Read Hmong Daw Xakhaliyas 7 Bible Online

Xakhaliyas 7 - Hmong Daw bible

Xakhaliyas 7

¹Xyoo plaub thaum lub cuaj hli ntuj (uas yog lub hli Kislev) hnub xiab plaub uas Dali-us ua vajntxwv kav tebchaws, tus TSWV hais ib co lus rau kuv.

²Cov neeg hauv Npethees tso Salexes, Lenkemelej, thiab lawv cov neeg tuaj rau hauv tus TSWV uas muaj hwjchim loj kawg nkaus lub Tuamtsev, lawv tuaj thov kom tus TSWV foom koob hmoov rau lawv,

³lawv nug cov povthawj thiab cov cevlus hais tias: “Puas tsimnyog uas peb quaj ntsuag vim lub Tuamtsev raug puastsuaj tas, thiab ua kevcai yoo mov rau thaum lub tsib hlis ntuj raws li peb ibtxwm ua los ntau xyoo lawm?”

⁴Ntawm no mus yog cov lus uas tus TSWV hais rau kuv.

⁵Nws hais tias, “Koj cia li qhia rau cov pejxeem uas nyob hauv lub tebchaws no thiab cov povthawj hais tias, qhov uas lawv ua kevcai yoo mov thiab quaj ntsuag thaum lub tsib hlis thiab lub xya hli ntuj uas tau xya caum xyoo los no tsis yog ua hwm kuv.

⁶Thaum lawv noj lawv haus ntawd, tsuas yog ua kom lawv txaus siab nkaus xwb.”

⁷Ntawm no yog tej lus uas tus TSWV hais rau cov cevlus txheej thaum ub uas lub nroog Yeluxalees tseem vammeej thiab muaj neeg nyob puv nkaus hauv, thiab thaum ntawd cov neeg tsis yog nyob hauv tej zos uas nyob ibncig lub nroog ntawd xwb, tiamsis tseem nyob mus rau sab qabteb thiab thoob plaws ntawm tej taw roob uas nyob sab hnubpoob huv tibsi.

⁸Tus TSWV hais cov lus no rau Xakhaliyas tias:

⁹“Kuv twb qhia cov lus no rau kuv haivneeg thaum ub los lawm hais tias: ‘Nej yeej yuav pom txojkev ncaj ncees nyob hauv nej kev coj noj coj ua, thiab nej yuav tsum ua siab dawb siab zoo thiab ib leeg hlub ib leeg.

¹⁰Nej tsis txhob tsimtxom cov pojntsuam, tej menyuam ntsuag thiab cov neeg txawv tebchaws uas nrog nej nyob, lossis tus uas raug kev txomnyem. Thiab tsis txhob nyas nrhw ua phem rau ib leeg tus twg li.’

¹¹“Tiamsis kuv haivneeg tawv ncauj heev tsis mloog kuv lus li. Lawv ntsaws lawv tej pobntseg,

¹²thiab lawv lub siab tawv ib yam li pobzeb. Vim lawv tsis mloog kuv tej lus qhuab qhia uas kuv txib cov cevlus thaum ub mus qhia lawv, kuv thiaj li chim heev.

¹³Rau qhov lawv tsis mloog kuv hais; thaum lawv thov, kuv thiaj tsis teb lawv.

¹⁴Kuv muab lawv ntiab tawm mus nyob rau lwm tebchaws ib yam li cua daj cua dub ntsawj. Thiab muab lub tebchaws uas zoo heev no tso tseg nyob qhuav nquas cia tsis muaj leejtwg nyob lawm.”