Read Hmong Daw Malakaus 16 Bible Online

Malakaus 16 - Hmong Daw bible

Malakaus 16

¹Thaum dhau Hnub Xanpataus lawm, Malis Madalas, Malis uas yog Yakaunpaus niam thiab Xalaumes txawm mus yuav tshuaj tsw qab coj mus pleev Yexus lub cev.

²Hnubkaj thaum sawv ntxov, lawv mus txog tom lub ntxa thaum hnub tabtom tawm tuaj.

³Thaum lawv taug kev mus lawv sib tham hais tias, “Leejtwg yuav pab muab daim txiag zeb uas npog lub rooj ntxas dov tawm?” (Daim txiag zeb ntawd loj kawg li.)

⁴Thaum lawv mus yuav txog, lawv tsa qhovmuag saib thiab pom daim txiag zeb twb muab dov rau ib sab lawm.

⁵Lawv mus rau hauv lub qhov ntxa, thiab lawv pom ib tug tub hluas hnav ib lub tsho dawb ntev ntev nyob hauv lub qhov ntxa sab xis; lawv ntshai kawg li.

⁶Tus tub hluas ntawd hais rau lawv hais tias, “Nej tsis txhob ntshai, kuv paub hais tias nej tuaj nrhiav Yexus uas yog neeg Naxales uas luag muab ntsia rau saum ntoo khaublig. Nws tsis nyob ntawm no, nws twb sawv lawm! Nej saib ntawm no yog qhov chaw uas luag tso nws lub cev cia.

⁷Nej cia li rov qab mus qhia rau nws cov thwjtim thiab hais rau Petus hais tias, ‘Nws yuav ua nej ntej mus rau pem Kalilais, nej yuav ntsib nws ped raws li nws tau qhia rau nej lawm.’ ”

⁸Cov pojniam ntawd txawm tawm hauv lub qhov ntxa khiav rov qab los, ntshai ua ibce tshee hnyo. Lawv tsis qhia rau leejtwg li, rau qhov lawv ntshai heev. [

⁹Hnub ib uas yog Hnubkaj thaum sawv ntxov uas Yexus sawv hauv qhov tuag rov qab los, Yexus xub los tshwm rau Malis Madalas pom. Tus Malis no yog tus uas thaud raug xya tus dab thiab Yexus ntiab cov dab ntawd tawm lawm.

¹⁰Nws mus qhia tej uas nws pom rau Yexus cov phoojywg. Thaum ntawd lawv tabtom nyuaj siab thiab quaj ntsuag;

¹¹lawv hnov Malis hais tias Yexus rov muaj txojsia thiab Malis twb pom Yexus lawm los lawv tsis ntseeg Malis tej lus li.

¹²Tom qab ntawd Yexus los tshwm rau ob tug thwjtim pom, thaum nkawd tabtom taug kev yuav mus pem yajsab, tiamsis nws lub cev hloov lawm.

¹³Nkawd rov qab los qhia tej no rau cov thwjtim mloog, tiamsis lawv tsis ntseeg nkawd tej lus li.

¹⁴Thaum kawg Yexus los tshwm rau kaum ib tug thwjtim pom thaum lawv tabtom noj mov. Yexus cem cov thwjtim, rau qhov lawv tsis ntseeg; lawv muaj lub siab tawv thiab tsis ntseeg tej lus uas cov neeg hais tias lawv twb pom Yexus sawv rov muaj sia lawm.

¹⁵Yexus hais rau cov thwjtim hais tias, “Nej cia li mus thoob plaws lub ntiajteb no thiab qhia Txojmoo Zoo kom sawvdaws hnov.

¹⁶Tus uas ntseeg thiab ua kevcai raus dej yuav dim, tiamsis tus uas tsis ntseeg yuav raug txim.

¹⁷Cov uas ntseeg yuav tau lub hwjchim ua tej txujci tseemceeb: lawv yuav tuav kuv lub npe ntiab tau dab tawm; lawv yuav hais tau tej lus txawv txawv.

¹⁸Yog lawv ntes nab los nab yuav tsis tom lawv. Yog lawv haus tej tshuaj muaj taug los lawv yuav tsis tuag; thaum lawv cev tes tuav cov neeg muaj mob, cov neeg ntawd yuav zoo.”

¹⁹Thaum Tswv Yexus qhia lawv tas, Vajtswv txawm coj Yexus mus rau saum ntuj ceebtsheej lawm, thiab nws mus zaum ntawm Vajtswv sab xis.

²⁰Cov thwjtim txawm mus qhia thoob plaws txhua qhov, thiab tus Tswv nrog lawv ua haujlwm; nws pub hwjchim rau lawv ua tau tej txujci tseemceeb, sawvdaws thiaj paub hais tias tej lus uas lawv qhia yeej tseeb tiag.] [ NQE XAUS LUV LUV HAUV PHAU MALAKAUS Cov pojniam mus cuag Petus thiab nws cov phoojywg thiab qhia txhua yam uas Yexus hais rau Petus lawv. Tom qab ntawd Yexus txib nws cov thwjtim mus qhia txojkev ncaj ncees thiab txojkev cawm dim uas nyob mus ibtxhis thoob plaws sab hnubtuaj mus rau sab hnubpoob].