Read Hmong Daw Mathais 21 Bible Online

Mathais 21 - Hmong Daw bible

Mathais 21

¹Thaum Yexus thiab nws cov thwjtim mus yuav txog lub nroog Yeluxalees, lawv mus txog ntawm lub zos Npefakhes uas nyob ntawm roob txiv ntoo roj. Yexus txawm txib ob tug thwjtim ua ntej mus

²thiab qhia nkawd hais tias, “Neb cia li ncaj nraim mus rau hauv lub zos uas nyob tom neb hauv ntej, thaum neb mus txog neb yuav pom ob niamtub neesluav khi cia qhov ntawd. Neb cia li daws thiab cab los rau kuv.

³Yog muaj leejtwg nug neb, neb cia li teb hais tias, ‘Tus Tswv xav siv’; ces tus ntawd yuav cia neb cab los tamsim ntawd.”

⁴Muaj li no kom tiav raws li tus cev Vajtswv lus tau qhia tseg lawm hais tias,

⁵“Cia li qhia rau cov neeg uas nyob hauv lub nroog Xi-oos hais tias nej tus vajntxwv tabtom los cuag nej! Nws txo hwjchim thiab caij ib tug menyuam neesluav los.”

⁶Ob tug thwjtim txawm mus ua raws li Yexus qhia.

⁷Nkawd thiaj cab tau ob niamtub neesluav los, nkawd hle nkawd ob lub tsho ntev los pua tus menyuam neesluav nraubqaum rau Yexus caij.

⁸Cov neeg coob coob uas nrog Yexus mus ntawd, muaj ibtxhia hle lawv tej tsho los pua kev, thiab ibtxhia txiav nplooj ntoos los pua kev.

⁹Cov neeg coob coob uas mus ua Yexus ntej thiab cov uas raws Yexus qab qw nrov nrov hais tias, “Cia li qhuas Daviv tus Tub! Thov Vajtswv foom koob hmoov rau tus uas Vajtswv txib los! Cia li qhuas Vajtswv tus uas nyob saum ntuj ceebtsheej!”

¹⁰Thaum Yexus mus txog hauv lub nroog Yeluxalees lawm, cov neeg uas nyob hauv lub nroog, ras zom zaws thiab sib nug hais tias, “Tus no yog leejtwg?”

¹¹Cov neeg coob coob ntawd teb hais tias, “Tus no yog Yexus uas yog ib tug cev Vajtswv lus, nws tuaj pem lub nroog Naxales uas nyob hauv lub xeev Kalilais tuaj.”

¹²Yexus mus rau ntawm lub Tuamtsev, thiab ntiab cov neeg uas tuaj ua lag ua luam ibncig ntawm lub Tuamtsev tawm mus. Nws muab cov neeg pauv nyiaj tej rooj thiab cov neeg uas muag nquab tej rooj zaum ntxeev pes hlo.

¹³Yexus hais rau lawv hais tias, “Vajtswv Txojlus sau tseg hais tias, ‘Sawvdaws yuav hu kuv lub Tuamtsev hais tias, yog lub tsev uas thov Vajtswv.’ Tiamsis nej muab ua qhov chaw rau tubsab nkaum!”

¹⁴Muaj cov neeg digmuag thiab cegtawv tuaj cuag Yexus hauv lub Tuamtsev, thiab Yexus kho lawv txhua tus zoo huv tibsi.

¹⁵Thaum cov thawj ntawm cov povthawj thiab cov xibhwb uas qhia Vajtswv txoj Kevcai pom tej txujci tseemceeb uas Yexus ua ntawd, thiab hnov cov menyuam yaus uas tuaj nyob hauv lub Tuamtsev qw hais tias, “Cia li qhuas Daviv tus Tub!” Ces lawv chim kawg li.

