Read Hmong Daw Nahus 2 Bible Online

Nahus 2 - Hmong Daw bible

Nahus 2

¹Nineves, koj yuav raug luag tua! Lub hwjchim uas yuav tsoo koj twb los txog lawm. Tus tubrog uas tiv thaiv! Cia li zov kev kom zoo! Cia li npaj tos sib tua! (

²Tus TSWV twb rov txhim kho kom haivneeg Yixalayees tau koob meej ib yam li yav thaum ub uas lawv cov yeebncuab tseem tsis tau tuaj tua lawv.)

³Yeebncuab tej tubrog nqa tej daim thaiv hniav ntaj uas liab nploog thiab hnav tej ris tsho uas liab nploog. Lawv yeej npaj txhij tuaj tua rog lawm! Lawv tej tsheb nees ntaus rog cig lam lug cuag nplaim taws! Lawv tej nees khiav rag ntws tuaj!

⁴Lawv tej tsheb nees ntaus rog nias tsaus tsi los rau hauv tej plawv kev, thiab tej nees cab tsheb khiav mus khiav los hauv plawv nroog. Tej tsheb ntawd cig lam lug ib yam li tes tsau thiab cig laim lias cuag xob laim.

⁵Nws hu cov thawj tubrog; thaum lawv sib tw khiav mus lawv dawm ntog pawglug. Lawv khiav nplawg ntia mus rau ntawm tus ntsa yeej thiab rho lawv tej thaiv hniav ntaj los npaj tos.

⁶Tej roojvag uas nyob ze tus dej los qhib lug cia; muaj kev txhawj ntshai loj heev nyob hauv lub loog.

⁷Tus poj vajntxwv los raug ntes coj mus; nws cov ntxhais qhev quaj ntsuag ib yam li nquab quaj; thiab lawv ntaus lawv tej hauvsiab quaj tu siab nrho.

⁸Thaum cov neeg khiav tawm hauv lub nroog Nineves zoo ib yam li cov dej paim hauv lub pasdej tauv. Muaj ib lub suab qw nrov nrov hais tias, “Nres! Nres!” Tiamsis tsis muaj leejtwg tig rov qab li.

⁹Cia li huab tej nyiaj! Cia li huab tej kub! Muaj nyiaj thiab kub puv nkaus hauv lub nroog!

¹⁰Nineves raug puastsuaj ua suabpuam thiab nyob qhuav nquas cia! Lawv tej siab ntsws puas tas vim txojkev txhawj ntshai; lawv tej hauvcaug tshee mos nyoos, lawv zog ntaug thiab ntsejmuag daj tas.

¹¹Puas yog nimno lub nroog ntawd zoo ib yam li lub qhov tsov ntxhuav uas yog qhov chaw tsov pub menyuam mis thiab yog qhov chaw uas tus txiv thiab tus maum tsov ntxhuav mus qhov twg lawm los cov menyuam tsov ntxhuav nyob tso siab plhuav?

¹²Tsov ntxhuav yuav muab tus tsiaj uas nws tom tau dua faib rau lwm tus thiab nws cov menyuam noj; nws yuav muab tej nqaij dua pov pawglug rau hauv nws lub chaw.

¹³Tus TSWV uas muaj hwjchim loj kawg nkaus hais tias, “Kuv yog koj tus yeebncuab ntag! Kuv yuav muab koj tej tsheb nees hlawv kom kub hnyiab tas. Koj cov tubrog yuav raug tua tuag tas rau hauv tshavrog, thiab kuv yuav coj txhua yam uas koj mus txeeb tau ntawm lwm tus los mus huv tibsi thiab yuav tsis hnov koj tej neeg xa xov tej suab ntxiv lawm.”