Read Hmong Daw Exekees 19 Bible Online

Exekees 19 - Hmong Daw bible

Exekees 19

¹Tus TSWV hais kom kuv hu zaj nkauj quaj ntsuag no rau cov Yixalayees ob tug nom:

²Neb niam zoo ib yam li tus maum tsov ntxhuav! Nws tu nws cov menyuam loj hlob nrog cov txiv tsov ntxhuav uas tsiv heev.

³Nws tu tus menyuam ntawd thiab qhia kom txawj mus nrhiav noj; nws thiaj ua ib tug tsiaj uas noj neeg.

⁴Ntau haivneeg hnov nws lub moo thiab khawb qhov tos nws kev. Luag muab nqelauj nqe nws cab mus rau nram tebchaws Iziv lawm.

⁵Thaum nws pom hais tias qhov uas nws niaj hnub tos tsis muaj qabhau, nws tas kev cia siab. Nws tu dua ib tug menyuam, tus ntawd loj hlob ua ib tug tsov ntxhuav tsiv heev.

⁶Thaum nws loj hlob tiav ib tug txiv tsov ntxhuav lawm, nws nrog lwm cov tsov ntxhuav mus nrhiav tom tsiaj. Nws xyaum mus noj tsiaj thiab ua ib tug tsiaj uas noj neeg.

⁷Nws tsoo luag tej chaw fajxwm, thiab rhuav luag tej nroog puas tas. Txhua zaus uas nws nyooj ua rau cov neeg hauv lub tebchaws ntawd ntshai heev.

⁸Ntau haivneeg sib sau ua ke tuaj tua nws; muaj neeg coob heev tuaj txhua qhov chaw tuaj. Lawv nthuav lawv tej vas khwb thiab ntes tau nws.

⁹Lawv muab nws kaw rau hauv ib lub nkuaj, thiab coj nws mus cuag cov Npanpiloos tus vajntxwv. Lawv tso neeg zov rawv nws tsis pub nws nyooj, kom tsis hnov nws lub suab nyooj saum tej roob uas nyob hauv tebchaws Yixalayees lawm.

¹⁰Neb niam zoo ib yam li tsob txiv hmab uas cog ze rau ntawm ntug dej. Nyob qhov ntawd muaj dej nplua mias, tsob txiv hmab muaj nplooj tsaus nti thiab txi txiv ncw heev.

¹¹Tsob txiv hmab tej ceg khov heev thiab ua tau vajntxwv tej cwj. Tsob txiv hmab siab heev mus nto plaws saum cov huab; txhua tus pom tsob txiv hmab ntawd muaj nplooj ntau thiab siab heev.

¹²Tiamsis txawm muaj neeg limhiam muab nws dob povtseg. Cov cua sab hnubtuaj ntsawj ua rau nws cov txiv qhuav. Nws tej ceg ntshua tas; thiab luag muab tej ceg qhuav coj mus hlawv povtseg.

¹³Nimno luag muab nws coj mus cog rau tom tiaj suabpuam ntawm thaj av uas tsis muaj dej.

¹⁴Tiamsis hluavtaws cia li cig saum tej ntsis txiv hmab, kub tej ceg thiab tej txiv tas dulug. Cov ceg ntawd tsis khov thiab tsis tau ua vajntxwv tej cwj lawm. Ntawm no yog zaj nkauj quaj ntsuag uas luag hu tas rov hu dua.