¹⁶Lawv hais rau Yexus hais tias, “Koj tsis hnov tej lus uas cov menyuam ntawd hais los?” Yexus teb hais tias, “Kuv hnov. Nej tsis tau nyeem Vajtswv Txojlus uas hais tias, ‘Koj twb cob cov menyuam yaus thiab cov menyuam mos liab kom paub qhuas Vajtswv lawm los.’ ”

¹⁷Yexus txawm ncaim lawv thiab tawm hauv lub nroog mus pw tom lub zos Npethanis lawm.

¹⁸Hnub tom qab thaum sawv ntxov, Yexus taug kev rov mus rau tom lub nroog, nws tshaib plab.

¹⁹Nws pom ib tsob txiv ncuavpias nyob ntawm ntug kev, nws txawm mus saib, tiamsis tsis pom muaj txiv li, tsuas muaj nplooj xwb. Yexus hais rau tsob ntoo hais tias, “Txij no mus koj yuav tsis tau txi txiv ib zaug li lawm!” Tamsim ntawd tsob txiv ncuavpias txawm cia li qhuav lawm.

²⁰Thaum cov thwjtim pom li ntawd lawv xav tsis thoob thiab hais tias, “Ua li cas tsob txiv ncuavpias no yuav tuag sai ua luaj li ntawd?”

²¹Yexus teb hais tias, “Kuv qhia tseeb rau nej hais tias, yog nej ntseeg tiag tiag, nej yeej muaj cuabkav ua tau ib yam li kuv ua rau tsob txiv ncuavpias no. Tsis tas li ntawd xwb, yog nej hais rau lub roob no hais tias, ‘Cia li txav lawm nram dej hiavtxwv,’ ces lub roob yeej yuav mus raws li nej hais.

²²Yog nej ntseeg tiag, nej thov yam twg, nej yuav tau yam ntawd.”

²³Yexus rov mus rau hauv lub Tuamtsev; thaum nws tabtom qhia, cov thawj ntawm cov povthawj thiab cov txwjlaug txawm tuaj nug Yexus hais tias, “Ua li cas koj muaj cai tuaj ua tej no? Leejtwg tso cai rau koj?”

²⁴Yexus teb lawv hais tias, “Kuv yuav nug nej ib los, yog nej teb tau, kuv mam li qhia rau nej paub hais tias yog vim li cas kuv muaj cai ua tej no.

²⁵Leejtwg tso cai rau Yauhas muab neeg ua kevcai raus dej, Vajtswv lossis neeg?” Lawv txawm sib tham hais tias, “Yog peb teb hais tias, ‘Vajtswv kom Yauhas ua,’ nws yuav hais rau peb hais tias, ‘Vim li cas nej ho tsis ntseeg Yauhas tej lus?’

²⁶Yog peb teb hais tias, ‘Neeg kom Yauhas ua,’ Peb ntshai nyob tsam cov pejxeem ho ua phem rau peb, rau qhov sawvdaws yeej paub hais tias Yauhas yog ib tug cev Vajtswv lus.”

²⁷Yog li ntawd, lawv thiaj teb Yexus hais tias, “Peb tsis paub!” Yexus hais rau lawv hais tias, “Yog li ntawd, kuv yuav tsis qhia rau nej paub hais tias yog leejtwg tso cai rau kuv ua tej no thiab.”

²⁸“Nej xav li cas? Muaj ib tug txivneej muaj ob tug tub. Leej txiv mus hais rau tus tub hlob hais tias, ‘Metub, hnub no koj mus tu kuv lub vaj txiv hmab.’

²⁹Tus tub teb hais tias, ‘Kuv tsis mus.’ Tiamsis tom qab ntawd nws txawm mus lawm.

³⁰Leej txiv ho mus hais rau tus tub yau ib yam li ntawd thiab. Tus tub yau teb hais tias, ‘Txiv, kuv mam li mus.’ Tiamsis nws tsis mus.

³¹Ob tug tub no, tus twg yog tus uas mloog leej txiv lus?” Lawv teb hais tias, “Yog tus tub hlob.” Yexus hais rau lawv hais tias, “Kuv qhia rau nej hais tias, cov neeg sau se thiab cov niamntiav yuav xub tau mus rau hauv Vajtswv lub Tebchaws ua ntej nej.

