncaj ncees li nws hais;

³⁶Thaum luag txiav txim tsis ncaj hauv tsev tu plaub los tus TSWV yeej paub.

³⁷Tsuas yog tej uas haum tus TSWV siab xwb thiaj li ua tau.

³⁸Kev zoo thiab kev phem los ib yam nkaus, Puavleej yog tus TSWV uas muaj hwjchim loj kawg nkaus hais thiaj li muaj.

³⁹Vim li cas peb pheej yws thaum peb raug txim, vim peb tej kev txhaum?

⁴⁰Cia peb tshuaj saib peb lub neej thiab tig rov los cuag tus TSWV.

⁴¹Cia peb qhib peb lub siab rau Vajtswv tus uas nyob saum ntuj thiab thov hais tias,

⁴²“Tus Tswv, peb tau ua txhaum thiab ntxeev siab rau koj lawm, koj tsis tau zam txim rau peb li.

⁴³“Koj caum peb thiab tua peb povtseg; koj txojkev chim roos koj txojkev hlub lawm,

⁴⁴Tauv huab uas yog koj txojkev npautaws tuab heev peb tej lus thov thiaj tuaj tsis txog koj.

⁴⁵Koj ua rau peb raug neeg ntiajteb saib zoo ib yam li tej khoom uas tsis muaj nqis.

⁴⁶“Peb cov yeebncuab txhua tus thuam peb thiab saib tsis taus peb.

⁴⁷Peb twb raug kev txomnyem thiab kev puastsuaj los lawm; Peb ua neej nyob tuav xovxeeb thiab ntshai kawg li.

⁴⁸Kuv kua muag ntws laws thaum kuv pom kuv haivneeg raug kev puastsuaj.

⁴⁹“Kuv cov kua muag yuav ntws los tsis paub tu ib yam li tus dej ntws,

⁵⁰Mus txog thaum tus TSWV tsa qhovmuag ntsia saum ntuj tuaj pom peb lawm.

⁵¹Thaum kuv pom tej xwmtxheej los raug cov pojniam uas nyob hauv lub nroog mas kuv tu siab kawg.

⁵²“Cov neeg uas ua yeebncuab rau kuv cia li lam ntxub kuv thiab cuab hlua mag kuv ib yam li noog mag tsig.

⁵³Lawv muab kuv pov ciaj rau hauv ib lub qhov thiab muab ib lub pobzeb npog lub ncauj qho.

⁵⁴Dej vov dhau plaws saum kuv taubhau, thiab kuv xav hais tias, “Kev tuag los ze lawm lauj.”

⁵⁵“Tus TSWV, kuv nyob puag hauv qab qho, kuv quaj thov koj,

⁵⁶Thiab thaum kuv thov kom koj mloog kuv tej lus thov, koj yeej hnov.

⁵⁷Koj teb kuv tej lus thov thiab hais kom kuv tsis txhob ntshai.

⁵⁸“Tus TSWV, koj twb tuaj tso kuv dim, thiab cawm tau kuv txojsia lawm.

⁵⁹Tus TSWV, koj twb pom tej uas luag ua tsis ncaj rau kuv lawm, thov koj txiav txim kom ncaj ncees rau kuv rooj plaub.

⁶⁰Koj yeej paub hais tias kuv cov yeebncuab ntxub kuv heev thiab tuavhauv tawmtsam kuv li cas.

⁶¹“Tus TSWV, koj yeej paub tej uas lawv tuavhauv ua phem rau kuv; Thiab koj yeej hnov tej lus uas lawv thuam kuv.

⁶²Lawv hais txog kuv thiab tuav tswvyim ua phem rau kuv ib hnub tsaus ntuj.

⁶³Lawv muab kuv tso daj tso luag thaum sawv ntxov mus txog thaum tsaus ntuj.

⁶⁴“Tus TSWV, thov koj rau txim rau lawv raws li tej uas lawv tau ua tas los lawm.

⁶⁵Thov koj foom phem rau lawv thiab tsis txhob pub kom lawv muaj kev cia siab hlo li.

⁶⁶Thov koj caum lawv thiab raws kom lawv khiav tawm hauv lub ntiajteb no mus tas dulug.”