Read Hmong Daw Exekees 32 Bible Online

Exekees 32 - Hmong Daw bible

Exekees 32

¹Lub kaum ob hlis ntuj hnub xiab ib, xyoo kaum ob uas peb raug ntes mus, tus TSWV hais rau kuv hais tias,

²“Tub noobneej, koj cia li hais rau Falaus uas yog cov Iziv tus vajntxwv li no: Koj hais tias koj yog tus tsov ntxhuav uas nyob xyaw txhua haivneeg, tiamsis koj zoo li tus nab qa loj uas nyob hauv pasdej. Koj ob txhais kotaw do ua rau lub pasdej nro tas thiab tej dej tsis huv lawm.

³Thaum muaj ntau haivneeg tuaj sib sau ua ke, kuv yuav muab kuv lub vas khwb nkaus koj thiab cia lawv cab koj mus rau tim ntug.

⁴Kuv yuav muab koj pov rau hauv av, cia tej noog thiab tej tsiaj hauv ntiajteb tuaj noj koj.

⁵Kuv yuav muab koj lub cev tuag uas lwj pov mus kom puv txhua lub roob thiab txhua lub hav.

⁶Kuv yuav muab koj cov ntshav hliv kom ntws mus puv txhua lub roob thiab txhua tus dej.

⁷Thaum kuv ua rau koj puastsuaj, kuv yuav ua kom lub ntuj tsau ntais, tej hnubqub, lub hnub thiab lub hli yuav tsis ci lawm.

⁸Kuv yuav muab tej uas ci pom kev rau saum nruab ntug tshem tawm kom lub ntiajteb tsaus ntuj nti. Kuv yog tus TSWV uas kav ib puas tsav yam hais li ntawd.

⁹“Kuv yuav ua rau ntau haivneeg raug kev nyuaj siab, thaum kuv ntiab koj mus nyob xyaw ntau haivneeg hauv tej tebchaws uas koj tsis tau paub dua.

¹⁰Tej uas kuv ua rau koj yuav ua rau ntau haivneeg yoob tas. Thaum kuv yoj kuv rab ntaj, tej vajntxwv yuav ntshai heev. Hnub uas koj poob mus ntawd lawv txhua tus yuav ntshai heev thiab txhawj txog lawv txojsia.”

¹¹Tus TSWV uas kav ib puas tsav yam hais rau cov Iziv tus vajntxwv hais tias, “Koj yuav raug tus vajntxwv uas kav tebchaws Npanpiloos rab ntaj tua xwb.

¹²Kuv yuav cia lwm haivneeg cov tubrog uas ua nruj ua tsiv nqa ntaj tuaj tua koj cov neeg kom tuag tas. Koj thiab txhua yam uas ua rau koj khav yuav raug puastsuaj tas.

¹³Kuv yuav muab koj tej tsiaj tua kom tuag tas rau ntawm tej ntug pasdej. Yuav tsis tshuav neeg lossis tsiaj los ua kom dej nro lawm.

¹⁴Kuv yuav cia koj tej dej nyob tus yees thiab ntshiab si thiab cia koj tej dej ntws ntsiag to. Kuv yog tus TSWV uas kav ib puas tsav yam hais li ntawd.

¹⁵Thaum kuv muab tebchaws Iziv ua kom nyob qhuav nquas cia thiab tua cov neeg uas nyob hauv tuag tas lawm, lawv thiaj yuav paub hais tias kuv yog tus TSWV.

¹⁶Ntawm no yog zaj nkauj quaj ntsuag uas luag yuav hu. Tej pojniam hauv txhua haivneeg yuav hu zaj nkauj quaj ntsuag rau Iziv thiab nws cov neeg. Kuv yog tus TSWV uas kav ib puas tsav yam hais li ntawd.”

¹⁷Lub ib hlis ntuj hnub kaum tsib xyoo kaum ob uas peb raug ntes mus, tus TSWV hais rau kuv hais tias,

¹⁸“Tub noobneej, koj cia li quaj ntsuag rau cov neeg Iziv. Koj cia li xa lawv nrog lwm haivneeg uas muaj hwjchim mus rau hauv tubtuag teb.

¹⁹Koj hais rau lawv hais tias: “Nej xav hais tias nej zoo nkauj tshaj luag lwm tus no los? Nej yuav tau mus rau hauv tubtuag teb thiab pw nrog cov neeg uas tsis ua kevcai txiav.

