Read Hmong Daw Hauxeyas 11 Bible Online

Hauxeyas 11 - Hmong Daw bible

Hauxeyas 11

¹Tus TSWV hais tias, “Thaum Yixalayees tseem yog menyuam yaus kuv hlub nws heev, thiab kuv hu nws tawm nram tebchaws Iziv los ua kuv tus tub.

²Tiamsis kuv yimhuab hu nws, nws yimhuab khiav ntawm kuv mus deb npaum ntawd. Kuv haivneeg tua tsiaj fij rau Npa-as; lawv hlawv tshuaj tsw qab rau tej mlom.

³Kuv yog tus uas qhia cov Yixalayees mus kev. Kuv tsaws kuv haivneeg los puag rau ntawm kuv ob txhais npab, tiamsis lawv tsis paub hais tias kuv yog tus uas tu lawv hlob li.

⁴Kuv ua tib zoo rub lawv los cuag kuv thiab kuv hlub lawv kawg. Kuv tsaws hlo lawv los puag npuab kuv lub plhu; kuv khoov mus tu lawv thiab pub mov rau lawv noj.

⁵“Lawv tsis kam tig rov los cuag kuv; yog li ntawd, lawv yuav tsum tau rov mus rau nram tebchaws Iziv, thiab haivneeg Axilias yuav tswjhwm lawv.

⁶Yuav muaj tsov muaj rog tuaj tua lawv tej nroog thiab tsoo tej roojvag kom pob puas tas. Luag yuav ua kom kuv haivneeg raug puastsuaj tas, vim lawv xav hais tias tej uas lawv ua yeej zoo heev lawm.

⁷Lawv tawv ncauj thiab khiav tawm ntawm kuv mus. Lawv yuav tsa suab hlo quaj vim tus quab uas lawv kwv, tiamsis yuav tsis muaj leejtwg muab tus quab ntawd tshem ntawm lawv mus li.

⁸“Yixalayees, kuv yuav ua li cas tso taus koj? Kuv yuav ua li cas thiaj tso taus koj tseg? Kuv puas khuv ua kom koj puastsuaj ib yam li kuv ua rau lub nroog Amas lossis ua rau koj ib yam li kuv ua rau lub nroog Xenpauyees? Kuv lub siab yeej tsis kheev kuv ua li ntawd! Rau qhov kuv hlub koj heev.

⁹Thaum kuv chim kuv yuav tsis rau txim rau koj; kuv yuav tsis ua kom cov Yixalayees raug puastsuaj ib zaug ntxiv li lawm. Rau qhov kuv yog Vajtswv, kuv tsis yog noobneej. Kuv yog tus Dawbhuv, kuv nrog nej nyob. Kuv yuav tsis los cuag nej ua tus npautaws tsawv.

¹⁰“Thaum kuv nyooj laws ib yam li tus tsov ntxhuav rau kuv haivneeg tej yeebncuab, kuv haivneeg yuav raws kuv qab. Lawv yuav maj ceev nrooj tim sab hnubpoob rov los cuag kuv.

¹¹Lawv yuav khiav ceev npaum nkaus li tej noog ya nram tebchaws Iziv los thiab ceev npaum nkaus li nquab ya pem tebchaws Axilias los. Kuv yuav coj lawv rov los nyob hauv lawv tej vajtse dua. Kuv yog tus TSWV uas hais li ntawd.”

¹²Tus TSWV hais tias, “Cov Yixalayees hais lus dag thiab ntxeev ntxias puagncig kuv, thiab cov Yudas tseem ntxeev siab tsis tseg rau kuv uas yog Vajtswv tus Dawbhuv thiab ncaj ncees.