Read Hmong Daw Exekees 1 Bible Online

Exekees 1 - Hmong Daw bible

Exekees 1

¹Lub plaub hlis ntuj hnub xiab tsib, xyoo peb caug kuv yog Npuxis tus tub Exekees uas ua povthawj, kuv tau nrog cov Yudas uas raug ntes coj mus nyob rau ntawm tus Dej Khenpales hauv lub nroog Npanpiloos. Ntuj txawm qhib, ces kuv ua yogtoog pom Vajtswv los qhia rau kuv. (

²Yog xyoo tsib uas Vajntxwv Yehauyakhees raug luag ntes coj mus).

³Thaum kuv nyob hauv lub nroog Npanpiloos uas nyob ntawm tus ntug dej Khenpales, tus TSWV los hais rau kuv thiab nws lub hwjchim los kav hlo kuv.

⁴Kuv tsa muag ntsia rau saud, kuv pom muaj nagxob nagcua los sab qaumteb los. Muaj xob laim ci liab pesvog hauv ib tauv huab loj loj tuaj, thiab lub ntuj uas nyob puagncig tauv huab ntawd los ci ntsa iab. Nyob rau hauv qhov uas xob laim ci liab pesvog ntawd, muaj ib yam ci zoo li tooj dag.

⁵Nyob rau hauv cov nagxob nagcua ntawd, kuv pom plaub tug qhelunpees zoo ib yam li neeg,

⁶tiamsis ib tug qhelunpees twg muaj plaub lub ntsejmuag thiab plaub phab tis.

⁷Lawv tej tes taw yiaglees, thiab muaj rau zoo ib yam li rau nyuj. Lawv ci ib yam li tej tooj dag uas luag muab txhuam tau lawm.

⁸Dua li ntawd, ib tug qhelunpees twg muaj plaub txhais tes zoo li tes neeg, ib txhais tes nyob hauv qab ib phab tis. Thiab cov qhelunpees ntawd, lawv cov ntsejmuag thiab koojtis zoo li no:

⁹txhua tus qhelunpees nthuav tis tuaj sib twb ua ib lub vojvoog plaub ceg kaum. Thaum lawv mus kev, lawv mus ua ib pab tsis tig li.

¹⁰Cov qhelunpees ntawd, txhua tus muaj plaub lub ntsejmuag uas zoo tsis sib thooj. Lub ntsejmuag uas zoo li neeg nyob tom hauv ntej, lub ntsejmuag uas zoo li tsov ntxhuav nyob sab xis, lub ntsejmuag uas zoo li tus heev nyuj nyob sab laug, thiab lub ntsejmuag uas zoo li tus dav nyob tom qab.

¹¹Ib tug qhelunpees twg nthuav ob phab tis tsa rau saud, tus tom qab nthuav tis mus twb tus tom ntej phab tis, thiab muaj dua ob phab tis dauv npog lub cev.

¹²Txhua tus qhelunpees twg muaj plaub lub ntsejmuag rau plaub sab. Cov qhelunpees ntawd yuav mus rau sab twg los yeej mus tau raws li lawv xav tsis tas yuav tig cev li.

¹³Nyob hauv cov qhelunpees, muaj dua ib yam zoo li ib teg tsau uas cig lam lug mus mus los los. Cov nplaim taws ntawd ya tej ntshuas liab pesvog ib yam li xob laim tawm tuaj.

¹⁴Cov qhelunpees ntawd txav mus mus los los ceev cuag xob laim.

¹⁵Thaum kuv tseem ntsia ntsoov plaub tug qhelunpees ntawd, kuv pom ib tug qhelunpees twg muaj ib lub log nyob ntawm ib sab, cov log ntawd puavleej chwv av.

¹⁶Plaub lub log ntawd zoo ib yam nkaus; cov log ntawd ci ib yam li tej qe zeb muaj nqis; thiab ib lub log twg tseem muaj dua ib lub log uas nyob rau ntawm ces kaum sab xis,

¹⁷cov log ntawd thiaj ntog tau mus rau txhua phab.

¹⁸Muaj qhovmuag nyob thoob plaws cov log ntawd tej npoo.

¹⁹Thaum twg cov qhelunpees ntawd mus kev, ces cov log ntawd txawm ntog nrog mus thiab, yog cov qhelunpees ntawd ya mus siab, ces cov log ntawd nqa siab thiab.

²⁰Cov qhelunpees ntawd xav mus qhov twg los lawv yeej mus tau, thiab cov log ntog raws li cov qhelunpees ntawd, rau qhov cov qhelunpees yog cov uas tswj cov log ntawd.

²¹Thaum twg cov qhelunpees ntawd mus kev, nres lossis ya siab rau saum nruab ntug, cov log yeej mus raws nraim li cov qhelunpees ntawd.

²²Nyob ntawm cov qhelunpees taubhau rau saud, muaj ib yam nthuav zoo li lub tsev kheej uas muab cov qe zeb muaj nqis ci ci ua.

²³Cov qhelunpees ntawd sawv hauv qab qhov uas zoo li lub tsev kheej ntawd, lawv nthuav tis ib tug twb ib tug, thiab muab ob phab tis nthuav npog lub cev.

²⁴Thaum cov qhelunpees ntawd ya, kuv hnov lawv ntxuaj tis nrov ib yam li dej hiavtxwv ntas, thiab ib yam li pab tubrog coob coob mus kev lossis ib yam li Vajtswv tus uas muaj Hwjchim Loj kawg nkaus lub suab. Thaum lawv tsaws, lawv qhaws nkaus lawv tej tis,

²⁵tiamsis tseem muaj ib lub suab nrov saum qhov uas zoo li lub tsev kheej uas nyob saum cov qhelunpees ntawd taubhau tuaj.

²⁶Nyob saum qhov uas zoo li lub tsev ntawd muaj ib qho zoo li lub zwmtxwv uas yog muab cov qe zeb xafiles ua, thiab tus uas zaum saum lub zwmtxwv ntawd, muaj tus yam ntxwv zoo li neeg.

²⁷Tus yam ntxwv ntawd ci ib yam li tej tooj dag uas muab hlawv rau hauv qhovcub. Muaj nplaim taws cig lam lug puagncig tus yam ntxwv ntawd,

²⁸thiab nyob hauv cov nplaim taws ntawd, muaj ib yam xim zoo li tus duab zaj. Qhov ntawd yog tus TSWV lub tshwjchim uas ci ntsa iab nyob ntawm nws xubntiag. Thaum kuv pom dheev li ntawd, ces kuv nyo ntshis ti nkaus rau hauv av, kuv hnov ib lub suab