Read Hmong Daw Xakhaliyas 9 Bible Online

Xakhaliyas 9 - Hmong Daw bible

Xakhaliyas 9

¹Ntawm no yog tus TSWV cov lus: Nws tau txiav txim rau lub tebchaws Hadakes thiab lub nroog Damaxes. Tsis yog txiav txim rau txhua xeem Yixalayees xwb, tiamsis txiav txim rau cov Xilias lub tuamceeb nroog uas yog tus TSWV tug,

²lub nroog Hamas uas nyob rau ntawm tebchaws Hadakes tus ciamteb, thiab tej nroog uas nyob pem Tiles thiab Xidoos, thiab tagnrho lawv tej kev txawj ntse huv tibsi.

³Lub nroog Tiles tau ua tej chaw fajxwm uas khov heev thaiv nws thiab sau nyiaj sau kub los teeb ua tej pawg cia, ua rau luag saib zoo li tej pawg liamsim xwb.

⁴Tiamsis tus TSWV yuav muab txhua yam uas nws muaj tshem mus povtseg. Tus TSWV yuav muab nws tej kev npluanuj pov rau hauv hiavtxwv, thiab lub nroog yuav raug hlawv kom kub hnyiab tas ua tshauv.

⁵Lub nroog Asekeloos yuav pom tej xwm no thiab yuav ntshai heev. Lub nroog Nkaxas yuav pom tej xwm no thiab yuav mob siab kawg nkaus. Lub nroog Ekiloos los ib yam nkaus, nws yuav tas kev cia siab thiab ntshai tshee hnyo. Lub nroog Nkaxas yuav tsis muaj vajntxwv, thiab yuav muab lub nroog Asekeloos tso cia ua suabpuam.

⁶Ntau haivneeg yuav tuaj nyob sib xyaws ntxaws hauv lub nroog Asedaus. Tus TSWV hais tias, “Kuv yuav muab cov neeg Filitees txo hwjchim kom lawv tsis txhob khavtheeb lawm.

⁷Lawv yuav tseg tsis noj nqaij xyaw ntshav, lossis tej khoom noj uas txwv tsis pub noj lawm. Tagnrho cov neeg uas seem yuav tau los ua kuv haivneeg thiab zoo ib yam li xeem Yudas. Ekiloos yuav tau los ua ib feem ntawm kuv haivneeg ib yam li cov Yenpus twb tau los ua lawm.

⁸Kuv yuav tsomkwm kuv lub tebchaws thiab tsis pub kom muaj tubrog tuaj tau rau hauv. Kuv yuav tsis pub kom kuv haivneeg raug cov neeg Tiles tsimtxom ntxiv lawm. Rau qhov kuv yeej pom ntsoov kuv haivneeg raug kev txomnyem loj kawg li.”

⁹Cov neeg hauv Xi-oos, nej cia li zoo siab, cia li zoo siab! Cov neeg hauv Yeluxalees, nej cia li qw zoo siab hlo! Saib lauj, nej tus vajntxwv tabtom los cuag nej lawm! Nws yog tus ncaj ncees thiab coj kev muaj yeej los, tiamsis nws txo hwjchim thiab caij ib ib tug neesluav los.

¹⁰Tus TSWV hais tias, “Kuv yuav muab tej tsheb nees ua rog tshem tawm ntawm cov Yixalayees, thiab coj tej nees tawm hauv lub nroog Yeluxalees mus; thiab tej hneevnti uas tua rog yuav raug rhuav kom puastsuaj tas. Nej tus vajntxwv yuav ua kom txhua haivneeg muaj kev thajyeeb; nws yuav kav ib lub hiavtxwv rau ib lub hiavtxwv, txij ntua ntawm tus dej Efalates mus txog qab ntuj kawg.”

¹¹Tus TSWV hais tias, “Rau qhov kuv tau nrog nej coglus uas yog muab ntshav ua khoom fij ua lub cim nias rau, kuv yuav tso nej haivneeg kom dim ntawm qhov chaw tsis muaj dej uas luag coj nej mus nyob rov los.

¹²Cov neeg uas raug ntes mus, nimno nej rov muaj kev cia siab lawm, nej cia li rov los; rov los nyob hauv nej lub tebchaws tso siab lug. Nimno kuv qhia rau nej hais tias, kuv yuav them ob npaug rov rau nej thiab foom koob hmoov rau tej uas nej raug kev txomnyem los lawm.

¹³Kuv yuav siv Yudas ib yam li tus tubrog rab hneevnti, thiab siv cov Yixalayees ib yam ib cov xubvos. Kuv yuav siv cov neeg hauv Xi-oos ib yam li rab ntaj mus tua cov neeg Kilis.”

¹⁴Tus TSWV yuav tshwm los rau saum nws haivneeg; nws yuav tua nws tej xubvos ib yam li xob laim. Tus TSWV uas kav ib puas tsav yam tshuab raj tshuab xyu; nws yuav nrog nagxob nagcua tuaj nram sab qabteb tuaj.

¹⁵Tus TSWV uas muaj hwjchim loj kawg nkaus yuav tiv thaiv nws haivneeg, thiab lawv yuav rhuav kom lawv cov yeebncuab puastsuaj tas. Lawv yuav qw ntshoo nrooj hauv tshavrog ib yam li tej neeg qaug cawv, thiab lawv yuav ua rau lawv cov yeebncuab nqaij ntuag ntshav nrog; tej ntshav ntawd yuav ntws ib yam li tej ntshav ua khoom fij uas muab hliv rau saum lub thaj.

¹⁶Thaum txog lub sijhawm ntawd, tus TSWV yuav cawm nws haivneeg, ib yam li tus tswv yug yaj cawm nws pab yaj dim ntawm txojkev puastsuaj. Lawv yuav ci ntsa iab rau lub tebchaws ib yam li lub kausmom kub.

¹⁷Ua cas lub tebchaws yuav zoo thiab zoo nkauj ua luaj! Nplej thiab cawv yuav ua rau cov hluas hlob mos nyoos thiab muaj zog heev.