Read Hmong Daw Yau-Ees 1 Bible Online

Yau-Ees 1 - Hmong Daw bible

Yau-Ees 1

¹Ntawm no yog tus TSWV cov lus uas hais rau Pethuyees tus tub Yau-ees.

²Nej cov neeg laus cia li ua tib zoo mloog; txhua tus uas nyob hauv tebchaws Yudas, nej cia li mloog. Puas tau muaj tej yam zoo li no tshwmsim los rau nej tiam lossis nej cov yawgkoob tiam?

³Cia li piav tej no qhia rau nej cov menyuam; ces lawv mam li piav qhia rau lawv tej menyuam, lawv ib tiam yuav piav qhia rau ib tiam mus li.

⁴Kooj txomfav ib pab tas ib pab tuaj nyob puv nkaus ntawm tej qoobloo; yam twg uas ib pab kooj noj tsis tas mas lwm pab kooj los muab khee noj kom tas.

⁵Cov neeg qaug cawv, nej cia li sawv thiab quaj; cov neeg quav cawv, nej cia li tsa suab hlo quaj; rau qhov tej txiv hmab uas yuav cia ua cawv tshiab twb puastsuaj tas lawm.

⁶Ib pab tubrog kooj ya tsaus nti tuaj tawmtsam peb lub tebchaws; lawv muaj zog heev thiab coob kawg nkaus suav tsis txheeb li; lawv tej hniav ntse npaum nkaus li hniav tsov ntxhuav.

⁷Lawv muab peb tej vaj txiv hmab noj tas dulug thiab noj peb tej ntoo txiv ncuavpias tas huv tibsi. Lawv noj tej nplooj thiab kaws tej tawv, tsuas tshuav tej kav nyob dawb paug cia xwb.

⁸Tej pejxeem, nej cia li quaj ib yam li tus hluas nkauj quaj tus hluas nraug uas nws tabtom yuav mus yuav ua nws tus txiv, tiamsis tus hluas nraug ntawd cia li tuag lawm.

⁹Tsis muaj nplej lossis cawv txiv hmab coj mus fij rau hauv lub Tuamtsev; cov povthawj quaj ntsuag vim tsis muaj neeg nqa khoom tuaj fij rau tus TSWV lawm.

¹⁰Tej teb av liab nploog cia, tej av qhuav nkig nkuav, rau qhov tej qoobloo puastsuaj tas; tej txiv hmab thiab tej txiv ntoo roj los qhuav ntsws tas.

¹¹Cov neeg ua liaj ua teb, nej cia li tu siab; cov neeg uas tu tej vaj txiv hmab, nej cia li tsa suab quaj, rau qhov tej qib, tej nplej thiab tej qoobloo twb puastsuaj tas lawm.

¹²Tej txiv hmab thiab txiv ncuavpias qhuav thiab ntsws; tej txiv ntoo puavleej qhuav thiab tuag tas. Tej neeg sawvdaws nyob nyuaj siab ntsuav.

¹³Nej cov povthawj uas fij khoom ntawm lub thaj cia li npua ntaubtsaj thiab quaj! Cia li mus rau hauv lub Tuamtsev thiab quaj ib hmos kaj ntug! Rau qhov tsis muaj nplej lossis cawv txiv hmab fij rau nej tus Vajtswv lawm.

¹⁴Cia li hais kom sawvdaws yoo mov, cia li hu sawvdaws tuaj ua ke! Cia li hu cov thawjcoj thiab tagnrho cov Yudas tuaj rau hauv tus TSWV uas yog nej tus Vajtswv lub Tuamtsev thiab thov nws pab.

¹⁵Twb yuav txog hnub uas tus TSWV teem cia, yog hnub uas tus muaj Hwjchim Loj kawg nkaus yuav ua kom ib puas tsav yam raug puastsuaj. Hnub ntawd yog hnub uas sawvdaws yuav ntshai kawg nkaus li!

¹⁶Peb saib ntsoov peb tej qoobloo raug puastsuaj tas. Tsis muaj kev zoo siab nyob hauv Vajtswv lub Tuamtsev lawm.

¹⁷Tej noob qoob lwj tas rau hauv tej av qhuav. Tsis muaj qoobloo sau los rau hauv tej txhab, yog li ntawd tej txhab thiaj pob puas tas.

¹⁸Tej nyuj qaug zog zis rau qhov tsis muaj zaub rau nyuj noj li lawm; tej yaj los tsis muaj zaub noj ib yam nkaus.

¹⁹Tus TSWV, kuv tsa ncauj thov koj, vim tej nroj tsuag thiab tej ntoo tuag tas ib yam li hluavtaws plhov.

²⁰Txawm yog tej tsiaj qus los puavleej tsa suab quaj thov koj pab, rau qhov tej hav dej qhuav tas lawm.