Read Hmong Daw Xakhaliyas 5 Bible Online

Xakhaliyas 5 - Hmong Daw bible

Xakhaliyas 5

¹Kuv rov tsa qhovmuag ntsia, thiab zaum no kuv pom ib thooj ntawv ya saum nruab ntug.

²Tus timtswv ceebtsheej nug kuv hais tias, “Koj pom dabtsi?” Kuv teb nws hais tias, “Kuv pom ib thooj ntawv ya saum nruab ntug; ntev nees nkaum tshim thiab dav kaum tshim.”

³Ces nws rov hais rau kuv tias, “Thooj ntawv ntawd yog sau tej lus foom phem uas yuav coj tawm mus kom thoob lub tebchaws. Nyob rau ntawm thooj ntawv ntawd muaj ib sab sau hais tias, txhua tus tubsab yuav raug muab tshem tawm hauv lub tebchaws no mus; thiab nyob rau ib sab sau hais tias, txhua tus uas coglus dag yuav raug tshem tawm mus ib yam nkaus.

⁴Tus TSWV uas muaj hwjchim loj kawg nkaus hais tias, nws yuav tso tej lus foom phem tawm mus, thiab tej lus ntawd yuav mus nkag rau hauv txhua tus tubsab thiab txhua tus uas coglus dag tej tsev. Tej lus ntawd yuav nyob hauv lawv tej tsev thiab ua kom lawv puastsuaj tas.”

⁵Tus timtswv ceebtsheej rov los tshwm rau kuv pom thiab hais rau kuv tias, “Koj saib! Muaj dua ib yam tshwm tuaj lawm thiab!”

⁶Kuv nug hais tias, “Qhov ntawd yog dabtsi?” Nws teb hais tias, “Yog ib lub tawb uas piv txog tej kev txhaum uas lub tebchaws no ua.”

⁷Lub hau khwb lub tawb ntawd yog muab tooj dawb ua. Thaum kuv tsa qhovmuag ntsia, lub hau txawm qhib hlo thiab muaj ib tug pojniam zaum hauv lub tawb ntawd!

⁸Tus timtswv ceebtsheej hais tias, “Tus pojniam ntawd piv txog kev phem kev qias.” Ces tus timtswv ceebtsheej txawm muab tus pojniam ntawd nias rov rau hauv lub tawb thiab muab lub hau khwb kiag rau lawm.

⁹Kuv tsa hlo qhovmuag ntsia thiab pom ob tug pojniam ya ncaj nraim los rau ntawm kuv, ob phab tis ntxuaj muaj zog ib yam li tus noog dej. Nkawd cia li tsawv nkaus lub tawb thiab ya plaws lawm.

¹⁰Kuv nug tus timtswv ceebtsheej hais tias, “Nkawd nqa lub tawb mus rau qhov twg lawm?”

¹¹Nws teb hais tias, “Nkawd nqa mus rau tim tebchaws Npanpiloos lawm, nkawd yuav ua ib lub tuamtsev rau lub tawb ntawd. Thaum twg ua tau lub tuamtsev lawm, nkawd yuav muab lub tawb ntawd tso rau hauv, rau tej neeg tuaj pehawm.”