Read Hmong Daw Teev Npe 23 Bible Online

Teev Npe 23 - Hmong Daw bible

Teev Npe 23

¹Npala-as hais tias, “Koj cia li teeb xya lub thaj rau kuv, thiab muab xya tus heev nyuj thiab xya tus laug yaj rau kuv.”

²Npalaj ua raws li Npala-as hais, ib lub thaj twg tua ib tug heev nyuj thiab ib tug laug yaj hlawv fij rau saum.

³Ces Npala-as hais rau Npalaj hais tias, “Thaum kuv mus xyuas saib tus TSWV los hais dabtsi rau kuv lossis tsis hais, koj cia li mus sawv ntawm qhov chaw uas hlawv koj tej khoom fij. Txhua yam uas tus TSWV hais rau kuv, kuv yuav qhia rau koj.” Yog li ntawd, Npala-as thiaj nce mus rau saum ib lub ncov roob,

⁴thiab Vajtswv los cuag Npala-as. Npala-as hais rau Vajtswv hais tias, “Kuv teeb xya lub thaj thiab tua nyuj, tua yaj fij tso rau saum xya lub thaj ntawd ib lub ib tug nyuj thiab ib tug yaj.”

⁵Tus TSWV qhia tej lus uas yuav hais rau Npala-as thiab kom nws coj tej lus ntawd rov los hais rau Npalaj.

⁶Npala-as rov los, nws los pom Npalaj thiab cov Mau-am tej thawjcoj sawv ntawm qhov chaw uas hlawv tej khoom fij ntawd.

⁷Ces Npala-as cevlus hais tias: “Cov Mau-am tus Vajntxwv Npalaj tos kuv pem tebchaws Xilias uas nyob pem cov roob sab hnubtuaj tuaj. Nws hais tias, ‘Koj tuaj pab kuv foom tsis zoo rau Yakhauj uas yog Yixalayees.’

⁸Kuv yuav ua li cas foom tsis zoo rau cov neeg uas Vajtswv tsis foom phem rau lawv, Lossis kuv yuav ua li cas thuam cov neeg uas tus TSWV tsis thuam!

⁹Kuv sawv saum hauv tsua uas siab xyuam yaj lug kuv ntsia mus pom lawv; Kuv nyob saum ncov roob kuv saib ntsoov lawv. Lawv yog ib haivneeg uas nyob ib cag; lawv tsis suav hais tias lawv nrog lwm haivneeg koom ua ib pab.

¹⁰Yixalayees cov xeebntxwv coob heev suav tsis txheeb li tej hmoov av, Coob kawg li tsis muaj leejtwg yuav suav txheeb. Thov kom thaum tag kuv simneej kuv zoo li Vajtswv haivneeg ib tug; Thov cia kuv tuag thajyeeb lug li tej neeg ncaj ncees tuag.”

¹¹Npalaj hais rau Npala-as hais tias, “Ua cas koj ua li ko rau kuv? Kuv coj koj tuaj, yog kom koj tuaj foom tsis zoo rau kuv cov yeebncuab, tiamsis koj ho foom koob hmoov rau lawv!”

¹²Npala-as teb hais tias, “Kuv tsuas muaj cuabkav hais tau tej lus uas tus TSWV qhib kuv lub qhovncauj hais xwb.”

¹³Tom qab ntawd Npalaj rov hais dua rau Npala-as hais tias, “Koj cia li nrog kuv mus dua rau lwm qhov chaw, koj yuav pom cov Yixalayees ibtxhia thiab. Koj cia li foom tsis zoo rau lawv.”

¹⁴Npalaj coj Npala-as mus rau pem Xaufimes thaj teb uas nyob saum Roob Pinkas. Thaum mus txog saud, Npalaj teeb tau xya lub thaj thiab ib lub thaj twg tua ib tug heev nyiaj thiab ib tug laug yaj hlawv fij rau saud.

¹⁵Npala-as hais rau Npalaj hais tias, “Koj cia li mus sawv ntawm koj tej khoom fij uas hlawv ntawd, kuv yuav mus cuag Vajtswv lawm tid.”

¹⁶Tus TSWV los cuag Npala-as thiab qhia tej lus uas yuav hais rau Npala-as kom coj rov los hais rau Npalaj.

¹⁷Npala-as rov los pom Npalaj tseem sawv nrog cov Mau-am tej thawjcoj, ntawm qhov chaw uas hlawv nws cov khoom fij ntawd. Npalaj nug saib tus TSWV hais li cas,

¹⁸Npala-as cevlus hais tias: “Xipaules tus tub Npalaj, koj cia li los ntawm no thiab mloog tej lus uas kuv hais,

¹⁹Vajtswv tsis zoo li tej neeg uas pheej hais lus dag; Nws tsis yog tus uas pheej yuav hloov siab. Nws coglus li cas, nws yeej ua li ntawd; nws hais li cas, yeej muaj li nws hais.

²⁰Vajtswv tsa kuv ua tus foom koob hmoov, thiab thaum Vajtswv foom koob hmoov rau leejtwg lawm, kuv tsis muaj cuabkav thim tej lus ntawd rov qab.

²¹Kuv twb pom ua ntej lawm hais tias cov Yixalayees lub neej yav tom ntej yuav tsis raug kev txomnyem ib zaug li. Tus TSWV uas yog lawv tus Vajtswv nrog nraim lawv; Thiab lawv hais nrov nrov hais tias nws yog lawv tus vajntxwv.

²²Vajtswv coj lawv nram tebchaws Iziv los; Nws pab lawv ntaus rog ib yam li tus phaw nyujqus.

²³Tej neeg uas txawj ua yeessiv thiab txawj ua khawvkoob, tsis muaj cuabkav tawmtsam haivneeg Yixalayees. Nimno tej neeg yuav hais txog cov Yixalayees hais tias, ‘Cia li saib tej uas tus TSWV ua rau cov Yixalayees!’

²⁴Haivneeg Yixalayees zoo ib yam li tus tsov ntxhuav uas muaj zog heev: Nws yeej tsis so mus txog thaum nws muab tej uas nws tom tau haus ntshav tas, thiab nws yeej tsis pw mus txog thaum uas nws muab noj tas.”

²⁵Ces Npalaj hais rau Npala-as hais tias, “Yog koj tsis kam foom tsis zoo rau cov Yixalayees, mas koj tsis txhob foom koob hmoov rau lawv thiab.”

²⁶Npala-as teb hais tias, “Kuv tsis tau qhia rau koj hais tias, kuv tsuas ua tau tej uas tus TSWV kom kuv ua xwb no los?”

²⁷Npalaj hais tias, “Koj cia li nrog kuv mus, kuv yuav coj koj mus rau lwm qhov chaw. Tej zaum Vajtswv yuav cia koj foom tsis zoo rau lawv.”

²⁸Npalaj coj Npala-as mus rau saum lub ncov Roob Pe-aus uas ntsia ntsoov pom rau tim tiaj suabpuam.

²⁹Npala-as hais rau Npalaj hais tias, “Koj cia li teeb xya lub thaj rau kuv thiab muab xya tus heev nyuj thiab xya tus laug yaj rau kuv.”

³⁰Npalaj ua raws li Npala-as hais, ib lub thaj twg tua ib tug heev nyuj thiab ib tug laug yaj hlawv fij rau saum.