Read Hmong Daw Teev Npe 3 Bible Online

Teev Npe 3 - Hmong Daw bible

Teev Npe 3

¹Ntawm no yog Aloos thiab Mauxes nkawd tsevneeg, thaum lub sijhawm uas tus TSWV hais rau Mauxes saum Roob Xinais.

²Aloos muaj plaub tug tub: Nadas yog tus tub hlob, Anpihus, Ele-axas thiab Ithamas.

³Puavleej muab lawv txhawb meejthawj ua povthawj,

⁴tiamsis Nadas thiab Anpihus nkawd raug tua tuag thaum uas tus TSWV tsis tau hais kom nkawd rauv taws hlawv khoom fij rau tus TSWV tom tiaj suabpuam Xinais. Nkawd tsis tau muaj menyuam; yog li ntawd, Ele-axas thiab Ithamas thiaj tau ua ob tug povthawj rau Aloos pom tas Aloos tiam neej.

⁵Tus TSWV hais rau Mauxes hais tias,

⁶“Coj xeem Levis txav los rau tom hauv ntej no thiab tsa lawv ua Aloos uas yog tus povthawj cov tubtxib.

⁷Lawv yuav ua tej haujlwm hauv tus TSWV lub Tsevntaub sib ntsib, thiab ua cov povthawj lub luag haujlwm thiab ua haujlwm rau cov pejxeem sawvdaws.

⁸Lawv ua cov saib tagnrho tej khoom siv hauv tus TSWV lub Tsevntaub sib ntsib, thiab ua haujlwm rau cov Yixalayees.

⁹Thiab koj yuav tsum muab cov Levis cob rau Aloos thiab nws cov tub; lawv yog cov uas xaiv ntawm cov Yixalayees los muab rau Aloos tagnrho.

¹⁰Koj yuav tsum tsa Aloos thiab nws cov tub ua cov povthawj tuav lub luag haujlwm; yog leejtwg xav txeeb ua, cia li muab tus ntawd tua kom tuag.”

¹¹Tus TSWV hais rau Mauxes hais tias,

¹²“Kuv xaiv cov Levis tawm ntawm cov Yixalayees los hloov tagnrho cov Yixalayees cov tub hlob chaw. Cov Levis yeej yog kuv tug,

¹³rau qhov txhua tus tub hlob puavleej yog kuv tug. Thaum kuv tua cov Iziv tej tub hlob, kuv yeej tshwj tagnrho cov Yixalayees tej tub hlob ua kuv tug, tsis hais neeg lossis tsiaj txhu. Lawv puavleej yog kuv tug. Kuv yog tus TSWV.”

¹⁴Tus TSWV samhwm rau Mauxes tom tiaj suabpuam Xinais

¹⁵kom cia li sau cov Levis npe raws li lawv tej cajces thiab tej tsevneeg. Txhua tus txivneej uas hnubnyoog ib hlis rov saud yuav tsum sau npe huv tibsi,

¹⁶ces Mauxes txawm ua raws li tus TSWV tau hais tseg.

¹⁷Levis muaj peb tug tub hu ua: Nkesoos, Kauhas thiab Melalis, lawv yog cov yawgkoob rau lawv xeem thiab rau lawv cajces.

¹⁸Nkesoos muaj ob tug tub hu ua: Linpenis thiab Sime-is;

¹⁹Kauhas muaj plaub tug tub hu ua: Alamas, Ixehas, Henploos thiab Uxiyees;

²⁰thiab Melalis muaj ob tug tub hu ua: Mahalis thiab Musis. Lawv cov no yog Levis cajces, raws li lawv cov yawgkoob.

²¹Linpenis thiab Seme-is cuab kwvtij no yog cajces ntawm Nkesoos tsevneeg.

²²Suav tagnrho cov txivneej uas hnubnyoog ib hlis rov saud muaj xya txhiab tsib puas leej.

²³Cuab kwvtij no lawv rub tsevntaub nyob rau tom qab lub Tsevntaub sib ntsib sab hnubpoob,

²⁴Tus thawj uas coj Nkesoos cajces yog Layees tus tub Eli-axas.

²⁵Lawv lub luag haujlwm yog ua cov tu tus TSWV lub Tsevntaub sib ntsib, cov ntaub vov sab hauv, cov ntaub vov sab nraud, cov ntaub thaiv qhovrooj,

²⁶cov ntaub xov vaj ncig lub Tsevntaub sib ntsib, lub tshavpuam, lub thaj thiab daim ntaub roojvag uas xov sab nraum lub tshavpuam. Lawv ua cov saib tagnrho tej hlua, thiab txhua yam ntawd huv tibsi.

²⁷Alamas, Ixehas, Henploos thiab Uxiyees lawv cuab kwvtij no yog Kauhas cajces.

