Read Hmong Daw Teev Npe 31 Bible Online

Teev Npe 31 - Hmong Daw bible

Teev Npe 31

²“Koj cia li rau txim rau cov neeg Midias pauj tej uas lawv tau ua rau haivneeg Yixalayees tas los lawm. Ces tom qab uas koj ua tej ntawd tiav lawm koj yuav tuag mus.”

³Yog li ntawd, Mauxes txawm hais rau cov pejxeem hais tias, “Cia li npaj cuabyeej kom txhij mus ntaus rog, nej muaj cuabkav tua yeej cov Midias thiab rau txim rau lawv pauj tej uas lawv tau ua rau tus TSWV.

⁴Tso ib xeem Yixalayees twg ib txhiab leej mus ntaus rog.”

⁵Yog li ntawd, ib xeem twg thiaj xaiv tau ib txhiab leej, suav tagnrho kaum ob xeem ntawd xaiv tau kaum ob txhiab tus txivneej mus ntaus rog.

⁶Mauxes tso lawv mus ntaus rog, tus povthawj Ele-axas tus tub Finehas ua tus coj, nws yog tus uas coj tej khoom dawbhuv thiab cov raj xyu uas tshuab txhib tua rog.

⁷Lawv tua cov Midias raws li tus TSWV samhwm rau Mauxes, lawv muab cov txivneej tua tuag tas huv tibsi,

⁸thiab tseem tua cov Midias tsib tug vajntxwv uas yog: Evis, Lekees, Xules, Hules thiab Lenpas tuag huv tibsi. Thiab lawv tseem tua Npe-aus tus tub Npala-as tuag lawm thiab.

⁹Cov Yixalayees thiaj ntes tau tagnrho cov Midias cov pojniam thiab menyuam, tej nyuj, tej yaj thiab huab tagnrho lawv tej nyiaj txiag qoobloo los

¹⁰thiab muab lawv tej nroog tej yeej hlawv kub hnyiab tas.

¹¹Lawv sau tagnrho tej khoom uas lawv huab tau, cov neeg uas lawv ntes tau thiab tsiaj txhu huv tibsi,

¹²coj los cob rau Mauxes, Ele-axas thiab cov Yixalayees hauv lub yeej ntawm tiaj Mau-am uas nyob ntawm ntug Dej Yauladees uas ncaj lub nroog Yelikaus.

¹³Mauxes, Ele-axas thiab cov thawjcoj ntawm cov pejxeem thiaj tawm mus rau nraum ntug yeej, mus tos cov tubrog rov qab los.

¹⁴Mauxes chim heev rau cov thawj tubrog uas kav pawg txhiab thiab kav pawg pua uas rov tom tshavrog los.

¹⁵Mauxes nug lawv hais tias, “Vim li cas nej tseem yuav tseg cov pojniam no ua dabtsi?

¹⁶Nco ntsoov hais tias, lawv twb yog cov niag pojniam uas coj raws li Npala-as tej lus qhia thaum nyob tom Pe-aus. Thiab lawv twb coj cov neeg mus ua tsis ncaj thiab muab tus TSWV tso tseg, vim li ntawd, tus TSWV haivneeg thiaj raug tej kab mob phem.

¹⁷Tamsim no cia li muab txhua tus menyuam tub tua povtseg kom tas thiab muab cov pojniam uas nej nrog pw lawm tua povtseg huv tibsi,

¹⁸tiamsis tseg cov hluas nkauj thiab cov nkaujxwb uas tsis tau deev dua hluas nraug rau nej xwb.

¹⁹Nimno nej txhua tus uas tau tua ib tus twg tuag lossis tau cev tes tuav tej neeg tuag lawm, yuav tsum nyob sab nraum ntug yeej xya hnub. Hnub peb thiab hnub xya ua kevcai ntxuav nej thiab cov pojniam uas nej ntes tau los ntawd tso.

²⁰Thiab nej yuav tsum ua kevcai ntxuav rau tej khaubncaws txhua daim thiab txhua yam uas yog muab tawv tsiaj, plaub tshis lossis ntoo ua huv tibsi.”

²¹Ele-axas uas yog tus povthawj hais rau cov uas rov tom tshavrog los hais tias, “Ntawm no yog tej kevcai uas tus TSWV tau muab cob rau Mauxes.

²²Kub, nyiaj, tooj, hlau, txhuas, tooj dawb

²³thiab txhua yam uas thev taus hluavtaws, nej yuav tsum coj mus hlawv hauv qhovcub thiab muab dej ntxuav thiaj huv. Thiab yam twg uas thev tsis taus hluavtaws, nej yuav tsum muab dej ntxuav thiaj huv.

