Read Hmong Daw Malakaus 1 Bible Online

Malakaus 1 - Hmong Daw bible

Malakaus 1

¹Ntawm no yog Txojmoo Zoo uas hais txog Yexus Khetos uas yog Vajtswv tus Tub.

²Lub hauvpaus chiv yog raws li Yaxayas uas yog tus cev Vajtswv lus tau sau tseg lawm hais tias, “Vajtswv hais tias, ‘Kuv yuav txib kuv tus tubtxib ua koj ntej mus kho kev tos koj.’

³Muaj ib tug hais nrov nrov tom roob mojsab qhua hais tias, ‘Cia li kho kev tos tus Tswv; kho kev kom ncaj nws yuav los!’ ”

⁴Yauhas tus uas muab neeg ua kevcai raus dej tawm tom roob mojsab qhua los; nws muab neeg ua kevcai raus dej thiab qhuab qhia hais tias, “Nej yuav tsum tso nej tej kev txhaum tseg thiab ua kevcai raus dej, Vajtswv thiaj yuav zam nej lub txim.”

⁵Cov neeg uas nyob thoob plaws hauv lub xeev Yudas thiab hauv lub nroog Yeluxalees tuaj mus mloog Yauhas qhuab qhia. Lawv txhua tus nyias lees nyias lub txim, thiab Yauhas muab lawv ua kevcai raus dej hauv tus dej Yauladees.

⁶Yauhas hnav cev ris tsho uas muab plaub ntxhuav ua, nws sia siv tawv, nws noj kooj thiab zib ntab.

⁷Yauhas qhia hais tias, “Tus uas yuav lawv kuv qab los tseem muaj hwjchim loj dua kuv. Kuv twb tsis tsimnyog khoov mus daws nws txoj nyuag hlua khau.

⁸Kuv muab nej ua kevcai raus rau hauv dej, tiamsis tus ntawd yuav muab nej ua kevcai raus los ntawm Vaj Ntsujplig tus Dawbhuv.”

⁹Tom qab ntawd tsis ntev Yexus txawm tuaj pem lub zos Naxales uas nyob hauv lub xeev Kalilais tuaj, thiab Yauhas muab nws ua kevcai raus dej hauv tus dej Yauladees.

¹⁰Thaum Yexus sawv hauv dej los, tamsim ntawd Yexus txawm pom rooj ntug qhib plho, thiab pom Vaj Ntsujplig zoo li ib tug nquab los rau saum Yexus.

¹¹Thiab Yexus hnov ib lub suab hais saum ntuj tuaj hais tias, “Koj yog kuv tus Tub uas kuv hlub. Kuv txaus siab rau koj.”

¹²Tamsim ntawd Vaj Ntsujplig kom Yexus mus rau tom roob mojsab qhua;

¹³Yexus nyob tod tau plaub caug hnub, dab Ntxwgnyoog sim Yexus siab. Yexus nrog tej tsiaj qus nyob, tiamsis muaj ib co timtswv ceebtsheej los tu Yexus.

¹⁴Thaum lawv muab Yauhas kaw lawm, tom qab ntawd Yexus txawm mus rau pem Kalilais thiab qhia Vajtswv Txojmoo Zoo ped.

¹⁵Yexus qhia hais tias, “Twb txog lub sijhawm uas Vajtswv lub Tebchaws los ze lawm! Nej cia li tso nej tej kev txhaum tseg los ntseeg Txojmoo Zoo!”

¹⁶Thaum Yexus tabtom taug ntug dej Hiavtxwv Kalilais mus, nws pom ob tug neeg nrhiav ntses uas yog Ximoos thiab nws tus kwv Adales tabtom muab vas ntaus ntses hauv hiavtxwv.

¹⁷Yexus hais rau nkawd hais tias, “Neb cia li nrog kuv mus, kuv yuav qhia kom neb paub mus nrhiav neeg.”

¹⁸Tamsim ntawd, nkawd txawm tso plhuav nkawd ob lub vas tseg thiab nrog Yexus mus.

¹⁹Yexus mus tom ntej mentsis, nws pom dua ob tug kwvtij uas yog Yakaunpaus thiab Yauhas; nkawd yog Xenpedais tub. Nkawd tabtom ntxiv vas hauv nkoj.

²⁰Thaum Yexus pom dheev nkawd Yexus txawm hu nkawd los; nkawd txawm tso nkawd txiv Xenpedais thiab cov tubtxib tseg rau hauv lub nkoj, thiab nkawd nrog Yexus mus.

²¹Yexus thiab nws cov thwjtim mus txog hauv lub nroog Kapena-us, Hnub Xanpataus Yexus mus qhuab qhia hauv lub tsev sablaj.

