Read Hmong Daw Xakhaliyas 11 Bible Online

Xakhaliyas 11 - Hmong Daw bible

Xakhaliyas 11

¹Lenpanoos, cia li qhib koj lub qhovrooj, hluavtaws thiaj yuav kub koj tej ntoo ciab!

²Cov ntoo thuv, cia li quaj ntsuag rau qhov tej ntoo ciab twb vau tas lawm; tej ntoo uas muaj meejmom twb raug rhuav puastsuaj tas lawm! Tej ntoo qhib hauv tebchaws Npasas, cia li quaj ntsuag, tej roob ntoo uas tsaus nti twb raug luag muab ntov vau tas lawm!

³Cov nomtswv tsa suab hlo quaj tu siab kawg li; lawv tej meejmom twb poob tas! Cia li mloog tsov ntxuav tej suab nyooj; thaj zoov uas yog lawv qhov chaw nkaum nyob raws tus dej Yauladees raug puastsuaj tas lawm!

⁴Tus TSWV uas yog kuv tus Vajtswv hais rau kuv tias, “Koj cia li ua yam li koj yog ib tug yug yaj uas zov rawv ib pab yaj uas tabtom raug luag coj mus tua.

⁵Cov tswv muab cov yaj tua thiab rov mus tsev tsis raug txim dabtsi. Lawv muab cov nqaij coj mus muag thiab hais tias, ‘Ua tus TSWV tsaug! Peb npluanuj heev!’ Txawm yog lawv yog cov tswv yaj los lawv twb tsis hlub tshua cov yaj.” (

⁶Tus TSWV hais tias, “Kuv yuav tsis hlub ib tug neeg twg nyob hauv ntiajteb no ntxiv lawm. Kuv yuav muab txhua haivneeg cob rau lawv cov nomtswv tes. Cov nomtswv no yuav rhuav lub ntiajteb, thiab kuv yuav tsis cawm lub ntiajteb kom dim ntawm lawv lub hwjchim li.”)

⁷Cov neeg muag yaj thiab cov yuav yaj ntiav kuv ua tug yug cov yaj uas yuav coj mus tua. Kuv muab tau ob tug pas ntoo los: muaj ib tug kuv tis npe hu ua “Nyiam” thiab muaj dua ib tug kuv tis npe hu ua “Koom ua ke.” Thiab kuv ua tus tu pab yaj ntawd.

⁸Kuv txawm ua tsis taus siab ntev rau peb tug yug yaj uas pheej ntxub kuv, kuv thiaj ua rau lawv peb tug ntawd raug puastsuaj tas huv tibsi rau tib lub hlis nkaus xwb.

⁹Ces kuv hais rau cov yaj tias, “Kuv yuav tsis ua nej tus yug yaj ntxiv lawm. Cia cov neeg uas yuav tuag, tuag mus. Cia cov neeg uas yuav puastsuaj, raug puastsuaj mus. Cia cov neeg uas seem, ib leeg ua kom ib leeg raug puastsuaj huv tibsi thiab.”

¹⁰Ces kuv txawm muab tus pas ntoo uas hu ua “Nyiam” los, thiab muab lov, kom rhuav tus TSWV tej lus uas tau cog tseg rau ntau haivneeg lawm.

¹¹Yog li ntawd, tus TSWV tej lus cog tseg thiaj raug muab rhuav hnub ntawd lawm. Cov neeg uas muag yaj thiab cov yuav yaj puavleej tsa qhovmuag saib kuv, thiab lawv paub hais tias yog tus TSWV hais rau kuv txog tej uas kuv ua ntawd ntag.

¹²Kuv hais rau lawv tias, “Yog nej txaus siab, nej cia li them kuv tej nqi zog rau kuv. Tiamsis, yog nej tsis txaus siab, nej muab khaws cia los tau.” Ces lawv thiaj muab tau peb caug daim nyiaj los them kuv.

¹³Tus TSWV hais rau kuv tias, “Koj cia li coj cov nyiaj ko mus tso rau hauv qhov chaw cia nyiaj hauv lub Tuamtsev.” Yog li ntawd, kuv thiaj coj peb caug daim nyiaj uas lawv muab ua nqi zog rau kuv ntawd mus tso rau hauv qhov chaw cia nyiaj hauv lub Tuamtsev lawm.

¹⁴Ces kuv muab tus pas ntoo uas hu ua “Koom ua ke” lov, thiab ua rau cov Yudas thiab cov Yixalayees tawg nyob tsis taus ua ke.

¹⁵Ces tus TSWV hais rau kuv tias, “Koj cia li rov qab ua ib yam li koj yog ib tug yug yaj, thiab zaum no koj ua ib yam li ib tug yug yaj uas tsis tsimtxiaj hlo li.

¹⁶Kuv tau tsa ib tug yug yaj ua tus saib kuv pab yaj, tiamsis nws tsis pab cov yaj uas raug luag ntaus puastsuaj lawm; nws tsis mus nrhiav tus uas ploj lossis tsis kho tus uas raug mob lossis tsis pub zaub rau cov seem noj li. Tiamsis nws xav noj tej yaj uas rog thiab muab yaj tej rau taw tev huv tibsi.

¹⁷Tus yug yaj uas tsis tsimtxiaj li ntawd raug puastsuaj lawm lauj! Nws muab nws pab yaj tso tseg lawm. Kev tsov kev rog yuav rhuav nws lub hwjchim kom puastsuaj. Nws txhais npab yuav qhuav thiab nws lub qhovmuag sab xis yuav dig.”