Read Hmong Daw Nkauj Quaj Ntsuag 5 Bible Online

Nkauj Quaj Ntsuag 5 - Hmong Daw bible

Nkauj Quaj Ntsuag 5

¹Tus TSWV, thov koj nco txog tej xwm uas tau los raug peb ntawd. Thov koj tsa qhovmuag ntsia peb thiab peb tej kev txajmuag.

²Peb tej liaj tej teb poob rau lwm haivneeg tes lawm; cov neeg txawv tebchaws tuaj nyob hauv peb tej vajtse tas lawm.

³Cov uas yog peb txiv raug yeebncuab muab tua tuag tas huv tibsi, thiab nimno tshuav cov uas yog peb niam ua pojntsuam nyob lawm xwb.

⁴Peb yuav tau them nyiaj rau tej dej uas peb haus; peb yuav tau muab nyiaj muas ntoo los rau peb ua taws rauv.

⁵Luag raws thiab nplawm peb ib yam li nplawm tej neesluav lossis tej ntxhuav; Peb sab kawg nkaus, tiamsis luag tsis pub peb so li.

⁶Peb mus thov nram tebchaws Iziv thiab pem tebchaws Axilias, peb thiaj muaj zaub mov txaus noj yug peb txojsia.

⁷Peb cov yawgkoob yeej ua txhaum tiag, tiamsis lawv twb tuag tas lawm; peb raug kev txomnyem vim peb tau ris lawv tej kev txhaum.

⁸Peb raug cov neeg uas twb tsimtxiaj tsis npaum li cov qhev tuaj tswjhwm peb, thiab tsis muaj leejtwg pab kom peb dim ntawm lawv txhais tes.

⁹Cov neeg tua neeg nyob thoob plaws tom tej ntug nroog; Thaum peb mus nrhiav zaub mov noj, peb pheej hmoo tuav siav rawv mus xwb.

¹⁰Kev tshaib plab ua rau peb ua npaws ibce kub lug ib yam li lub qhovcub.

¹¹Peb cov pojniam puavleej raug luag mos saum Roob Xi-oos; peb cov ntxhais los raug luag yuam hauv cov Yudas tej zos.

¹²Peb cov thawjcoj raug luag ntes coj mus dai cajdab tuag tas; tsis muaj leejtwg hwm peb cov neeg laus hlo li lawm.

¹³Peb cov tub hluas raug luag yuam mus zom nplej ib yam li tej qhev; cov menyuam tub raug luag yuam mus kwv ntoo hnyav heev ntog pujpoog.

¹⁴Tsis muaj cov laus tuaj zaum ntawm tej roojvag nroog, thiab tsis muaj cov hluas tuaj ntaus suab nkauj li lawm.

¹⁵Txojkev zoo siab khiav tawm ntawm peb lub neej mus lawm; Txojkev quaj ntsuag los hloov peb tej kev seevcev zoo siab chaw.

¹⁶Txhua yam uas peb khav yeej tsis muaj dabtsi li lawm. Peb ua txhaum, nimno peb thiaj raug kev puastsuaj.

¹⁷Vim li ntawd peb lub siab thiaj mob lwj ntsuav thiab peb pom kev tsis tseeb vim peb tej kua muag los tas,

¹⁸Lub Roob Xi-oos nyob kho siab khuav thiab ua suabpuam tas, thiab hma los khawb los ntaug ua rau puastsuaj tas.

¹⁹Tiamsis tus TSWV, koj yog tus vajntxwv uas nyob mus ibtxhis thiab yuav tswj teb kav chaw mus txog thaum lub sijhawm kawg.

²⁰Vim li cas koj thiaj tso peb tseg ntev ua luaj li? Koj puas tseem nco txog peb ntxiv lawm thiab?

²¹Tus TSWV, thov coj peb rov qab los cuag koj! Thov coj peb rov qab! Thov rov qab txhim kho kom peb muaj koob meej li thaum ub.

²²Lossis koj yeej muab peb tso tseg mus ibtxhis li lawm? Puas yog koj txojkev chim yeej tsis muaj hnub kawg li?