Read Hmong Daw Teev Npe 2 Bible Online

Teev Npe 2 - Hmong Daw bible

Teev Npe 2

¹Tus TSWV qhia rau Mauxes thiab Aloos hais tias,

²“Thaum twg cov Yixalayees rub lawv tej tsevntaub, txhua tus neeg yuav tsum rub nws lub tsevntaub nyob rau hauv qab nws xeem tus chij thiab hauv tsevneeg tus qab chij. Nej tej tsev yuav tsum nyob puagncig tus TSWV lub Tsevntaub sib ntsib.”

³Tu sab hnubtuaj rau xeem Yudas, lawv mus rub tsevntaub nyob ua lawv ib pawg, cov Yudas tus thawjcoj yog Aminadas tus tub Nasoos,

⁴suav tagnrho nws cov neeg muaj xya caum plaub txhiab rau pua leej.

⁵Xeem Ixakhas, rub lawv tej tsevntaub nyob txuas nkaus ntawm xeem Yudas, xeem Ixakhas tus thawjcoj yog Zuag tus tub Nethanees,

⁶suav tagnrho nws cov neeg muaj tsib caug plaub txhiab plaub puas leej.

⁷Txuas ntawd, yog xeem Xenpuloos, xeem Xenpuloos tus thawjcoj yog Heloos tus tub Eli-as,

⁸suav tagnrho nws cov neeg muaj tsib caug xya txhiab plaub puas leej.

⁹Suav tagnrho cov neeg uas nyob rau sab yeej uas xeem Yudas nyob, muaj ib puas yim caum rau txhiab plaub puas leej. Lawv yog cov uas yuav tawm mus ua ntej.

¹⁰Tu sab nrad rau xeem Lunpees, cov Lunpees tus thawjcoj yog Sede-us tus tub Elixus,

¹¹suav tagnrho nws cov neeg muaj plaub caug rau txhiab tsib puas leej.

¹²Thiab xeem Xime-oos, rub lawv tej tsevntaub nyob txuas nkaus ntawm xeem Lunpees, cov Xime-oos tus thawjcoj yog Xulisadais tus tub Selumiyees,

¹³suav tagnrho nws cov neeg muaj tsib caug cuaj txhiab peb puas leej.

¹⁴Txuas ntawd, yog Xeem Khas, cov Khas tus thawjcoj yog Deyees tus tub Eli-axas,

¹⁵suav tagnrho nws cov neeg muaj plaub caug tsib txhiab rau pua tsib caug leej.

¹⁶Suav tagnrho cov neeg uas nyob rau sab yeej uas xeem Lunpees nyob, muaj ib puas tsib caug ib txhiab plaub puas tsib caug leej. Lawv yog cov uas tawm mus ua pab ob.

¹⁷Cov Levis mam li kwv tus TSWV lub Tsevntaub sib ntsib tuaj nruab nrab ob pab uas mus ua ntej thiab ob pab uas mus ua qab. Plaub pab ntawd nyias yuav tsum mus nyob nyias qhov chaw raws li twb faib tseg lawm, txhua pab twg nyias yuav tsum mus nyob hauv qab nyias tus chij xwb.

¹⁸Tu sab hnub poob rau xeem Efalayees, lawv mus rub lawv tej tsevntaub nyob ua lawv ib pawg, cov Efalayees tus thawjcoj yog Amihus tus tub Elisamas,

¹⁹suav tagnrho nws cov neeg muaj plaub caug txhiab tsib puas leej.

²⁰Thiab xeem Manaxes, rub lawv tej tsevntaub nyob txuas nkaus ntawm cov Efalayees, cov Manaxes tus thawjcoj yog Pedaxes tus tub Nkanaliyees,

²¹suav tagnrho nws cov neeg muaj peb caug ob txhiab ob puas leej.

²²Txuas ntawd, yog Xeem Npeenyamees, cov Npeenyamees tus thawjcoj yog Nkede-aunis tus tub Anpidas,

²³suav tagnrho nws cov neeg muaj peb caug tsib txhiab plaub puas leej.

²⁴Suav tagnrho cov neeg uas nyob rau sab yeej uas xeem Efalayees nyob, muaj ib puas yim txhiab ib puas leej. Lawv yog cov uas tawm mus ua pab peb.

²⁵Tu sab ped rau xeem Das, lawv mus rub lawv tej tsevntaub nyob ua lawv ib pawg, cov Das tus thawjcoj yog Amisadais tus tub Ahi-exes,

²⁶suav tagnrho nws cov neeg muaj rau caum ob txhiab xya pua leej.

²⁷Thiab xeem Aseles rub lawv tej tsevntaub nyob txuas nkaus ntawm xeem Das, cov Aseles tus thawjcoj yog Aukhalas tus tub Pankiyees,

²⁸suav tagnrho nws cov neeg muaj plaub caug ib txhiab tsib puas leej.

²⁹Txuas ntawd, yog xeem Nathalis, cov Nathalis tus thawjcoj yog Enas tus tub Ahilas,

³⁰suav tagnrho nws cov neeg muaj tsib caug peb txhiab plaub puas leej.

³¹Suav tagnrho cov neeg uas nyob rau sab yeej uas xeem Das nyob, muaj ib puas tsib caug xya txhiab rau pua leej. Lawv yog cov uas tawm mus ua pab kawg.

³²Xam tagnrho cov Yixalayees uas muab faib ua tej pab tej pawg ntawd, muaj rau pua peb txhiab tsib puas tsib caug leej.

³³Tiamsis tsis tau sau cov Levis npe nrog cov Yixalayees, raws li tus TSWV tau samhwm rau Mauxes lawm.

³⁴Yog li ntawd, cov Yixalayees thiaj ua raws li tej lus uas tus TSWV tau samhwm rau Mauxes. Lawv nyias rub nyias tej tsevntaub, rau hauv qab raws li nyias xeem tus chij, thiab lawv sawv kev mus ua tej pab raws li nyias xeem.