Read Hmong Daw Exekees 13 Bible Online

Exekees 13 - Hmong Daw bible

Exekees 13

¹Tus TSWV hais rau kuv hais tias,

²“Tub noobneej, koj cia li cem cov Yixalayees cov cev Vajtswv lus uas pheej cev Vajtswv lus raws li lawv xav xwb. Koj hais kom lawv cia li mloog tus TSWV tej lus.”

³Tus TSWV uas kav ib puas tsav yam hais tias, “Cov cev Vajtswv lus uas ruam yuav raug puastsuaj! Lawv hais raws li lawv xav xwb, lawv tsis tau ua yogtoog pom dabtsi li.

⁴Cov Yixalayees, nej cov cev Vajtswv lus tsis muaj nqis ib yam li tej hma uas nyob hauv lub nroog uas pob puas tas lawm.

⁵Lawv tsis zov tej qhov uas sab phabntsa vau lawm lossis lawv tsis kho sab phabntsa ntawd. Yog li ntawd, hnub uas tus TSWV los thiab muaj kev tsov kev rog tuaj, cov Yixalayees yuav tiv tsis tau.

⁶Tej zaj yogtoog uas lawv ua yog cuav thiab tej lus qhia tshwm uas lawv hais yog lus dag xwb. Lawv dag hais tias yog lawv cev kuv tej lus, tiamsis kuv tsis tau txib lawv mus. Tsis tas li ntawd xwb, lawv tseem xav kom tej lus uas lawv hais yog lus tseeb!

⁷Kuv qhia rau lawv hais tias, tej zaj yogtoog uas nej pom yog cuav thiab tej lus qhia tshwm uas nej hais yog lus dag. Nej hais tias yog nej hais kuv cov lus, tiamsis kuv tsis tau hais rau nej!”

⁸Tus TSWV uas kav ib puas tsav yam hais rau lawv hais tias, “Nej tej lus yog lus cuav thiab tej zaj yogtoog uas nej pom yog dag xwb. Kuv yog tus uas tawmtsam nej ntag.

⁹Kuv yuav rau txim rau nej cov uas cev Vajtswv lus cuav thiab hais tej lus qhia tshwm uas ua rau neeg yuam kev. Thaum kuv haivneeg tuaj sib sau sablaj ua ke, nej yuav tsis tau koom nrog lawv; nej tej npe yuav tsis muaj nyob hauv phau ntawv uas teev cov Yixalayees tej npe; nej yuav tsis tau rov los rau hauv nej lub tebchaws. Ces nej thiaj yuav paub hais tias kuv yog tus TSWV uas kav ib puas tsav yam.

¹⁰“Cov cev Vajtswv lus uas ua rau kuv haivneeg yuam kev hais tias cia li tso siab tsis muaj dabtsi. Tiamsis tsis yog li ntawd! Kuv haivneeg puab tau tus ntsa yeej lawm, ces cov cev Vajtswv lus mam coj hmoov sib tuaj leem rau.

¹¹Koj hais rau cov cev Vajtswv lus ntawd hais tias lawv tus ntsa yeej yuav pob puas tas. Kuv yuav tso nag thiab tso lawg hlob heev los ntaus thiab cua daj cua dub yuav ntsawj tus ntsa yeej ntawd.

¹²Tus ntsa yeej ntawd yuav pob, ces txhua tus yuav nug koj hais tias cov hmoov sib uas leem tus ntsa yeej dua twg tas lawm?”

¹³Tus TSWV uas kav ib puas tsav yam hais tias, “Kuv chim, kuv thiaj tso cua daj cua dub, tso nag thiab lawg los ntaus lawv tus ntsa yeej.

¹⁴Kuv txhob txwm rhuav tus ntsa yeej uas lawv muab hmoov sib leem kom tawg tas, tshuav tus taw ntsa lawm xwb. Tus ntsa yeej yuav vau los ntaus nej tuag tas. Ces txhua tus thiaj yuav paub hais tias kuv yog tus TSWV.

¹⁵“Tus ntsa yeej thiab cov neeg uas muab hmoov sib leem tus ntsa yeej yuav raug kuv txojkev chim uas loj kawg nkaus. Ces kuv yuav qhia rau koj hais tias tus ntsa yeej thiab cov neeg uas muab hmoov sib leem tus ntsa yeej twb ploj tas lawm,

¹⁶cov cev Vajtswv lus ntawd, yog cov uas hais rau lub nroog Yeluxalees kom cia li tso siab thaum uas tsis muaj kev tso siab!” Tus TSWV uas kav ib puas tsav yam yog tus hais li ntawd.

¹⁷Tus TSWV hais tias, “Tub noobneej, nimno koj tsa qhovmuag ntsia koj haivneeg cov pojniam uas pheej hais tej lus qhia tshwm. Koj cia li cem lawv

¹⁸thiab qhia tus TSWV uas kav ib puas tsav yam tej lus rau lawv hais tias, “Cov pojniam ko yuav raug puastsuaj! Nej xaws tej pluaj ntaub rau txhua tus coj ntawm dabteg thiab ntos phuam rau txhua tus ntoo saum taubhau kom lawv muaj hwjchim tswj lwm tus lub neej. Nej xav tau lub hwjchim uas tswj kuv haivneeg txojsia thiab txojkev tuag mus siv kom muaj nqi rau nej.

¹⁹Nej ua saib tsis taus kuv tabmeeg kuv haivneeg kom nej tau ob peb phoovtes hmoov nplej thiab tau ob peb lub ncuav. Nej tua tej neeg uas tsis tsimnyog tuag, tiamsis nej tseg cov neeg uas tsimnyog tuag cia. Nej ua li ntawd kom dag tau kuv haivneeg ntseeg nej.”

²⁰Tus TSWV uas kav ib puas tsav yam hais li no: “Kuv ntxub tej pluaj ntaub uas nej coj ntawm dabteg uas nej siv tswj kuv haivneeg txojsia thiab txojkev tuag. Kuv yuav chua tej ntawd ntawm nej tes mus thiab tso cov neeg uas raug nej tswjhwm kom dim.

²¹Kuv yuav chua nej tej phuam povtseg thiab tso kuv haivneeg kom dim ntawm nej lub hwjchim. Ces nej yuav paub hais tias kuv yog tus TSWV.

²²“Nej tej lus dag ua rau cov neeg ncaj ncees uas kuv tsis xav kom raug mob qaug zog kawg li. Nej tav kev tsis pub cov neeg ua phem tso lawv tej kev phem kev qias tseg kom lawv thiaj tau txojsia.

²³Nimno nej tej zaj yogtoog cuav thiab tej lus qhia tshwm ua rau neeg yuam kev tsis muaj lawm. Kuv cawm kuv haivneeg dim ntawm nej lub hwjchim lawm, nej thiaj yuav paub hais tias kuv yog tus TSWV.”