Read Hmong Daw Exekees 21 Bible Online

Exekees 21 - Hmong Daw bible

Exekees 21

¹Tus TSWV hais rau kuv hais tias,

²“Tub noobneej, koj cia li cev kuv tej lus cem lub nroog Yeluxalees thiab foom phem rau tej chaw uas neeg pe mlom. Koj hais rau cov Yixalayees lub tebchaws hais tias

³kuv yog tus TSWV uas kav ib puas tsav yam, kuv hais li no: Kuv yog nej tus yeebncuab! Kuv yuav rho kuv rab ntaj tua nej txhua tus, tsis hais tus ua zoo lossis tus ua phem.

⁴Kuv yuav siv kuv nrab ntaj tawmtsam txhua tus pib sab qaumteb mus ti nkaus sab qabteb.

⁵Txhua tus yuav paub hais tias kuv yog tus TSWV, kuv rho kuv nrab ntaj lawm mas kuv yuav tsis muab ntsaws rau hauv hnab hlo li.

⁶“Tub noobneej, koj cia li quaj li tus neeg uas tas kev cia siab lawm. Koj quaj li ntawd tabmeeg sawvdaws.

⁷Thaum lawv nug koj hais tias, ‘Vim li cas koj quaj li ntawd?’ Koj teb lawv hais tias vim lawv yuav hnov xov tsis zoo. Thaum lawv hnov tej xov ntawd lawv yuav ntshai kawg nkaus, lawv tej npab yuav tsaug leeg, lawv lub zog yuav ntaug thiab lawv tej hauvcaug yuav tshee hnyo. Lub sijhawm twb los txog lawm; tej no yeej yuav tshwmsim.” Tus TSWV uas kav ib puas tsav yam hais li ntawd.

⁸Tus TSWV hais rau kuv hais tias,

⁹“Tub noobneej, koj cia li cev tus TSWV uas kav ib puas tsav yam tej lus rau lawv li no: Muaj ib rab ntaj, rab ntaj ntawd luag twb hov tau ntse thiab txhuam ci nplas lawm.

¹⁰Luag hov rab ntaj ntawd tua neeg thiab txhuam ci nplas cuag xob laim. Yuav tsis muaj kev kaj siab rau kuv haivneeg uas tsis mloog kuv tej lus thiab tsis quavntsej kuv tej kev rau txim.

¹¹Luag txhuam rab ntaj ci nplas npaj cia siv lawm xwb. Luag hov thiab txhuam raj ntaj ci nplas coj mus cob rau tus neeg tua neeg txhais tes.

¹²Tub noobneej, koj cia li quaj tu siab; rau qhov rab ntaj ntawd yuav tua kuv haivneeg thiab tua tagnrho cov Yixalayees tej thawjcoj huv tibsi. Lawv yuav raug tua tuag tas nrog kuv haivneeg. Cia li ntaus koj hauvsiab vim tsis muaj kev cia siab lawm!

¹³Kuv tabtom sim kuv haivneeg; yog lawv tsis kam hloov siab, tej uas kuv hais ntawd yuav los raug lawv.

¹⁴“Tub noobneej, koj cia li cev Vajtswv lus. Koj cia li npuaj teg, ces rab ntaj yuav txiav mus txiav los; rab ntaj ntawd yog rab ntaj tua neeg uas txaus ntshai heev thiab yog rab ntaj uas txov neeg txojsia.

¹⁵Rab ntaj ntawd yuav ua rau kuv haivneeg zog ntaug thiab ntog. Kuv yuav muab kuv rab ntaj uas cia tua neeg hov ci nplas cuag xob laim hem lawv hauv lub nroog.

¹⁶Rab ntaj uas ntse heev, koj cia li txiav mus rau sab xis thiab sab laug! Koj cia li txiav mus rau txhua phab.

¹⁷Kuv los yuav npuaj teg, thiab kuv txojkev chim yuav ntaug. Kuv yog tus TSWV uas hais li ntawd.”

¹⁸Tus TSWV hais rau kuv hais tias,

¹⁹“Tub noobneej, koj cia li tshuam phiaj rau ntawm ob txojkev uas vajntxwv Npanpiloos yuav coj nws rab ntaj tuaj. Ob txojkev ntawd tuaj hauv ib lub tebchaws tuaj. Koj tshuam daim phiaj rau ntawm ob txojkev tshuam uas mus rau hauv lub nroog.