²⁰“Cov Iziv yuav tuag nrog cov neeg uas raug tua rau hauv tshavrog. Twb npaj rab ntaj txhij lawm yuav tua lawv txhua tus.

²¹Cov thawj uas muaj hwjchim thiab cov neeg uas tuaj cov Iziv tog, lawv zoo siab tos txais cov Iziv mus rau hauv tubtuag teb. Lawv qw hais tias, ‘Cov neeg tsis ua kevcai txiav uas raug tua tuag rau hauv tshavrog los pw ntawm no lawm!’

²²“Axilias cov tubrog tej ntxa nyob puagncig nws. Lawv yog cov uas raug hniav ntaj tuag rau hauv tshavrog;

²³lawv tej ntxa nyob hauv qhov uas tob tshaj plaws hauv tubtuag teb. Nws cov tubrog puavleej tuag tas rau hauv tshavrog, thiab lawv tej ntxa nyob puagncig nws. Lawv tau ua rau tej neeg uas tseem ua neej nyob hauv ntiajteb ntshai kawg.

²⁴“Elas cov tubrog tej ntxa nyob puagncig nws. Lawv yog cov uas raug hniav ntaj tuag rau hauv tshavrog, thiab lawv mus rau hauv tubtuag teb tsis tas ua kevcai txiav li. Thaum tseem ua neej nyob lawv ua nruj ua tsiv, tiamsis nimno lawv tuag xyab luas thiab poob ntsejmuag kawg.

²⁵Elas pw nrog cov neeg uas raug hniav ntaj tuag rau hauv tshavrog, thiab nws cov tubrog tej ntxa nyob puagncig nws. Lawv puavleej tsis tau ua kevcai txiav thiab raug tua tuag rau hauv tshavrog. Thaum tseem ua neej nyob lawv ua nruj ua tsiv, tiamsis nimno lawv tuag xyab luas thiab poob txajmuag kawg, lawv nrog cov neeg uas raug tua tuag rau hauv tshavrog nyob ua ke.

²⁶“Mesej thiab Tunpas cov tubrog tej ntxa nyob puagncig nkawd. Lawv yog cov uas raug hniav ntaj tuag rau hauv tshavrog, lawv tsis tau ua kevcai txiav li. Lawv tau ua rau tej neeg uas tseem ua neej nyob hauv ntiajteb ntshai kawg.

²⁷Luag tsis hwm lawv thiab tsis coj lawv mus faus ib yam li cov thawjcoj tiam thaum ub uas muab lawv tej cuabyeej ua rog nrog lawv mus rau hauv tubtuag teb, muab lawv tej ntaj tiag lawv taubhau, thiab muab lawv tej thaiv hniav ntaj tso rau saum lawv lub cev. Cov neeg ntawd ua rau tej neeg uas tseem ua neej nyob hauv ntiajteb ntshai kawg.

²⁸“Qhov ntawd qhia hais tias cov Iziv yuav raug tua thiab pw nrog cov neeg tsis ua kevcai txiav uas raug hniav ntaj tuag rau hauv tshavrog.

²⁹“Edoos nrog nws cov vajntxwv thiab nws cov thawjcoj nyob hauv thiab. Lawv muaj tubrog coob thiab muaj hwjchim heev, tiamsis nimno lawv nrog cov neeg tsis ua kevcai txiav uas raug hniav ntaj tuag rau hauv tshavrog pw ua ke hauv tubtuag teb.

³⁰“Cov nomtswv uas nyob sab qaumteb thiab cov Xidaunias nyob ntawd thiab. Yav tas los lawv muaj hwjchim ua rau neeg ntshai heev, tiamsis nimno lawv nrog cov neeg tsis ua kevcai txiav uas raug hniav ntaj tuag rau hauv tshavrog poob ntsejmuag kawg mus rau hauv tubtuag teb. Lawv koom txojkev txajmuag nrog cov neeg uas mus rau hauv tubtuag teb.

³¹“Thaum Falaus pom lawv tuag li ntawd ua rau nws zoo siab kawg, rau qhov Falaus thiab nws cov tubrog los raug hniav ntaj tuag rau hauv tshavrog thiab,” tus TSWV uas kav ib puas tsav yam hais li ntawd.

³²“Falaus ua rau cov neeg uas tseem ua neej nyob ntshai kawg, tiamsis Falaus thiab nws cov tubrog yuav nrog cov neeg tsis ua kevcai txiav uas raug hniav ntaj tuag rau hauv tshavrog pw ua ke hauv tubtuag teb.” Tus TSWV uas kav ib puas tsav yam hais li ntawd.