Read Hmong Daw Mathais 24 Bible Online

Mathais 24 - Hmong Daw bible

Mathais 24

¹Thaum Yexus tabtom tawm ntawm lub Tuamtsev mus, nws cov thwjtim txawm taw tes kom Yexus saib tej tsev uas nyob ibncig lub Tuamtsev.

²Yexus hais tias, “Yog tiag, nej twb pom tej tsev no lawm? tiamsis kuv qhia tseeb rau nej hais tias, tej pobzeb uas muab sib dhos ua ke ntawd txhua lub yuav pluam nyias nyob nyias tas huv tibsi.”

³Thaum Yexus nyob pem lub Roob Txiv Ntoo Roj, nws cov thwjtim los cuag nws twjywm thiab nug hais tias, “Thov koj qhia rau peb saib thaum twg mam li muaj tej no, thiab yuav muaj yam twg qhia rau peb paub hais tias, twb txog lub sijhawm uas koj yuav los thiab lub ntiajteb yuav kawg.”

⁴Yexus teb hais tias, “Nej yuav tsum ceevfaj, tsis txhob pub leejtwg dag ntxias tau nej yuam kev.

⁵Yuav muaj ntau leej tuav kuv lub npe dag ntxias nej hais tias, ‘Kuv yog tus Mexiyas!’ thiab lawv yuav dag ntxias ntau leej yuam kev.

⁶Nej yuav hnov suab ntaj suab riam nyob ze nej thiab yuav hnov tej tebchaws uas nyob deb ua tsov ua rog; nej tsis txhob poob siab, yeej yuav xub muaj tej ntawd, tiamsis tej ntawd tsis tau qhia hais tias twb txog lub sijhawm ntiajteb kawg lawm.

⁷Ib lub tebchaws yuav sawv tawmtsam ib lub tebchaws; thiab ib haivneeg yuav sawv tawmtsam ib haivneeg. Yuav muaj kev tshaib kev nqhis thiab av yuav qeeg txhua qhov.

⁸Tej ntawd zoo ib yam li tus pojniam uas nyuam qhuav pib mob plab yuav yug menyuam.

⁹“Thaum ntawd yuav muaj neeg ntes nej coj mus tsimtxom thiab muab nej tua povtseg. Txhua haivneeg yuav ntxub nej, vim nej yog cov uas ntseeg kuv.

¹⁰Lub sijhawm ntawd yuav muaj ntau leej tso kev ntseeg tseg; lawv ib leeg yuav ntxeev siab rau ib leeg thiab ib leeg yuav ntxub ib leeg.

¹¹Yuav muaj cov cevlus cuav coob leej dag ntxias kom neeg coob leej yuam kev.

¹²Thaum tej kev phem huam loj heev, sawvdaws yuav tsis txawj sib hlub lawm.

¹³Tiamsis tus uas ua siab ntev mus txog hnub kawg, tus ntawd yuav dim.

¹⁴Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg.

¹⁵“Nej yuav pom luag muab yam uas ‘Phem Kawg Nkaus’ tso rau hauv qhov chaw dawbhuv, raws li Daniyees tus uas cev Vajtswv lus tau hais tseg lawm.” (Tus uas nyeem zaj no, cia li totaub!)

¹⁶“Thaum ntawd cov neeg uas nyob hauv lub xeev Yudas, cia li khiav mus rau pem tej roob.

¹⁷Tus uas nyob nraum zoov, tsis txhob mus nqa ib yam dabtsi hauv tsev.

¹⁸Tus uas nyob tom teb, tsis txhob rov los nqa nws lub tsho ntev.

¹⁹Lub sijhawm ntawd, tej pojniam uas suab menyuam thiab cov pojniam uas muaj menyuam mos noj mis yuav txomnyem kawg li!

²⁰Nej cia li thov Vajtswv pab kom nej tsis txhob tau khiav lub caij ntuj no lossis Hnub Xanpataus!

²¹Rau qhov lub sijhawm ntawd sawvdaws yuav txomnyem kawg nkaus, txij thaum chivkeeb los txog niaj hnub no yeej tsis tau muaj kev txomnyem npaum li zaug no. Thiab yav tom ntej yuav tsis muaj li zaum no lawm.

²²Tiamsis Vajtswv twb txiav hnub txiav nyoog kom luv lawm. Yog nws tsis ua li ntawd yeej yuav tsis muaj ib tug dim li. Qhov uas Vajtswv txiav hnub txiav nyoog kom luv li ntawd yog vim nws hlub haivneeg uas nws tau xaiv cia lawm.

²³“Thaum ntawd yog leejtwg hais rau nej hais tias, ‘Nej saib, tus Mexiyas nyob ntawm no!’ lossis hais tias, ‘Nws nyob tod!’ los nej tsis txhob ntseeg tus ntawd tej lus.

²⁴Rau qhov yuav muaj tus Mexiyas cuav thiab tej cevlus cuav los ua tej txujci tseemceeb ntxias Vajtswv haivneeg, saib puas yuav ntxias tau kom lawv yuam kev.

²⁵Nej yuav tsum nco ntsoov tej lus uas kuv twb qhia rau nej no lawm.