²⁴Hnub xya nej cia li muab nej tej ris tsho ntxhua; nej thiaj huv thiab los tau rau hauv lub yeej.”

²⁵Tus TSWV hais rau Mauxes hais tias,

²⁶“Koj thiab Ele-axas mus nrog cov thawjcoj ntawm cov pejxeem suav txhua yam uas nej mus huab tau los suav tej neeg uas nej ntes tau los thiab tej tsiaj txhu huv tibsi.

²⁷Thiab muab tej khoom uas huab tau los no faib ua ob pawg, muab ib pawg rau cov tubrog, muab ib pawg rau cov pejxeem.

²⁸Pawg uas yog cov tubrog tug, yuav tsum muab ib leeg ntawm tsib puas leej uas raug ntes los coj mus ua se them rau tus TSWV, thiab tej nyuj, tej neesluav, tej yaj thiab tej tshis los ua ib yam nkaus li ntawd.

²⁹Muab tej ntawd rau tus povthawj Ele-axas ib yam li muab ua khoom pub tshwjxeeb rau tus TSWV.

³⁰Pawg uas yog cov pejxeem tug, muab ib leeg ntawm tsib caug leej uas raug ntes los thiab tej nyuj, tej neesluav, tej yaj thiab tej tshis los ua ib yam nkaus li ntawd. Muab rau cov Levis uas yog cov tu tus TSWV lub Tsevntaub sib ntsib.”

³¹Mauxes thiab Ele-axas nkawd ua raws li tus TSWV tau samhwm rau nkawd lawm.

³²Tagnrho tej uas cov tubrog mus huab tau los thiab cov uas tseg cia rau lawv, muaj rau pua xya caum tsib txhiab tus yaj thiab tshis,

³³xya caum ob txhiab tus nyuj,

³⁴rau caum ib txhiab tus neesluav,

³⁵thiab peb caug ob txhiab tus ntxhais nkaujxwb uas tsis tau deev dua hluas nraug li.

³⁶Thiab ib nrab uas muab faib rau cov tubrog, suav tau peb puas peb caug xya txhiab tsib puas tus yaj thiab tshis,

³⁷cov uas muab rho mus rau tus TSWV yog rau pua xya caum tsib tug;

³⁸peb caug rau txhiab tus nyuj, cov uas muab rho mus rau tus TSWV yog xya caum ob tug;

³⁹peb caug txhiab tsib puas tus neesluav, cov uas muab rho mus rau tus TSWV yog rau caum ib tug;

⁴⁰kaum rau txhiab tus ntxhais nkaujxwb, cov uas muab rho mus rau tus TSWV muaj peb caug ob leeg.

⁴¹Yog li ntawd, Mauxes thiaj coj cov se no mus rau Ele-axas muab pub tshwjxeeb rau tus TSWV, raws li tus TSWV tau hais rau Mauxes lawm.

⁴²Tej khoom uas cov tubrog mus huab tau los Mauxes muab ib nrab faib rau cov pejxeem,

⁴³cov uas faib rau cov pejxeem muaj peb puas peb caug xya txhiab tsib puas tus yaj thiab tshis,

⁴⁴peb caug rau txhiab tus nyuj,

⁴⁵peb caug txhiab tsib puas tus neesluav

⁴⁶thiab kaum rau txhiab tus ntxhais nkaujxwb.

⁴⁷Pawg no Mauxes rho ib leeg ntawm tsib caug leej uas raug ntes los thiab tej tsiaj txhu los rho ib yam nkaus li ntawd, coj mus rau cov Levis uas tu tus TSWV lub Tsevntaub sib ntsib, raws li tus TSWV tau hais rau Mauxes lawm.

⁴⁸Ces cov thawj tubrog thiaj mus cuag Mauxes

⁴⁹thiab tshabxo rau nws hais tias, “Peb cov uas yog koj tubtxib, suav cov tubrog uas nyob hauv peb kev tswjhwm, tsis muaj ib tug ploj li.

⁵⁰Yog li ntawd, peb thiaj nqa tej saw kub, tej kauj toog, tej saw tes, tej nplhaib thiab tej xauv uas peb huab tau los huv tibsi tuaj. Peb coj tej ntawd tuaj fij rau tus TSWV theej peb lub txhoj.”

⁵¹Mauxes thiab Ele-axas thiaj txais tej kub thiab tej saw ntawd.

⁵²Tagnrho tej khoom uas cov thawj tubrog coj tuaj ntawd hnyav tshaj plaub puas choj.

⁵³Cov tubrog, cia lawv yuav tej uas lawv huab tau los.

⁵⁴Yog li ntawd, Mauxes thiab Ele-axas coj tej kub ntawd mus tso rau hauv lub Tsevntaub sib ntsib, tus TSWV thiaj tsomkwm cov Yixalayees.