Read Hmong Daw Xefaniyas 3 Bible Online

Xefaniyas 3 - Hmong Daw bible

Xefaniyas 3

¹Yeluxalees raug kev puastsuaj vim ua tsis ncaj, nws ntxeev siab thiab tsimtxom nws cov neeg.

²Nws yeej tsis mloog tus TSWV tej lus lossis tsis yuav tus TSWV tej lus ntuas. Nws tsis cia siab rau tus TSWV lossis tsis thov tus TSWV pab.

³Nws cov nomtswv zoo ib yam li cov tsov ntxhuav uas nyooj laws xwb; nws cov txiav txim zoo ib yam li cov hma uas tshaib plab heev, noj ntau thiab tsis tseg ib nyuag pobtxha seem cia rau tagkis li.

⁴Cov cev Vajtswv lus tsis muab siab rau ua lawv tej haujlwm, tiamsis ntxias noj ntxias haus nkaus xwb; cov povthawj ua rau qhov chaw dawbhuv tsis tseemceeb lawm thiab hloov Vajtswv txoj kevcai raws li lawv lub siab nyiam.

⁵Tiamsis tus TSWV tseem nyob hauv lub nroog; nws ncaj ncees thiab tsis ua txhaum li. Nws ua ncaj ncees rau nws haivneeg txhua tagkis tsis tu ncua li. Txawm li ntawd los cov neeg tsis ncaj ncees tseem ua txhaum qees tsis paub txajmuag li.

⁶Tus TSWV hais tias, “Kuv twb coj txhua haivneeg mus tas huv tibsi lawm; kuv twb muab lawv tej nroog rhuav puastsuaj tas, tseg lawv tej ntsa loog thiab tej chaw tsomfaj tawg ntsoog ntxaws cia lawm xwb. Tej nroog ua suabpuam tas, thiab tej kev nphob xuav tsis muaj leejtwg taug li.

⁷Kuv xav hais tias kuv haivneeg yuav hwm kuv thiab yuav mloog kuv tej lus ntuas, thiab lawv yuav nco qab ntsoov tej lus uas kuv tau qhia rau lawv. Tiamsis tsis ntev xwb lawv tseem ua phem tshaj li uas lawv ibtxwm ua los lawm.”

⁸Tus TSWV hais tias, “Nej tos mentsis, tos txog hnub uas kuv txiav txim rau txhua haivneeg tso. Kuv yeej txiav txim siab yuav sau txhua haivneeg thiab txhua lub tebchaws los nyob ua ke thiab yuav muab kuv txojkev chim hliv rau lawv. Thoob plaws lub ntiajteb yuav raug kev puastsuaj tas los ntawm cov hluavtaws uas yog kuv txojkev chim.

⁹“Ces kuv yuav muab txhua haivneeg hloov, thiab lawv yuav pehawm kuv tib leeg xwb tsis pe lwm tus vajtswv li lawm. Lawv txhua tus yuav mloog kuv lus.

¹⁰Txawm yog kuv haivneeg uas tawg ua sab ua sua mus nyob deb rau nram tebchaws Sudas lawm los lawv yeej yuav coj khoom tuaj fij rau kuv.

¹¹Thaum txog lub sijhawm ntawd, nej cov uas yog kuv haivneeg yuav tsis txajmuag rau tej uas nej tau ntxeev siab tawmtsam kuv lawm. Kuv yuav muab txhua tus neeg khavtheeb thiab muaj plhus tshem tawm kom tas, thiab nej yuav tsis ntxeev siab rau kuv saum kuv lub Roob Dawbhuv ib zaug ntxiv li lawm.

¹²Kuv yuav cia cov neeg txo hwjchim thiab cov neeg txomnyem nrog nej nyob, lawv thiaj yuav tuaj thov kuv pab lawv.

¹³Cov Yixalayees uas seem yuav tsis ua txhaum rau leejtwg, tsis hais lus dag, lossis dag ntxias lwm tus. Lawv yuav vammeej thiab ua neej nyob kaj siab lug tsis ntshai leejtwg li.”

¹⁴Cov Yixalayees, cia li hu nkauj thiab qw zoo siab! Lub nroog Yeluxalees, cia li zoo siab kom kawg koj lub siab lub ntsws!

¹⁵Tus TSWV twb tseg tsis rau txim rau koj lawm; nws twb muab koj cov yeebncuab tshem tawm tas huv tibsi lawm. Tus TSWV uas yog cov Yixalayees tus Vajtswv yeej nrog nraim koj nyob; nimno tsis txhob ntshai tej kev puastsuaj ib yam dabtsi hlo li lawm.

¹⁶Thaum txog lub sijhawm ntawd lawv yuav hais rau lub nroog Yeluxalees tias, “Lub Nroog Xi-oos, koj tsis txhob ntshai! Tsis txhob cia koj ob txhais tes tsaug leeg hlo li!

¹⁷Tus TSWV uas yog nej tus Vajtswv yeej nrog nraim nej nyob; nws lub hwjchim ua rau nej kovyeej lawm! Tus TSWV yuav txaus siab kawg rau nej vim nws txojkev hlub, nws yuav pub nej muaj lub neej tshiab. Nws yuav hu nkauj thiab zoo siab heev rau nej

¹⁸ib yam li cov neeg uas zoo siab rau rooj noj rooj haus.” Tus TSWV hais tias, “Kuv twb tshem txojkev puastsuaj tawm ntawm nej thiab twb tshem nej txojkev txajmuag tawm huv tibsi lawm.

¹⁹Tabtom txog lub sijhawm lawm lauj! Kuv yuav rau txim rau cov neeg uas tsimtxom nej; kuv yuav cawm txhua tus uas cegtawv thiab yuav coj cov neeg uas raug ntes rov qab los tsev; kuv yuav muab lawv txojkev txajmuag hloov ua kev tau ntsejmuag, thiab txhua haivneeg hauv ntiajteb yuav qhuas lawv.

²⁰Tabtom txog lub sijhawm lawm lauj! Kuv yuav coj nej cov uas tawg mus nyob ua sab ua sua rov los tsev; kuv yuav ua kom nej lub koob lub npe nrov ncha moo lug mus thoob ntiajteb; thiab kuv yuav ua kom nej rov muaj kev vammeej dua ib zaug ntxiv.” Tus TSWV yog tus hais li ntawd.