Read Hmong Daw Yau-Ees 2 Bible Online

Yau-Ees 2 - Hmong Daw bible

Yau-Ees 2

¹Nej cia li nyob saum Vajtswv lub roob Xi-oos uas dawbhuv tshuab xyu ceebtoom rau sawvdaws. Cov Yudas, nej cia li ntshai ua ibce tshee hnyo! Rau qhov twb yuav txog hnub uas tus TSWV teem tseg.

²Hnub ntawd ntuj yuav tsaus ntais, teb yuav tsaus nti, huab laum nkaus ntuj tsaus dub nciab. Cov tubrog kooj ntawd nias tsam tsaus nti tuaj ib yam li duab ntxoov ntxoo roos tej roob. Yeej tsis tau muaj dua ib yam zoo li no hlo li, thiab yuav tsis muaj ib zaug zoo li no ntxiv lawm.

³Lawv noj tej nroj tsuag thiab qoobloo tas dulug ib yam li hluavtaws kub. Lub tebchaws no zoo ib yam li lub Vaj Edees nyob tom lawv hauv ntej, tiamsis tom lawv qab av liab ploog ib yam li tiaj suabpuam. Tsis muaj ib yam dabtsi yuav khiav dim ntawm lawv li.

⁴Lawv lub cev zoo ib yam li nees lub; lawv khiav ib yam li tej nees uas caij mus ntaus rog.

⁵Thaum lawv dhia mus rau saum tej roob mas nrov npaum li tej tsheb nees nrov thiab nrov nroo ntws ib yam li hluavtaws kub nroj tsuag qhuav. Lawv sawv ua tsheej kab coob ib yam li cov tubrog uas npaj nroos yuav ntaus rog.

⁶Lawv mus txog qhov twg txhua tus neeg ntshai ua ntsejmuag thimxem tas.

⁷Cov kooj ntawd mos tsaus tsi tuaj ib yam li pab tubrog; lawv nce tej ntsa yeej ib yam li tej tubrog. Lawv too hau ntsoov nias tsam mus rau tom hauv ntej tsis tig saib qab

⁸lossis ib tug tsis txeeb ib tug ntej li. Lawv nias luag tej yeej tuaj tsis muaj leejtwg tiv tau li.

⁹Lawv txeem tuaj rau hauv nroog, lawv dhia hla tej ntsa yeej tuaj; lawv nce pes hlo mus rau saum tej tsev thiab nkag ntawm tej qhovrai mus ib yam li tej tubsab.

¹⁰Thaum lawv taug kev tuaj lub ntiajteb ua zog koog, lub ntuj ntseeg nkawg. Lub hnub thiab lub hli cia li tsaus dub nciab, thiab tej hnubqub los cia li tsis ci lawm.

¹¹Tus TSWV nthe nqho nws cov tubrog. Cov tubrog uas mloog nws lus muaj coob thiab muaj zog kawg li. Hnub uas tus TSWV teem cia yog hnub uas sawvdaws yuav ntshai kawg nkaus! Leejtwg tseem yuav dim tau?

¹²Tus TSWV hais tias, “Txawm yog li ntawd los nimno nej cia li tso plhuav nej tej kev txhaum ntawd tseg, thiab tig rov los cuag kuv ntawm nej lub siab dawb paug, cia li yoo mov, quaj ntsuag thiab tu siab.

¹³Nej yuav tsum ua rau luag pom hais tias nej nyuaj siab tiag, tsis yog lam dua nej tej ris tsho xwb.” Cia li rov los cuag tus TSWV uas yog nej tus Vajtswv. Nws muaj lub siab dawb siab zoo thiab puv npo txojkev hlub; nws muaj lub siab ntev thiab ua raws li nws tej lus cog tseg; nws zoo siab yuav zam txim thiab tsis rau txim rau nej.

¹⁴Tej zaum tus TSWV uas yog nej tus Vajtswv yuav hloov siab thiab foom koob hmoov kom nej muaj qoobloo nplua mias. Ces nej yuav muaj qoobloo thiab cawv txiv hmab fij rau tus TSWV.

¹⁵Cia li tshuab xyu saum Roob Xi-oos; hu sawvdaws tuaj ua ke thiab ua kevcai yoo mov!

¹⁶Cia li hu kom cov pejxeem tuaj ua ke; kom lawv txhua tus npaj tuaj koom lub rooj sablaj tseemceeb; coj cov laus, cov menyuam yaus thiab cov menyuam mos tuaj huv tibsi. Txawm yog tej niamtxiv uas sib yuav tshiab los lawv yuav tsum tawm hauv lawv tej tsev tuaj mus koom.

