Read Hmong Daw Nkauj Quaj Ntsuag 4 Bible Online

Nkauj Quaj Ntsuag 4 - Hmong Daw bible

Nkauj Quaj Ntsuag 4

¹Peb tej kub tsis ci lawm; tej pobzeb uas ua lub Tuamtsev pob poob pawglug rau hauv tej kev.

²Xi-oos cov tub hluas muaj nqis rau peb ib yam li tej kub, tiamsis nimno lawv muaj nqis ib yam li tej laujkaub av lawm xwb.

³Txawm yog tus maum hma los yeej pub mis rau nws tej menyuam noj; Tiamsis kuv haivneeg ua nruj ua tsiv rau lawv tej menyuam ib yam li tej noog ntxhuav.

⁴Lawv cia lawv tej menyuam tuag tshaib tuag nqhis tas; Tej menyuam mus thov zaub mov noj, tiamsis tsis muaj leejtwg muab ib yam dabtsi rau lawv li.

⁵Cov neeg uas ibtxwm tau noj tej zaub mov zoo Puavleej tuag tshaib tas rau ntawm tej kev; Cov neeg uas ibtxwm npluanuj yuav mus fawb zaub mov ntawm tej chaw pov liamsim noj.

⁶Kuv haivneeg raug txim hnyav tshaj cov neeg hauv lub nroog Xaudoos, tib npliag ntshis xwb, lawv twb raug kev puastsuaj tas rau Vajtswv txhais tes.

⁷Peb cov nomtswv huv tshaj tej daus thiab dawb dua kua mis, lawv nyob cus plaws thiab muaj zog khov kho tsis muaj mob li.

⁸Nimno lawv pw pawglug hauv tej kev tsis muaj neeg paub, Lawv tej ntsejmuag dub nciab vim twb tuag lawm; Lawv tej tawv qhuav ib yam li tawv ntoo qhwv nkaus lawv tej txha,

⁹Cov neeg uas tuag rau hauv tshavrog zoo tshaj cov uas yoo tshaib yoo nqhis tuag vim tsis muaj mov cawm lawv txojsia.

¹⁰Txojkev puastsuaj uas los raug kuv haivneeg mas txaus ntshai kawg; cov pojniam uas hlub lawv tej menyuam los cia li muab tej menyuam tua noj.

¹¹Tus TSWV tso nws txojkev chim uas loj kawg nkaus tawm tuaj; nws zes hluavtaws rau Xi-oos kub hnyiab tas rau hauv av.

¹²Cov vajntxwv uas nyob hauv ntiajteb no, lossis cov neeg uas nyob thoob qab ntuj, yeej tsis ntseeg hais tias yeebncuab thiab tubrog muaj cuabkav nkag tau lub nroog Yeluxalees tej roojvag li.

¹³Tiamsis muaj neeg nkag tau los, vim nws cov cev Vajtswv lus ua txhaum thiab nws cov povthawj lub txim thiaj ua rau cov neeg ncaj ncees tuag tas lawm.

¹⁴Yeluxalees cov thawjcoj ncig mus ncig los txhua txojkev li cov neeg digmuag, lawv ibce lo ntshav thoob plaws tsis muaj leejtwg kam kov lawv.

¹⁵Tej neeg qw rau lawv hais tias, “Nej cov neeg uas tsis huv! Cia li khiav mus! Tsis txhob tuav kuv!” Yog li ntawd, lawv thiaj khiav ib lub tebchaws mus rau ib lub tebchaws, tsis muaj leejtwg kam txais tos lawv hlo li.

¹⁶Tus TSWV yeej tsis mob siab txog lawv; nws thiaj muab lawv ntiab mus nyob ua sab ua sua. Nws yeej tsis xam txog peb cov povthawj thiab cov thawjcoj li lawm.

¹⁷Peb lub qhovmuag ntsia ntsoov mus txog thaum uas tsis muaj txojkev pab li lawm. Peb pheej tos kev pab ntawm ib haivneeg uas tsis muaj ib yam dabtsi pab peb.

¹⁸Yeebncuab yeej ntsia ntsoov peb; peb tsis muaj cuabkav tawm mus rau tom tej kev li; Peb lub sijhawm twb dhau; hnub kawg twb los txog lawm.

¹⁹Cov neeg uas caum ntes peb tseem khiav ceev tshaj tej dav uas rwg saum nruab ntug los. Lawv caum ntes peb saum tej ncov roob; Thaum peb tsis ceevfaj lawv ntes tau peb hauv tiaj suabpuam.

²⁰Lawv ntes tau peb lub hauvpaus txojsia, yog tus vajntxwv uas tus TSWV xaiv; yog tus uas peb cia siab hais tias yuav tiv thaiv tau peb ntawm txhua pab yeebncuab.

²¹Cov Edoos thiab cov Uxis nej cia li luag zoo siab. Kev puastsuaj yeej yuav los raug nej ib yam nkaus thiab; nej yuav vau zoj vau zis liabqab ploog txajmuag kawg li.

²²Xi-oos twb raug rau txim pauj nws lub txim txaus lawm; tus TSWV yuav tsis cia peb raug luag ntes coj mus ib zaug ntxiv lawm. Tiamsis Edoos, tus TSWV yuav rau txim rau koj; nws yuav nthuav tej kev txhaum uas koj ua ntawd tawm huv tibsi.