Read Hmong Daw Malakaus 3 Bible Online

Malakaus 3 - Hmong Daw bible

Malakaus 3

¹Yexus txawm rov qab mus rau hauv tsev sablaj; muaj ib tug txivneej qhuav tes nyob ntawd.

²Cov neeg uas nyob ntawd muaj qee leej xav nrhiav txim rau Yexus, lawv txawm ntsia saib Hnub Xanpataus Yexus puas yuav kho tus txivneej ntawd txhais tes los tsis kho.

³Yexus hais rau tus txivneej uas qhuav tes ntawd hais tias, “Koj cia li sawv los ntawm no.”

⁴Yexus txawm nug sawvdaws hais tias, “Hnub Xanpataus peb txoj kevcai cia peb ua li cas? Cia ua zoo lossis cia ua phem? Cawm txojsia lossis cia txojsia tu?” Tiamsis tsis muaj leejtwg teb li.

⁵Yexus ntsia cov neeg uas nyob ntawd, nws chim thiab nws nyuaj siab rau lawv rau qhov lawv muaj lub siab tawv. Yexus hais rau tus txivneej uas qhuav tes hais tias, “Koj cia li xyab hlo koj txhais tes.” Nws xyab hlo tes, ces nws txhais tes txawm rov zoo li qub lawm.

⁶Tamsim ntawd cov Falixais txawm tawm hauv tsev sablaj mus nrog Helauj cov neeg qee leej sablaj; lawv tuav tswvyim yuav muab Yexus tua povtseg.

⁷Yexus thiab nws cov thwjtim mus rau nram ntug Hiavtxwv Kalilais, muaj neeg coob coob nrog Yexus mus thiab. Cov neeg ntawd muaj ibtxhia tuaj hauv lub xeev Kalilais tuaj, muaj ibtxhia tuaj nram xeev Yudas tuaj,

⁸muaj ibtxhia tuaj nram lub nroog Yeluxalees tuaj, muaj ibtxhia tuaj nram cheebtsam Idumias tuaj, muaj ibtxhia tuaj sab ntug dej Yauladees tim ub tuaj, thiab muaj ibtxhia tuaj pem tej zos uas nyob ze lub nroog Tiles thiab lub nroog Xidoos tuaj. Cov neeg ntawd tuaj xyuas Yexus, rau qhov lawv hnov txog tes haujlwm uas Yexus ua.

⁹Muaj neeg coob coob, ces Yexus txawm hais kom nws cov thwjtim npaj ib lub nkoj tos nws, cov neeg coob coob ntawd thiaj tsis txav los ti Yexus.

¹⁰Yexus kho ntau leej mob zoo lawm, ces tej neeg uas muaj mob txawm pheej sib txiv los kom ze, lawv thiaj kov tau Yexus.

¹¹Txhua zaus uas cov neeg raug dab pom Yexus, lawv txawm qhau cev hlo ntawm Yexus kotaw thiab qw nrov nrov hais tias, “Koj yog Vajtswv tus Tub.”

¹²Yexus txwv tawv tawv cov dab ntawd hais tias, “Nej tsis txhob qhia hais tias kuv yog leejtwg.”

¹³Tom qab ntawd Yexus txawm nce mus rau pem ib lub roob. Nws hu cov neeg uas nws xav yuav ua nws cov timthawj los cuag nws, ces lawv txawm los cuag nws.

¹⁴Nws xaiv tau kaum ob leeg, nws hu kaum ob leeg ntawd ua cov timthawj. Nws hais rau lawv hais tias, “Kuv xaiv nej los nrog kuv nyob. Kuv yuav txib nej mus qhia Txojmoo Zoo,

¹⁵thiab kuv yuav pub hwjchim rau nej kom nej ntiab tau dab.”