³²Rau qhov Yauhas tus uas muab neeg ua kevcai raus dej twb los qhia txojkev ncaj ncees rau nej, tiamsis nej tsis ntseeg, tsuas yog cov neeg sau se thiab cov niamntiav thiaj ntseeg xwb. Txawm yog nej pom li ntawd los nej tsis tso nej tej kev txhaum tseg thiab los ntseeg nws tej lus.”

³³Yexus hais tias, “Nej mloog, kuv yuav qhia ib zaj lus pivtxwv rau nej. Muaj ib tug tswv vaj, nws xov tau ib lub vaj thiab cog txiv hmab rau hauv, nws khawb ib lub qhov tsuam txiv hmab thiab ua lub chaw tsomfaj zov. Nws muab tso rau ib cov neeg tu sib faib cov txiv, ces nws txawm mus rau lwm tebchaws lawm.

³⁴Thaum txog lub caij de txiv hmab, nws txawm txib nws cov tubtxib mus sau cov txiv hmab uas yog nws tug los rau nws.

³⁵Tiamsis cov neeg uas tu lub vaj txawm muab tus tswv cov tubtxib ntes, muab ib tug ntaus, muab ib tug tua thiab muab pobzeb ntaus ib tug.

³⁶Tus tswv txib dua ib cov tubtxib coob dua thawj pab mus, cov neeg uas tu lub vaj kuj ua phem rau cov tubtxib ntawd ib yam nkaus li thawj zaug thiab.

³⁷Thaum kawg tus tswv vaj txib nws tus tub mus cuag lawv. Nws xav hais tias, ‘Lawv yuav hwm kuv tus tub.’

³⁸Tiamsis thaum cov neeg uas tu lub vaj pom tus tswv tus tub tuaj, lawv sib tham hais tias, ‘Tus no yog tus tswv vaj tus tub, peb cia li muab nws tua povtseg, peb thiaj tau nws lub vaj!’

³⁹Lawv txawm ntes kiag nws, muab nws thawb mus rau sab ntug vaj nraud thiab muab nws tua povtseg.”

⁴⁰Yexus nug hais tias, “Thaum tus tswv vaj rov qab los, nws yuav ua li cas rau cov neeg uas tu lub vaj ntawd?”

⁴¹Lawv teb hais tias, “Nws yuav muab cov neeg siab phem uas tu lub vaj ntawd tua povtseg huv tibsi, thiab muab lub vaj ntawd rau lwm cov tu. Thaum txog lub caij faib txiv hmab, lawv yuav faib cov uas yog nws tug rau nws.”

⁴²Yexus hais rau lawv hais tias, “Nej tsis tau nyeem Vajtswv Txojlus uas hais tias, ‘Lub pobzeb uas cov kws ua tsev muab povtseg, lub ntawd twb los ua lub thawj lawm. Qhov no yog tus Tswv ua; peb pom li ntawd, peb xav tsis thoob li!’ ”

⁴³Yexus hais ntxiv hais tias, “Kuv qhia rau nej hais tias, Vajtswv yuav muab nws lub Tebchaws tshem tawm ntawm nej mus rau ib haivneeg uas mloog Vajtswv lus.”

⁴⁴[Yog leejtwg ntog tsoo lub pobzeb ntawd, tus ntawd lub cev yuav tawg tas, yog lub pobzeb ntawd poob los tsoo leejtwg, tus ntawd lub cev yuav ntsoog tas huv tibsi.]

⁴⁵Thaum cov thawj ntawm cov povthawj thiab cov Falixais hnov tej lus pivtxwv uas Yexus qhia ntawd, lawv paub hais tias yog Yexus hais txog lawv.

⁴⁶Ces lawv txawm xav ntes Yexus tamsim ntawd, tiamsis lawv ntshai cov pejxeem, rau qhov sawvdaws yeej paub hais tias Yexus yog ib tug cev Vajtswv lus.