Read Hmong Daw Exekees 22 Bible Online

Exekees 22 - Hmong Daw bible

Exekees 22

¹Tus TSWV hais rau kuv hais tias,

²“Tub noobneej, koj npaj txiav txim rau lub nroog Yeluxalees uas tua neeg lawm los? Koj cia li qhia kom nws paub tej kev phem kev qias uas nws tau ua lawm.

³Kuv yog tus TSWV uas kav ib puas tsav yam, koj cia li qhia kuv tej lus rau lub nroog hais tias, ‘Vim koj tau tua koj cov neeg ntau tus thiab pe mlom ua rau koj tsis huv, koj lub sijhawm kawg twb los txog lawm.

⁴Qhov uas koj tua neeg ua rau koj muaj txim thiab qhov uas kom pe mlom ua rau koj tsis huv. Koj hnub kawg los txog, thiab koj lub sijhawm twb tas lawm! Kuv thiaj cia lwm haivneeg txob thuam thiab saib tsis tau koj.

⁵Tej tebchaws nyob deb thiab nyob ze los saib tsis taus koj, rau qhov koj tsis ua raws li kuv tej kevcai.

⁶Yixalayees cov thawjcoj tso siab rau lawv lub zog thiab lawv tua neeg.

⁷Cov neeg uas nyob hauv koj, tsis muaj ib tug hwm niam hwm txiv li. Koj dag ntxias cov neeg txawv tebchaws, txhav cov pojntsuam thiab tej menyuam ntsuag tug.

⁸Koj tsis hwm kuv tej chaw dawbhuv thiab saib hnub Xanpataus tsis tseemceeb.

⁹Koj cov neeg muaj qee leej dag kom luag muab lwm tus tua povtseg. Qee leej noj tej khoom uas fij rau mlom, thiab qee leej ua kev nkauj kev nraug.

¹⁰Qee leej nrog nws txiv tus niam tshiab pw. Qee leej yuam tej pojniam thaum uas tseem coj khaubncaws.

¹¹Qee leej ua kev nkauj kev nraug, thiab qee leej deev nws tus nyab lossis nws tus muam uas tsis koom niam.

¹²Koj cov neeg qee leej cia luag ntiav nws mus tua neeg. Qee leej qiv nyiaj thiab tsub pajlaum ntau rau nws cov kwvtij Yixalayees them; nws npluanuj vim txeeb luag tug. Lawv cov ntawd tsis nco txog kuv lawm.” Tus TSWV uas kav ib puas tsav yam hais li ntawd.

¹³“ ‘Kuv yuav tsa kuv txhais tes ntaus koj cov neeg uas ua tubsab thiab tua neeg.

¹⁴Tom qab uas kuv rau txim rau koj lawm, koj xav hais tias leejtwg tseem muaj zog thiab tsa taus npab? Kuv yog tus TSWV uas hais tej lus no, kuv yuav ua raws li kuv hais.

¹⁵Kuv yuav ntiab nej khiav mus nyob rau ntau lub tebchaws thiab nyob xyaw lwm haivneeg, thiab yuav ua kom nej tej kev phem kev qias ploj mus.

¹⁶Thiab luag lwm haivneeg yuav tsis hwm nej, nej thiaj yuav paub hais tias kuv yog tus TSWV.’ ”

¹⁷Tus TSWV hais rau kuv hais tias,

¹⁸“Tub noobneej, cov Yixalayees tsis muaj nqis rau kuv lawm. Lawv zoo ib yam li tej quav tooj liab, tooj dawb, hlau, txhuas thiab nyiaj uas luag cais tawm hauv yeejvub los lawm xwb.

¹⁹Yog li ntawd, kuv yog tus TSWV uas kav ib puas tsav yam hais tias lawv muaj nqis li tej ntawd lawm xwb. Kuv yuav coj lawv ua ke los rau hauv lub nroog Yeluxalees

²⁰ib yam li tus neeg uas muab nyiaj, tooj liab, hlau, txhuas thiab tooj dawb los tso rau hauv lub yeejvub. Kuv txojkev chim yuav kub kom lawv yaj tas ib yam li hluavtaws kub tej ntawd.

²¹Kuv yuav sau lawv los nyob rau hauv lub nroog Yeluxalees; kuv txojkev chim yuav ua cubtawg hlawv kom lawv yaj tas.

²²Lawv yuav raug tus TSWV txojkev chim uas loj kawg nkaus; lawv yuav yaj tas rau hauv lub nroog Yeluxalees ib yam li tej nyiaj uas yaj rau hauv lub yeejvub.”

²³Tus TSWV rov hais rau kuv hais tias,

²⁴“Tub noobneej, koj hais rau cov Yixalayees hais tias lawv lub tebchaws tsis huv lawm. Kuv yuav rau txim rau lawv los ntawm kuv txojkev chim.

²⁵Cov thawjcoj ntawd zoo ib yam li cov tsov ntxhuav uas nyooj laws rau tej tsiaj uas lawv tom tau. Lawv tua neeg, huab luag tej nyiaj thiab tej khoom uas muaj nqis, thiab lawv tua neeg ua rau muaj pojntsuam coob heev.

²⁶Cov povthawj rhuav kuv txoj kevcai thiab ua rau kuv tej khoom dawbhuv tsis huv lawm. Lawv tsis cais hais tias yam twg dawbhuv thiab yam twg tsis dawbhuv. Lawv tsis qhia qhov txawv ntawm yam uas huv thiab yam uas tsis huv rau sawvdaws paub, thiab lawv saib hnub Xanpataus tsis tseemceeb. Qhov tseemceeb yog cov Yixalayees tsis hwm kuv.

²⁷Cov nomtswv zoo ib yam li tej hma uas muab tej tsiaj uas lawv tom tau dua ib thooj rau ib qho. Lawv tua neeg ua kom lawv muaj txiag npluanuj.

²⁸Cov cev Vajtswv lus muab kev txhaum npog tseg ib yam li neeg muab hmoov sib dawb pleev phabntsa. Lawv pom tej yogtoog cuav thiab piav tej lus qhia tshwm tsis tseeb. Lawv khav hais tias yog lawv hais tus TSWV uas kav ib puas tsav yam tej lus, tiamsis kuv uas yog tus TSWV tsis tau hais rau lawv li.

²⁹Cov neeg npluanuj huab thiab nyiag luag li. Lawv quab yuam cov neeg pluag thiab txhav cov neeg txawv tebchaws tug.

³⁰Kuv nrhiav lawv cov ntawd ib tug uas txawj kho phabntsa thiab sawv nres nroos ntawm sab phabntsa uas puas lawm, tiv thaiv lub tebchaws kom kuv txojkev chim tsis txhob rhuav lub tebchaws, tiamsis kuv nrhiav tsis tau ib tug li.

³¹Yog li ntawd, kuv thiaj cia kuv txojkev chim los raug lawv kom lawv puastsuaj tas ib yam li hluavtaws hlawv, vim lawv tau ua kev phem kev qias.” Tus TSWV uas kav ib puas tsav yam hais li ntawd.