¹⁷Cov povthawj uas tu tus TSWV ntawm lub thaj thiab ntawm txojkev uas mus rau hauv lub Tuamtsev kis nruab nrab, cia li quaj thiab thov Vajtswv hais tias, “Tus TSWV, thov hlub koj haivneeg. Thov tsis txhob cia lwm haivneeg txob thuam peb, saib tsis taus peb thiab hais tias, ‘Nej tus Vajtswv nyob qhov twg?’ ”

¹⁸Tom qab ntawd tus TSWV rov hlub nws lub tebchaws thiab hlub nws haivneeg.

¹⁹Nws teb lawv tej lus thov hais tias, “Nimno kuv yuav pub kom nej muaj nplej, cawv txiv hmab thiab roj txiv ntoo ces nej yuav txaus siab heev. Lwm haivneeg yuav tsis txob thuam nej ntxiv lawm.

²⁰Kuv yuav raws cov tubrog kooj uas tuaj pem qaumteb tuaj kom tawm mus thiab yuav ntiab ib txhia mus rau tom tiaj suabpuam. Kuv yuav puav pab uas ua ntej mus rau hauv Hiavtxwv Tuag, thiab kuv yuav puav pab tom qab mus rau hauv Hiavtxwv Meditelanes. Lawv tej cev tuag yuav tsw lwj ntxiag. Kuv yuav ua kom lawv puastsuaj tas vim tej uas lawv tau ua rau nej lawm.

²¹“Tej liaj tej teb, nej tsis txhob ntshai tiamsis cia li xyivfab thiab zoo siab rau tej uas tus TSWV tau pab nej lawm.

²²Tej tsiaj txhu, tsis xob ntshai. Tej tshav zaub los twb rov hlav ntsuab xiab, tej ntoo los rov tawg paj txi txiv thiab tej txiv hmab, txiv ncuavpias los muaj nplua mias lawm.

²³“Cov neeg hauv Xi-oos, cia li zoo siab; zoo siab rau tej uas tus TSWV uas yog nej tus Vajtswv twb pab nej lawm. Nws tso nag los kom txaus rau lub caij ntuj nag; nws tso nag ntuj tsaug thiab nag ntuj tshiab los rau nej ib yam li yav thaum ub.

²⁴Yuav muaj nplej puv nkaus hauv nej tej tshav nplej; thiab tej rhawv tsuam txiv hmab yuav muaj cawv txiv hmab thiab roj txiv ntoo puv phwj yaws.

²⁵Ntau xyoo uas tas los kooj txomfav noj nej tej qoobloo tas lawm, tiamsis nimno kuv yuav them rov qab rau nej, kuv yog tus uas tso cov tubrog no tuaj tawmtsam nej ntag.

²⁶Nimno nej yuav muaj noj muaj haus nplua mias thiab txaus nej siab. Nej yuav qhuas tus TSWV uas yog nej tus Vajtswv, tus uas ua tej haujlwm zoo heev pab nej. Kuv haivneeg yuav tsis raug luag txob thuam ntxiv lawm.

²⁷Cov Yixalayees, nej yuav paub hais tias kuv nrog nraim nej thiab kuv yog tus TSWV uas yog nej tus Vajtswv, tsis muaj dua lwm tus lawm. Kuv haivneeg yuav tsis raug luag txob thuam ntxiv lawm.

²⁸“Tom qab ntawd kuv yuav pub kuv tus ntsujplig los rau txhua tus: nej tej tub thiab tej ntxhais yuav qhia kuv txojlus; nej cov laus yuav ua npau suav, thiab nej cov tub hluas yuav pom tej zaj yogtoog.

²⁹Thaum txog lub sijhawm ntawd, kuv yuav pub kuv tus ntsujplig rau tej tubtxib tsis hais pojniam lossis txivneej.

³⁰“Thaum txog hnub ntawd kuv yuav ua tej yam cim qhia rau saum nruab ntug thiab hauv ntiajteb; yuav muaj ntshav nrog, hluavtaws thiab pa taws ncho auv niab.

³¹Ua ntej hnub tseemceeb thiab tej kev txhawj ntshai uas tus TSWV teem cia ntawd los txog, lub hnub yuav tsaus thiab lub hli yuav liab ib yam li ntshav.

³²Tiamsis txhua tus uas thov tus TSWV pab yuav dim. Raws li tus TSWV tau hais tseg lawm tias, ‘Muaj qee leej uas nyob hauv Yeluxalees yuav khiav dim; cov neeg uas kuv xaiv lawm thiaj yuav muaj sia nyob xwb.’ ”