²²Cov neeg uas tuaj mloog Yexus qhuab qhia, lawv xav tsis thoob li, rau qhov Yexus tej lus qhia tseemceeb heev; nws qhia tsis thooj li cov xibhwb uas qhia Vajtswv txoj Kevcai qhia.

²³Tamsim ntawd muaj ib tug txivneej raug dab los rau hauv tsev sablaj; nws qw nrov nrov hais tias,

²⁴“Yexus uas yog neeg Naxales, koj tuaj ua kom peb puastsuaj los? Kuv paub koj yog leejtwg, koj yog Vajtswv tus tubtxib uas dawbhuv!”

²⁵Yexus hais tawv tawv rau dab hais tias, “Koj tsis txhob hais lus, koj cia li tawm hauv tus txivneej no mus!”

²⁶Dab txawm ua rau tus txivneej ntawd huam ib tshaj thiab qw nrov nrov, ces dab txawm tawm plaws lawm.

²⁷Cov neeg uas nyob ntawd xav tsis thoob li, lawv txawm sib nug hais tias, “Muaj dua ib zaj lus qhia tshiab los ua cas? Tus txivneej no muaj hwjchim ntiab tau dab, thiab dab kuj mloog nws lus!”

²⁸Yexus lub moo txawm nrov ncha mus thoob plaws txhua qhov hauv lub xeev Kalilais.

²⁹Yakaunpaus, Yauhas thiab tagnrho Yexus cov thwjtim nrog Yexus tawm hauv tsev sablaj mus rau tom Ximoos thiab Adales tsev.

³⁰Ximoos niamtais ua npaws thiab pw saum txaj; thaum Yexus mus txog ntua hauv tsev, muaj neeg qhia rau Yexus hais tias Ximoos niamtais mob.

³¹Yexus txawm mus saib nws; Yexus tuav nws tes rub nws sawv. Ces nws txawm zoo thiab sawv los ua zaub ua mov rau lawv noj.

³²Thaum hnub poob qho uas yuav tsaus ntuj muaj neeg coj tej neeg uas muaj mob thiab tej neeg uas raug dab tuaj cuag Yexus.

³³Tej neeg zejzog tuaj nyob nraum qhovrooj.

³⁴Yexus kho txhua tus uas muaj mob zoo huv tibsi, thiab Yexus ntiab ntau tus dab tawm. Yexus tsis pub dab hais lus rau qhov dab yeej paub Yexus.

³⁵Hnub tom qab thaum kaj ntug txoog, Yexus txawm sawv thiab tawm hauv tsev mus rau tom ib qhov chaw uas tsis muaj neeg thiab thov Vajtswv.

³⁶Ximoos thiab nws cov phoojywg mus nrhiav Yexus;

³⁷thaum lawv nrhiav tau Yexus lawm, lawv hais rau Yexus hais tias, “Muaj neeg coob coob tuaj nrhiav koj.”

³⁸Yexus teb hais tias, “Peb yuav tsum mus txhua nrho tej zos uas nyob ibncig no, thiab kuv yuav tsum mus qhia hauv tej zos ntawd, rau qhov kuv yeej los ua tes haujlwm no.”

³⁹Yexus txawm mus thoob plaws hauv lub xeev Kalilais, nws qhuab qhia hauv tej tsev sablaj, thiab nws ntiab ntau tus dab tawm hauv cov neeg uas raug dab mus.

⁴⁰Muaj ib tug txivneej mob ruas tuaj cuag Yexus; nws txhos caug ntua ntawm Yexus kotaw thiab thov hais tias, “Yog koj txaus siab kho kuv tus mob, koj yeej kho tau.”

⁴¹Yexus hlub nws heev, Yexus txawm cev tes mus tuav nws thiab Yexus teb hais tias, “Kuv txaus siab pab koj, koj tej ruas cia li zoo hlo!”

⁴²Tamsim ntawd nws tej ruas txawm zoo tas huv tibsi lawm.

⁴³Yexus txwv nws tawv tawv thiab kom nws cia li mus;

⁴⁴Yexus hais tias, “Koj tsis txhob qhia zaj no rau leejtwg. Koj cia li ncaj nraim mus cuag tus povthawj kom nws saib hais tias koj tej ruas twb zoo lawm; thiab tom qab ntawd koj cia li nqa khoom mus hlawv fij rau Vajtswv raws li Mauxes tau qhia tseg, sawvdaws thiaj paub hais tias koj twb zoo lawm.”

⁴⁵Tiamsis nws mus qhia zaj no rau sawvdaws hnov thoob plaws txhua qhov huv tibsi, nws tsis zais li. Txij hnub ntawd los Yexus mus tsis tau tabmeeg hauv tej nroog lawm. Tiamsis Yexus mus rau tom tej qhov chaw uas tsis muaj neeg nyob coob, thiab pheej muaj neeg tuaj txhua qhov tuaj cuag Yexus.