²⁶“Yog leejtwg hais rau nej hais tias, ‘Nej saib, nws nyob tom roob mojsab qhua!’ Nej tsis txhob mus saib lossis lawv hais tias, ‘Nej saib, nws nkaum ntawm no!’ Nej tsis txhob ntseeg.

²⁷Rau qhov hnub uas Neeg Leej Tub los, yuav zoo ib yam li xob laim tim sab hnubtuaj ci mus txog rau tim sab hnubpoob.

²⁸“Cev tuag nyob qhov twg, dav npoj yuav sau nthwv los rau qhov ntawd.

²⁹“Lub sijhawm uas tej kev txomnyem ntawd dhau lawm, lub hnub yuav tsaus, lub hli yuav tsis ci, tej hnubqub saum ntuj yuav poob los, thiab txhua yam uas muaj hwjchim nyob saum nruab ntug yuav ua zog koog tas huv tibsi.

³⁰Thaum ntawd nej yuav pom ib lub cim tshwm saum nruab ntug qhia hais tias Neeg Leej Tub yuav los. Txhua haivneeg hauv qab ntuj no yuav quaj nyiav ntsoog qees thaum lawv pom Neeg Leej Tub nrog nws lub tshwjchim uas ci ntsa iab thiab nws lub hwjchim los saum ntuj los.

³¹Nws yuav txib nws cov timtswv tshuab raj tshuab xyu nrov nrov hu. Lawv yuav mus sau cov neeg uas nws xaiv cia lawm txhua nrho plaub ceg kaum ntuj, sab ntuj tim no mus txog sab ntuj tim ub los nyob ua ke.

³²“Nej saib tsob txiv ncuavpias qhia li cas. Thaum nws tej ceg rov ntsuab thiab pib hlav nplooj mos nyoos, nej paub hais tias twb yuav txog lub caij ntuj nag.

³³Ib yam nkaus li ntawd, thaum nej pom tej ntawd, nej yuav paub hais tias nws twb los ze ntawd qhovrooj lawm.

³⁴Kuv qhia tseeb rau nej hais tias thaum cov neeg tiam no tseem tuag tsis taus tas, twb xub muaj tej ntawd lawm.

³⁵Lub ntuj thiab lub ntiajteb yuav ploj mus, tiamsis kuv tej lus yuav tsis muaj ib los poob li.

³⁶“Tiamsis hnub ntawd thiab lub sijhawm ntawd tsis muaj leejtwg paub, txawm yog cov timtswv ceebtsheej lossis Neeg Leej Tub los yeej tsis paub li; tsuas yog Leej Txiv tib leeg thiaj paub xwb.

³⁷Lub sijhawm uas Neeg Leej Tub los yuav zoo ib yam li tej uas tshwmsim rau tiam Nau-es nyob.

³⁸Thaum dej tseem tsis tau los nyab ntiajteb, sawvdaws ua noj ua haus, ua tshoob ua kos mus txog hnub uas Nau-es nce mus rau hauv lub nkoj;

³⁹lawv tsis paub mus txog thaum dej los nyab thiab kuav lawv mus tas huv tibsi li cas, ces thaum Neeg Leej Tub los yuav zoo ib yam li ntawd.

⁴⁰Lub sijhawm ntawd muaj ob tug txivneej ua haujlwm ua ke tom teb, yuav coj ib tug mus tseg ib tug cia.

⁴¹Muaj ob tug pojniam zom zeb ua ke: yuav coj ib tug mus tseg ib tug cia.

⁴²Nej yuav tsum ceevfaj zov tos, rau qhov nej tsis paub lub sijhawm uas nej tus Tswv yuav los.

⁴³Nej yeej paub hais tias, yog tus tswv tsev xub paub hais tias, thaum twg tubsab yuav tuaj, nws yeej yuav zov tos tsis pub tubsab los tau rau hauv nws tsev.

⁴⁴Yog li ntawd, nej yuav tsum zov tos, rau qhov Neeg Leej Tub yuav los lub sijhawm uas nej tsis ceevfaj.

⁴⁵“Tus tubtxib uas ncaj thiab muaj tswvyim, tus tswv yuav tsa nws ua tus loj uas saib tus tswv cov tubtxib, thiab thaum txog sijhawm noj, tus ntawd yuav ua tus faib zaub faib mov rau cov tubtxib noj.

⁴⁶Thaum tus tswv rov los pom tus tubtxib ntawd tabtom ua tej haujlwm no, ces tus tubtxib ntawd yuav tau ntsejmuag!

⁴⁷Kuv qhia tseeb rau nej hais tias, tus tswv yuav tsa tus tubtxib ntawd ua tus saib tus tswv tej qhov txhia chaw.

⁴⁸Tiamsis yog tus tubtxib muaj lub siab phem, thiab xav hais tias tshuav ntev kuv tus tswv mam rov los,

⁴⁹ces nws txawm muab cov tubtxib ntaus thiab mus nrog cov neeg quav cawv noj haus ua ke.

⁵⁰Nws tsis paub hnub twg thiab lub sijhawm twg, nws tus tswv yuav los, nws thiaj tsis ceevfaj.

⁵¹Tus tswv yuav muab tus tubtxib ntawd hlais ua tej daim, thiab muab nws pov mus nrog cov neeg uas ntsejmuag ncaj siab nkhaus nyob. Lawv yuav quaj tom hniav qawv qhov ntawd.