Read Hmong Daw Teev Npe 24 Bible Online

Teev Npe 24 - Hmong Daw bible

Teev Npe 24

¹Zaum no Npala-as paub hais tias, Vajtswv xav kom nws foom koob hmoov rau cov Yixalayees, yog li ntawd nws thiaj tsis mus tsawv hmoov, ib yam li nws tau ua tas los lawm. Nws tig hlo xubntiag mus rau tim tiaj suabpuam,

²thiab pom cov Yixalayees rub tsevntaub nyob ib xeem quas ib xeem. Vajtswv tus ntsujplig tshoov Npala-as siab,

³nws thiaj cevlus hais tias: “Tej lus tseemceeb no yog Npe-aus tus tub Npala-as hais, yog tus txivneej uas pom qhov tseeb tej lus,

⁴kuv yog tus hnov Vajtswv tej lus, kuv yog tus uas lub qhovmuag rua pliav pom ntsoov tej uas Vajtswv tus uas muaj hwjchim loj kawg nkaus ua rau kuv pom.

⁵Cov Yixalayees tej tsevntaub zoo nkauj kawg li,

⁶zoo ib yam li tej leej toovlaj uas nplooj npog luas lossis zoo ib yam li tej vaj zaub uas nyob raws ntug dej, zoo ib yam li tsob ntoo tsw qab uas tus TSWV cog tseg lossis zoo ib yam li tej ntoo ciab uas tuaj ntawm ntug dej.

⁷Lawv lub tebchaws yuav muaj dej nag nplua mias thiab lawv yuav cog tej noob qoob rau thaj teb txuas av noo zaw. Lawv tus vajntxwv muaj hwjchim heev dua vajntxwv Ankas, thiab nws yuav kav lub tebchaws nthuav mus deb thiab dav zuj zus.

⁸Vajtswv coj lawv nram tebchaws Iziv los, nws pab lawv tawmtsam yeebncuab ib yam li tus phaw nyujqus. Lawv rhuav cov yeebncuab, tsoo lawv cov yeebncuab tej pobtxha thiab muab yeebncuab tej xub hneev lov tas.

⁹Haivneeg no zoo ib yam li tus tsov ntxhuav uas muaj zog heev; thaum nws pw tsaug zog lawm, tsis muaj leejtwg tsa tau nws sawv. Tus uas foom koob hmoov rau cov Yixalayees tus ntawd yuav tau koob hmoov, thiab tus uas foom tsis zoo rau cov Yixalayees, tus ntawd yuav raug foom tsis zoo.”

¹⁰Npalaj sawv tsees nyem nrig thiab npautaws vog hais rau Npala-as hais tias, “Kuv coj koj tuaj ntawm no, yog coj tuaj foom tsis zoo rau kuv cov yeebncuab, tiamsis koj tsis foom phem rau lawv, koj cia li foom koob hmoov rau lawv peb zaug rau zaum no lawm.

¹¹Koj cia li rov mus tsev tamsim no! Kuv yeej coglus muab nqi zog rau koj, tiamsis tus TSWV txwv tsis pub koj yuav tej nqi zog no.”

¹²Npala-as teb hais tias, “Kuv twb yeej hais rau cov neeg uas koj txib tuaj hu kuv lawm,

¹³txawm yog koj yuav muab tagnrho tej nyiaj tej kub hauv koj lub txhab nyiaj rau kuv los kuv yeej tsis muaj cuabkav ua ib yam dabtsi li, yog tej ntawd yuav ua rau kuv hla tus TSWV tej lus. Kuv tsuas muaj cuabkav hais tej lus uas tus TSWV kom kuv hais xwb.”

¹⁴Npala-as hais rau Npalaj hais tias, “Nimno kuv yuav rov mus cuag kuv haivneeg, tiamsis ua ntej kuv yuav sawv kev mus, kuv qhia rau koj hais txog tej uas yav tom ntej cov Yixalayees yuav ua rau koj haivneeg.”

¹⁵Ces Npala-as thiaj cevlus hais tias: “Tej lus tseemceeb no yog Npe-aus tus tub Npala-as hais, tej lus no yog tus txivneej uas pom qhov tseeb hais,

¹⁶Kuv yog tus hnov Vajtswv tej lus, thiab khaws nkaus Vajtswv tus uas muaj hwjchim loj kawg nkaus lub tswvyim rau nruab siab. Kuv yog tus uas lub qhovmuag rua pliav saib ntsoov tej uas Vajtswv tus muaj hwjchim loj kawg nkaus ua rau kuv pom.

¹⁷Kuv pom nws, tiamsis tsis yog tamsim no, kuv ntsia ntsoov nws, tiamsis tsis nyob ze, yuav muaj ib lub hnubqub tshwm hauv Yakhauj tuaj, yuav muaj ib tug cwj vajntxwv tshwm hauv cov Yixalayees los. Nws Yuav tsoo cov Mau-am hauvpliaj kom ntsoog, thiab yuav ntaus Xej cov neeg kom swb tagnrho.

¹⁸Nws yuav tua yeej cov Edoos thiab txeeb tau nws cov yeebncuab lub tebchaws los ua nws tug; ces cov Yixalayees yuav muaj yeej loj zuj zus.

¹⁹Cov Yixalayees yuav sawv los tswj teb kav chaw thiab yuav tua cov neeg uas seem hauv tej nroog kom tuag tas.”

²⁰Nyob hauv Npala-as zaj yogtoog, mas nws pom cov Amalej, nws thiaj cevlus hais tias: “Cov Amalej yog haivneeg uas muaj hwjchim loj dua ntais huv tibsi, Tiamsis thaum kawg haivneeg no yuav raug kev puastsuaj tas.”

²¹Nyob hauv Npala-as zaj yogtoog, nws pom cov Kenais, nws thiaj cevlus hais tias: “Nej tej chaw nyob ruaj khov kho, tso siab lug ib yam li tej zes noog uas nyob saum tej hauv tsua uas siab tshaj plaws,

²²Tiamsis cov Kenais, nej yuav raug kev puastsuaj thaum cov Axilias tuaj ntes tau nej lawm.”

²³Npala-as cevlus dua hais tias: “Tuag lauj, yog Vajtswv ua tej no leejtwg tseem yuav muaj sia nyob thiab?

²⁴Cov neeg uas tuaj txeeb yuav tsav nkoj tim Xaipas tuaj; lawv yuav tua yeej cov Axilias thiab cov Enpes, tiamsis thaum kawg, lawv yuav tuag tu noob nrho.”

²⁵Ces Npala-as txawm tu nra thiab sawv kev rov qab mus tsev lawm, Npalaj los kuj sawv kev rov los tsev lawm thiab.