¹⁶Kaum ob leeg uas Yexus xaiv ntawd yog: Ximoos (tus uas Yexus tis dua ib lub npe hu ua Petus);

¹⁷Yakaunpaus thiab nws tus kwv Yauhas, nkawd yog Xenpedais tub; (Yexus tis npe rau nkawd hu ua Npau-anekes, rau qhov “Nkawd Siab Ceev Heev”);

¹⁸Adales, Filis, Npataulaumais, Mathais, Thaumas, Yakaunpaus uas yog Alafais tus tub, Thade-us, Ximoos tus uas xav kom nws haivneeg muaj kev ywjpheej,

¹⁹thiab Yudas Ixakali-us tus uas ntxeev siab rau Yexus.

²⁰Yexus mus txog hauv ib lub tsev, muaj dua ib cov neeg coob coob tuaj Yexus thiab nws cov thwjtim tsis khoom noj mov li.

²¹Thaum Yexus tsevneeg hnov li ntawd, lawv txawm mus nrhiav Yexus thiab coj Yexus los tsev rau qhov muaj neeg hais tias, “Yexus vwm lawm!”

²²Cov xibhwb uas qhia Vajtswv txoj Kevcai qee leej uas tuaj nram Yeluxalees tuaj hais tias, “Yog Npexenpus pub hwjchim rau nws! Yog dab Ntxwgnyoog pub hwjchim rau nws, nws thiaj ntiab tau dab.”

²³Yexus txawm hu cov neeg coob coob ntawd los cuag nws, thiab nws ua lus pivtxwv qhia rau lawv hais tias, “Dab Ntxwgnyoog yuav ua li cas ntiab tau dab Ntxwgnyoog?

²⁴Yog muaj ib lub tebchaws tawg ua ob peb pab, thiab cov neeg ntawd sib ntaus sib tua, ces lub tebchaws ntawd yeej yuav puastsuaj mus.

²⁵Yog tsevneeg twg tsis sib haum, ces tsevneeg ntawd yeej yuav tawg mus tas.

²⁶Cov neeg uas dab Ntxwgnyoog kav, yog lawv tsis sib haum lawv yeej yuav nyob tsis tau ua ke; lawv yuav tawg mus tas.

²⁷“Tsis muaj leejtwg yuav tsoo mus tau rau hauv tus txivneej uas muaj zog heev lub tsev thiab huab nws tej qhov txhia chaw, tsuas yog nws xub muab tus uas muaj zog ntawd khi tso, nws thiaj huab tau tej qhov txhia chaw hauv tus ntawd tsev.

²⁸“Kuv qhia tseeb rau nej hais tias txhua yam kev txhaum uas neeg ua thiab txhua lo lus phem uas neeg hais mas Vajtswv zam tau.

²⁹Tiamsis tus uas thuam Vaj Ntsujplig tus Dawbhuv, Vajtswv zam txim tsis tau rau tus ntawd. Tus ntawd yuav tsum ris nws lub txim mus ibtxhis.” (

³⁰Yexus hais li ntawd rau qhov muaj qee leej hais tias, “Yexus raug dab.”)

³¹Thaum ntawd Yexus niam thiab Yexus cov kwv tuaj sawv nraum zoov; lawv tso neeg mus hu Yexus los.

³²Muaj neeg coob coob zaum puagncig Yexus. Lawv hais rau Yexus hais tias, “Koj saib, koj niam thiab koj cov kwv tuaj nrhiav koj; lawv nyob sab nraud.”

³³Yexus teb hais tias, “Leejtwg yog kuv niam? Thiab cov twg yog kuv cov kwv?”

³⁴Yexus txawm ntsia cov neeg uas zaum puagncig nws thiab hais tias, “Cov neeg uas nyob ntawm no thiaj yog kuv niam thiab kuv cov kwv!

³⁵Tus uas ua raws li Vajtswv lub siab nyiam, tus ntawd thiaj yog kuv tus kwv, yog kuv tus muam thiab yog kuv niam.”