²⁰Tshuam ib daim phiaj qhia vajntxwv kev mus rau hauv cov Amoos lub nroog Lanpas thiab ib daim qhia kev mus rau hauv lub nroog Yeluxalees uas muaj chaw fajxwm ruaj khov hauv tebchaws Yudas.

²¹Tus vajntxwv uas kav tebchaws Npanpiloos tuaj sawv ntawm ob daim phiaj ntawm kev tshuam; nws tsis paub hais tias yuav mus txojkev twg, ces nws muab tej xub hneevnti co; nws tuavxam nrog nws tej mlom thiab saib tus tsiaj uas tua ua khoom fij lub siab.

²²Vajntxwv sab tes xis tuav rawv ib tus vos sau hais tias lub nroog ‘Yeluxalees’! Tus vos ntawd qhia rau vajntxwv kom cia li qw ntaus rog, tsoo tej roojvag, khawb av puab ntswg, thiab khawb kwj ncig lub nroog.

²³Cov neeg hauv Yeluxalees yuav tsis ntseeg tej no, rau qhov lawv tau coglus tseg lawm. Tiamsis tej lus qhia tshwm ntawd yog qhia lawv tej kev txhaum thiab ceebtoom rau lawv paub hais tias lawv yuav raug ntes.

²⁴Tom qab ntawd tus TSWV uas kav ib puas tsav yam hais rau lawv li no: Nej tej kev txhaum twb tshwm rau sawvdaws pom lawm. Txhua tus pom hais tias nej tau ua txhaum loj heev. Txhua yam uas nej ua qhia rau sawvdaws paub hais tias nej ua txhaum. Txog sijhawm rau txim rau nej lawm, kuv yuav muab nej cob rau nej cov yeebncuab.

²⁵“Cov Yixalayees tej thawjcoj uas ua phem thiab tsis dawbhuv, hnub uas rau txim zaum kawg rau nej twb los txog lawm.

²⁶Kuv yog tus TSWV uas kav ib puas tsav yam, tej lus no yog kuv hais. Cia li hle nej tej kausmom kub thiab hle pluaj ntaub uas khi nej taubhau tseg. Yuav tsis zoo li qub lawm. Yuav tsa cov neeg pluag kom muaj hwjchim! Thiab yuav txo cov thawjtswj kom poob hwjchim!

²⁷Puastsuaj, puastsuaj! Kuv yuav ua kom lub nroog puastsuaj. Tiamsis tej xwm no yuav tsis tau muaj mus txog thaum tus uas kuv xaiv los rau txim rau lub nroog los txog. Kuv yuav muab lub nroog cob rau tus ntawd.

²⁸“Tub noobneej, koj cia li cev tus TSWV uas kav ib puas tsav yam tej lus rau cov Amoos uas txob thuam cov Yixalayees li no: ‘Npaj rab ntaj txhij lawm; luag txhuam rab ntaj ntawd ci nplas cuag xob laim cia tua neeg lawm xwb.

²⁹Tej yogtoog cuav uas nej pom thiab tej lus qhia tshwm uas nej hais yog lus dag xwb. Nej ua kev phem kev qias, hnub uas rau txim zaum kawg rau nej los txog lawm. Rab ntaj yuav los txiav nej cajdab.

³⁰“ ‘Cia li ntsaws rab ntaj rau hauv hnab! Kuv yuav txiav txim rau nej ntawm thaj chaw uas kuv tsim nej thiab hauv lub tebchaws uas yug nej.

³¹Kuv yuav ua kom nej raug kuv txojkev chim uas cig li nplaim taws. Thiab kuv yuav muab nej cob rau cov neeg nruj tsiv uas muaj cuabkav ua kom nej raug kev puastsuaj.

³²Nej yuav raug hluavtaws hlawv kom kub hnyiab tas. Nej cov ntshav yuav nrog rau hauv nej lub tebchaws, thiab yuav tsis muaj leejtwg nco txog nej lawm.’ ” Tus TSWV hais li ntawd.