²⁸Suav tagnrho cov txivneej uas hnubnyoog ib hlis rov saud muaj yim txhiab rau pua leej.

²⁹Cuab kwvtij no lawv rub tsevntaub nyob txuas nkaus ntawm lub Tsevntaub sib ntsib sab nrad,

³⁰tus thawj uas coj Kauhas cajces, yog Uxiyees tus tub Elixafas.

³¹Lawv lub luag haujlwm yog tu lub Phijxab uas ntim Vajtswv tej lus cog tseg, lub rooj, tus ncej txawb teeb, cov thaj, tej khoom uas cov povthawj siv nyob hauv Chav Dawbhuv, daim ntaub thaiv lub qhovrooj uas mus rau hauv Chav Dawbhuv kawg nkaus, thiab lawv ua cov uas tu txhua yam khoom siv rau tej ntawd.

³²Tus thawj uas coj cov Levis yog tus povthawj Aloos tus tub Ele-axas. Nws ua tus saib cov neeg uas ua haujlwm hauv Chav Dawbhuv.

³³Mahalis thiab Musis nkawd cuab kwvtij yog Melalis cajces.

³⁴Suav tagnrho cov txivneej uas hnubnyoog ib hlis rov saud muaj rau txhiab ob puas leej.

³⁵Lawv cuab kwvtij no rub tsevntaub nyob rau ntawm lub Tsevntaub sib ntsib sab ped, cuab kwvtij no tus thawj yog Anpihais tus tub Xuliyees.

³⁶Lawv lub luag haujlwm yog ua cov saib tus lajkab uas xov ncig lub Tsevntaub sib ntsib, tej nqaj lajkab, tej ncej lajkab, tej tiag taw lajkab, thiab txhua yam khoom uas siv rau tej ntawd.

³⁷Dua li ntawd, lawv tseem ua cov saib tej ncej, tej fab, tej ntsia, thiab tej hlua uas xov ncig lub tshavpuam huv tibsi.

³⁸Mauxes, Aloos thiab Aloos cov tub rub lawv tej tsevntaub nyob rau ntawm tus TSWV lub Tsevntaub sib ntsib sab hnubtuaj. Lawv lub luag haujlwm yog ua cov sawv cev ntawm cov pejxeem Yixalayees nyob hauv Chav Dawbhuv. Yog muaj leejtwg lam mus ua tes haujlwm ntawd yuav raug tua tuag.

³⁹Mauxes suav cov txivneej Levis uas hnubnyoog ib hlis rov saud raws li tus TSWV tau samhwm rau nws lawm, muaj nees nkaum ob txhiab leej.

⁴⁰Tus TSWV hais rau Mauxes hais tias, “Suav tagnrho cov Yixalayees tej tub hlob uas hnubnyoog ib hlis rov saud thiab sau lawv tej npe kom tas huv tibsi.

⁴¹Muab tagnrho cov Levis rau kuv hloov cov Yixalayees tej tub hlob chaw, thiab cov Levis tej tsiaj txhu hloov cov Yixalayees tej tsiaj txhu thawj tus menyuam uas yog tus txiv chaw.”

⁴²Yog li ntawd, Mauxes thiaj sau tagnrho cov Yixalayees tej tub hlob npe, raws li tus TSWV tau samhwm rau nws lawm.

⁴³Thiab txhua tus tub hlob uas hnubnyoog ib hlis rov saud, sau tau npe tagnrho muaj nees nkaum ob txhiab ob puas xya caum peb leeg.

⁴⁴Tus TSWV hais rau Mauxes hais tias,

⁴⁵“Nimno cia li muab cov Levis fij rau kuv hloov tagnrho cov Yixalayees tej tub hlob chaw, thiab muab cov Levis tej tsiaj txhu fij rau kuv hloov cov Yixalayees tej tsiaj txhu chaw.

⁴⁶Vim cov Yixalayees cov tub hlob coob tshaj cov Levis ob puas xya caum peb leeg lawm, mas nej yuav tsum tau txhiv cov tshaj ntawd rov qab.

⁴⁷Ib tug tub twg yuav tsum yog tsib choj nyiaj, raws li nomtswv kevcai,

⁴⁸thiab muab cov nyiaj no rau Aloos thiab nws cov tub.”

⁴⁹Yog li ntawd, Mauxes thiaj khaws cov nyiaj uas cov Yixalayees coj tuaj txhiv lawv cov tub hlob uas cov Levis hloov tsis tas ntawd cia.

⁵⁰Nws khaws cov nyiaj uas cov Yixalayees coj tuaj txhiv lawv cov tub hlob tau ib txhiab peb puas rau caum tsib choj, raws li nomtswv kevcai.

⁵¹Mauxes thiaj muab cov nyiaj no coj mus rau Aloos thiab nws cov tub, raws li tus TSWV tau samhwm rau Mauxes lawm.