Read Hmong Daw Teev Npe 13 Bible Online

Teev Npe 13 - Hmong Daw bible

Teev Npe 13

¹Tus TSWV hais rau Mauxes hais tias,

²“Xaiv kaum ob tug thawjcoj ntawd ib xeem ib tug thiab tso lawv mus soj lub tebchaws Kana-as uas kuv twb muab pub rau cov Yixalayees lawm.”

³Mauxes mloog tus TSWV lus, nws thiaj tso cov thawjcoj uas muaj npe raws li no tawm hauv tiaj mojsab qhua Palas mus: [Xeem] — [Tus thawjcoj npe] Lunpees — yog Xakus tus tub Samuas Xime-oos — yog Haulis tus tub Safas Yudas — yog Yefunes tus tub Kalej Ixakhas — yog Yauxej tus tub Ikas Efalayees — yog Noos tus tub Hauseyas Npeenyamees — yog Lafus tus tub Patis Xenpuloos — yog Xaudis tus tub Nkadiyees Manaxes — yog Xuxis tus tub Nkadis Das — yog Kemalis tus tub Amiyees Aseles — yog Mikhayees tus tub Xethus Nathalis — yog Vausis tus tub Nanpis Khas — yog Makhis tus tub Nkuyees

¹⁶Cov neeg uas muaj npe saum no yog cov uas Mauxes tso mus soj lub tebchaws Kana-as. Nws tis dua ib lub npe rau Noos tus tub Hauseyas hu ua Yausuas.

¹⁷Thaum Mauxes txib lawv mus soj lub tebchaws nws hais rau lawv hais tias, “Nej cia li mus rau tim tebchaws Kana-as yav qabteb, thiab mus soj txhua nrho hauv lub tebchaws thiab saum tej roob.

¹⁸Mus xyuas saib lub tebchaws ntawd zoo li cas, muaj neeg coob npaum li cas nyob rau hauv, thiab lawv muaj zog npaum li cas.

¹⁹Thiab xyuas saib lub tebchaws ntawd zoo lossis phem, thiab cov neeg ntawd nyob ua zej ua zos lossis nyob hauv tej nroog uas xov ntsa yeej thaiv khov kho.

²⁰Nej xyuas saib av puas zoo qoob lossis tsis zoo thiab puas tshuav havzoov ntau los tsis tshuav. Thiab nco ntsoov de qee yam txiv nqa los rau sawvdaws saib.” (Lub caij ntawd yog lub caij uas txiv hmab tabtom siav.)

²¹Yog li ntawd, lawv thiaj mus rau tid thiab soj lub tebchaws txij ntua ntawm tiaj mojsab qhua Xees mus txhua nrho sab qabteb mus rau pem Lehaus uas nyob ze lub Dawm Hamas sab qaumteb.

²²Lawv xub mus rau sab qabteb thiab los txog rau hauv lub nroog Henploos, yog lub nroog uas cov Ahimas, cov Sesais thiab cov Talemais nyob. Cov neeg no yog cov Anakees uas loj siab heev tej xeebntxwv. (Lub nroog Henploos luag twb xub ua xya xyoo ua ntej mam li ua lub nroog Xau-as nram tebchaws Iziv.)

²³Lawv los txog hauv lub Hav Esekaus, lawv txiav tau ib co ceg txiv hmab uas txi txiv ncw heev thiab hnyav kawg li, lawv muab pas ntxig rau txaus ob tug txivneej kwv los. Thiab lawv tseem de tau txiv ntsiavkws thiab txiv ncuavpias nqa los huv tibsi. (

²⁴Lawv thiaj tis npe rau qhov chaw ntawd hu ua lub Hav Esekaus, rau qhov cov Yixalayees txiav tau txiv hmab ncw heev qhov ntawd los.)

²⁵Tom qab uas mus soj lub tebchaws tau plaub caug hnub lawm, cov mus soj tebchaws mam rov los txog.

²⁶Lawv los cuag Mauxes, Aloos thiab cov pejxeem Yixalayees ntawm Kades hauv lub tiaj mojsab qhua Palas. Lawv piav tej uas lawv tau mus pom, thiab muab tej txiv hmab uas lawv de tau los rau cov pejxeem sawvdaws saib.

²⁷Lawv hais rau Mauxes hais tias, “Peb tau mus soj lub tebchaws uas koj txib peb mus. Lub tebchaws ntawd av rog thiab zoo qoob heev; thiab tej txiv hmab no yog de hauv lub tebchaws ntawd los ntag.

²⁸Tiamsis cov neeg uas nyob tid muaj zog heev, lawv tej nroog loj dav thiab muaj ntsa yeej thaiv zoo heev. Thiab peb tseem pom cov neeg uas loj siab cov xeebntxwv nyob tid huv tibsi.

²⁹Cov Amalej nyob sab qabteb, cov Hitis, cov Yenpus thiab cov Amaules nyob pem tej roob, cov Kana-as nyob raws ntug hiavtxwv Meditelanes, thiab nyob raws tus ntug dej Yauladees.”

³⁰Kalej txwv cov pejxeem uas pheej yws Mauxes kom lawv ua twjywm, thiab nws hais tias, “Peb cia li mus txeeb kom tau lub tebchaws ntawd; peb yeej muaj zog txaus uas yuav tua yeej lub tebchaws ntawd xwb.”

³¹Tiamsis cov neeg uas nrog Kalej mus soj lub tebchaws hais tias, “Peb tseem tsis tau muaj zog txaus yuav mus tua yeej lawv; cov neeg uas nyob tid muaj zog tshaj peb.”

³²Yog li ntawd, lawv thiaj muab tej lus dag nthuav qhia rau cov Yixalayees hais txog lub tebchaws uas lawv mus soj los ntawd. Lawv hais tias, “Lub tebchaws ntawd ua qoob twb tsis txaus cov neeg uas nyob hauv noj. Cov neeg uas peb mus pom puavleej yog cov neeg uas loj siab heev xwb,

³³dua li ntawd, peb tseem pom Anaj cov xeebntxwv uas loj thiab siab tshaj plaws nyob hauv lub tebchaws ntawd thiab. Peb saib peb rau lawv, mas peb me heev zoo li cov nyuag kooj xwb, yuav ua li cas muab peb piv tau rau lawv.”