Read Hmong Daw Hanpakus 3 Bible Online

Hanpakus 3 - Hmong Daw bible

Hanpakus 3

¹Ntawm no yog Hanpakus uas yog tus cev Vajtswv lus, tej lus thov Vajtswv:

²Tus TSWV, kuv tau hnov txog tej uas koj tau ua tas los thiab ua rau kuv ntshai kawg nkaus li. Nimno thov koj rov qab ua koj tej haujlwm tseemceeb uas thaum ub koj twb ua lawm rau peb tiam uas tseem ua neej nyob no pom dua! Txawm yog thaum koj chim heev los thov koj hlub tshua txog peb thiab.

³Vajtswv yuav tuaj hauv lub tebchaws Edoos tuaj dua; Vajtswv tus uas dawbhuv tabtom rov saum tej hauv roob Palas los. Nws lub tshwjchim ci ntsa iab plooj nkaus saum nruab ntug, thiab neeg thoob ntiajteb puavleej ua nws tsaug.

⁴Thaum nws los, nws lub tshwjchim ci ntsa iab cuag xob laim; muaj nplaim taws cig laim lias ntawm nws txhais tes; qhov ntawd yog qhov chaw uas nws zais nws lub hwjchim.

⁵Nws tso tej kab mob mus ua nws ntej thiab kom kev tuag raws nws qab.

⁶Thaum uas nws nres, lub ntiajteb co ua zog koog; thaum nws laj muag ntsia, txhua haivneeg ntshai tshee hnyo. Tej roob uas ibtxwm nyob thaum ub los co ua zog koog; tej ncov roob uas ibtxwm muaj nyob los saus pes zog ploj tas lawm; tej ncov roob ntawd yog tej uas thaum ub nws ibtxwm hla los mus.

⁷Kuv pom cov neeg Kusas ntshai kawg nkaus li thiab cov neeg Midias mas ntshai ua ibce tshee hnyo.

⁸Tus TSWV, puas yog tej dej ntawd ua rau koj chim? Puas yog dej hiavtxwv ua rau koj npautaws? Koj nyob rawv saum tej huab dawb; tauv huab dub yog koj lub tsheb, koj tuaj pab koj haivneeg kom muaj yeej.

⁹Koj npaj rawv yuav tua koj rab hneevnti tuaj, thiab npaj rawv koj xibxub vos tua tuaj lawm xwb. Koj ua kom muaj xob laim tua lub ntiajteb no tawg rhe.

¹⁰Thaum tej roob pom koj, lawv ntshai tshee ua zog koog; dej nchuav laub lug saum nruab ntug los. Tej dej uas nyob hauv qab tivtxwv av nyooj laws tuaj thiab nphau tej niag nthwv siab kawg nkaus li.

¹¹Thaum koj tej xubvos ya ua duab ci nplas ceev heev tuaj, thiab koj tej hmuv ya ua duab ci hob tuaj lawm, lub hnub thiab lub hli txawm nres nkaus rau ntawm nws qhov chaw.

¹²Koj rhais ruam hla lub ntiajteb ua tus chim hnyo tuaj; thiab koj tsuj ntiag txhua haivneeg ua tus npautaws vog.

¹³Koj tuaj cawm koj haivneeg thiab cawm tus vajntxwv uas koj xaiv tseg. Koj muab cov neeg ua phem tus thawjcoj tua povtseg, thiab muab cov neeg uas tuaj nws tog tua tu noob nrho.

¹⁴Koj tua tej xubvos tuaj ntsia nkaus nws tus thawj tubrog thaum nws pab tubrog tuaj ib yam li nthwv nagxob nagcua ntsawj peb tawg ua sab ua sua ib yam li cov neeg uas soj rawv yuav tsimtxom cov neeg pluag.

¹⁵Koj cov nees txauj dej hiavtxwv, thiab hiavtxwv txawm ntas nphau pes nphwv tuaj.

¹⁶Thaum kuv hnov tej xwm no, kuv ntshai tshee hnyo; kuv daim dincauj tshee mos nyoos vim kuv ntshai heev. Kuv ibce tuag tas, thiab kuv ob txhais kotaw sib dawm kuv thiaj ntog. Kuv yuav nyob ntsiag to tos mus txog thaum lub sijhawm uas Vajtswv los rau txim rau cov neeg uas tawmtsam peb tso.

¹⁷Txawm yog tej ntoo txiv ncuavpias tsis tawg paj thiab tej txiv hmab tsis txi txiv, txawm yog tej ntoo roj txiv zeeg tas thiab tej liaj tej teb qoobloo tsis tuaj, txawm yog tej yaj tuag tas thiab tej nkuaj nyug khoob lug cia xwb los

¹⁸kuv tseem muaj kev zoo siab thiab txaus siab, vim muaj tus TSWV uas yog Vajtswv ua kuv tus Cawmseej.

¹⁹Tus TSWV uas kav ib puas tsav yam pub rau kuv muaj zog. Nws ua rau kuv ob txhais kotaw mus kev nplaum ib yam li tus sai, thiab nws tsomkwm kuv kaj siab lug saum tej laj roob.