Read Hmong Daw Teev Npe 5 Bible Online

Teev Npe 5 - Hmong Daw bible

Teev Npe 5

¹Tus TSWV hais rau Mauxes hais tias,

²“Koj hais rau cov Yixalayees kom cia li ntiab txhua tus neeg uas mob ruas lossis mob ua kua paug rau hauv lub cev thiab txhua tus neeg uas ua rau nws tsis huv uas yog mus tuav tej neeg tuag, kom tawm hauv lub yeej mus.

³Muab tagnrho tej neeg tsis huv ntiab tawm mus kom tas, nyob tsam lawv ua rau lub yeej qhov chaw uas yog kuv nrog nej nyob ntawd tsis huv lawm.”

⁴Cov Yixalayees txawm ua li ntawd; lawv thiaj muab cov neeg uas tsis huv ntiab tawm hauv lub yeej mus tas lawm. Lawv ua raws li tus TSWV samhwm rau Mauxes ntag.

⁵Tus TSWV hais rau Mauxes

⁶kom cia li muab tej lus no qhia rau cov Yixalayees. Thaum twg ib tug txivneej lossis ib tug pojniam tau ua txhaum rau ib tug, ces yog nws ua tsis ncaj rau tus TSWV thiab nws yog neeg muaj txim.

⁷Nws yuav tsum mus lees lub txim uas nws ua txhaum ntawd, thiab them nyiaj nees nkaum feem pua ntxiv rau tus uas nws ua txhaum rau lawm.

⁸Tiamsis yog tus neeg ntawd tuag lawm, thiab tsis muaj ib tug kwvtij txheeb ze yuav them cov nyiaj ntawd rau, ces cov nyiaj ntawd yog tus TSWV tug, mas yuav tsum muab rau tus povthawj thiab muab ib tug laug yaj rau tus povthawj tua fij ua kevcai daws tus neeg ntawd lub txim.

⁹Txhua yam khoom uas cov Yixalayees muab pub tshwjxeeb rau tus TSWV puavleej yog tus povthawj uas lawv muab cob rau ntawd tug.

¹⁰Txhua tus povthawj yuav tsum khaws tej khoom uas luag muab pub rau nws lawm cia ua nws tug.

¹¹Tus TSWV samhwm rau Mauxes

¹²kom cia li muab tej lus no qhia rau cov Yixalayees. Yog tus pojniam twg mus ua txhaum thiab ua tsis ncaj rau nws tus txiv

¹³uas yog mus deev lwm tus txivneej nraim nkoos uas nws tus txiv tsis pom, thiab nws tau ua tej kev txhaum uas tsis muaj leejtwg paub, tsis muaj leejtwg ua timkhawv thiab ntes tsis tau;

¹⁴yog nws yeej tau ua tsis ncaj, thiaj ua rau nws tus txiv khib thiab tsis ntseeg nws lossis yog tus pojniam tsis tau ua txhaum, tiamsis tus txiv lam khib thiab tsis ntseeg siab xwb,

¹⁵ces nws yuav tsum coj nws tus pojniam mus cuag tus povthawj. Thiab nws yuav tsum nqa ob choj hmoov nplej mus ua khoom fij, tiamsis tsis txhob muab roj hliv rau lossis tsis txhob muab hmoov tshuaj tsw qab nphoo rau, rau qhov yog cov hmoov nplej uas fij vim txojkev khib siab ua kom qhov tseeb tawm tuaj rau sawvdaws paub.

¹⁶Tus povthawj yuav tsum coj tus pojniam ntawd mus sawv ntawm lub thaj hauv ntej.

¹⁷Nws yuav tsum muab cov dej dawbhuv hliv rau hauv lub tais av thiab muab mentsis hmoov av hauv lub plag Tsevntaub sib ntsib uas yog tus TSWV qhov chaw sib ntsib nphoo rau hauv cov dej ntawd.

¹⁸Ces tus povthawj yuav tsum muab tus pojniam ntawd lub yivtws daws thiab muab cov hmoov nplej uas fij ntawd rau nws tuav ntawm tes. Tus povthawj tuav rawv lub tais dej iab dej daw uas raug foom tsis zoo ntawm nws tes.

¹⁹Ces tus povthawj yuav tsum kom tus pojniam ntawd los tsa tes coglus tabmeeg tus povthawj li no: “Yog koj yeej tsis tau ua txhaum kev nkauj kev nraug, cov dej uas foom tsis zoo no yuav tsis ua rau koj raug kev puastsuaj.

²⁰Tiamsis yog koj saib tsis taus koj tus txiv, koj tau mus ua txhaum uas yog nrog lwm tus txivneej pw uas tsis yog koj tus txiv,

²¹thov kom tus TSWV ua rau koj lub npe raug foom tsis zoo tabmeeg koj haivneeg. Thiab thov kom nws ua rau koj chaw xis qhuav thiab ua rau koj lub tsev menyuam o.

²²Thov kom cov dej iab dej daw uas koj haus mus rau hauv koj lub plab lawm, ua rau koj lub tsev menyuam o thiab koj chaw xis qhuav.” Tus pojniam ntawd yuav tsum txaus siab teb hais tias, “Kuv yeej zoo siab; thov kom tus TSWV ua li ntawd ntag.”

²³Ces tus povthawj yuav tsum muab tej lus foom tsis zoo ntawd sau rau hauv ntawv thiab muab coj mus yaug rau hauv cov dej iab dej daw ntawd.

²⁴Thiab nws yuav tsum muab cov dej iab dej daw uas ris cov lus foom tsis zoo ntawd rau tus pojniam haus, thiab cov dej iab dej daw uas ris cov lus foom tsis zoo yuav nkag mus rau hauv nws lub cev thiab yuav ua mob phem rau nws.

²⁵Ces tus povthawj yuav tsum muab cov hmoov nplej uas yog khoom fij tshem txojkev khib ntawm tus pojniam tes los, thiab nqa mus rau tom lub thaj muab yom fij rau tus TSWV.

²⁶Ces tus povthawj yuav tsum yawm ib phoovtes cov hmoov nplej ntawd coj mus hlawv rau saud lub thaj fij ua kev nco txog. Thaum kawg tus povthawj kom tus pojniam ntawd haus cov dej iab dej daw.

²⁷Yog nws yeej ua txhaum thiab ua tsis ncaj rau nws tus txiv lawm tiag, thaum nws haus cov dej uas ris cov lus foom tsis zoo ntawd mus rau hauv nws lub cev lawm, yuav ua rau nws lub cev mob; nws lub tsev menyuam yuav o thiab nws chaw xis yuav qhuav, thiab nws lub npe los yuav raug foom tsis zoo tabmeeg nws haivneeg.

²⁸Tiamsis yog tus pojniam ntawd yeej tsis tau ua txhaum thiab nws yog neeg ncaj ncees, nws yuav dim lub txim ntawd thiab tseem muaj taus menyuam.

²⁹Tej uas hais tas los no yog txoj kevcai tu plaub ntug ntawm txojkev sib khib, thaum tus pojniam uas tseem nyob hauv nws tus txiv kev tswjhwm los nws cia li mus deev hluas nraug thiab ua txhaum lawm,

³⁰lossis thaum tus txivneej ntawd khib nws tus pojniam, vim tsis ntseeg tus pojniam siab, ces nws yuav tsum coj tus pojniam mus sawv tabmeeg tus TSWV, thiab tus povthawj yuav tsum ua raws li txoj kevcai no txhua nqe.

³¹Tus txiv yuav tsis raug txim dabtsi, tiamsis yog tus pojniam muaj txim tiag, nws yuav tau ris lub txim ntawd.