Read Hmong Daw Lukas 1 Bible Online

Lukas 1 - Hmong Daw bible

Lukas 1

¹The-aufilaus, muaj ntau leej tau sau qhia tej uas twb muaj hauv peb lawm,

²raws li uas muaj qee leej pom tej ntawd thaum nyuam qhuav pib muaj los, lawv yog cov uas qhia txojmoo zoo thiab qhia tej ntawd rau peb paub.

³Kuv twb ua tib zoo saib tej ntawd txhij txhua thaum hauvpaus los lawm. Yog li ntawd, The-aufilaus, koj yog tus uas paub qabhau, kuv thiaj sau tej ntawd txhua zaj, txij thaum hauvpaus mus txog thaum kawg rau koj paub.

⁴Koj thiaj yuav paub tseeb txhua zaj uas lawv qhia rau koj lawm.

⁵Lub sijhawm uas Helauj ua vajntxwv kav lub xeev Yudas, muaj ib tug povthawj hu ua Xakhaliyas, nws yog Anpiyas pab povthawj. Nws tus pojniam hu ua Elixanpes. Elixanpes yog Aloos ib tug xeebntxwv.

⁶Vajtswv pom hais tias nkawd yog neeg ncaj ncees, mloog Vajtswv lus thiab ua raws li Vajtswv txoj kevcai txhua nqe, tsis muaj ib qho uas luag yuav thuam tau nkawd li.

⁷Nkawd tsis muaj menyuam, rau qhov Elixanpes yeej ibtxwm xeeb tsis taus tub, thiab nkawd twb laus laus lawm.

⁸Muaj ib hnub Xakhaliyas tabtom ua nws tes haujlwm hauv lub Tuamtsev raws li cov povthawj niaj hnub ua.

⁹Raws li cov povthawj txoj kevcai, lawv rho ntawv tau Xakhaliyas mus hlawv hmoov tshuaj tsw qab rau saum lub thaj hauv lub Tuamtsev.

¹⁰Yog li ntawd, nws thiaj mus rau hauv tus Tswv lub Tuamtsev, lub sijhawm uas Xakhaliyas hlawv hmoov tshuaj tsw qab, cov neeg nyob sab nraud thov Vajtswv.

¹¹Tus Tswv ib tug timtswv los sawv ntawm lub thaj uas hlawv hmoov tshuaj tsw qab sab xis.

¹²Thaum Xakhaliyas pom dheev tus timtswv ntawd, nws poob siab thiab ntshai kawg li.

¹³Tiamsis tus timtswv hais rau Xakhaliyas hais tias, “Koj tsis txhob ntshai! Vajtswv twb hnov koj tej lus thov lawm. Koj tus pojniam yuav yug ib tug metub rau koj. Koj yuav tis nws lub npe hu ua Yauhas.

¹⁴Thaum yug tau tus metub ntawd, koj yuav zoo siab kawg li, thiab yuav muaj neeg coob coob nrog koj zoo siab, rau qhov tus Tswv suav hais tias,

¹⁵nws yog ib tug neeg tseemceeb. Nws yuav tsis haus cawv txiv hmab lossis cawv ntxwg hlo li. Nws yuav puv npo Vaj Ntsujplig tus Dawbhuv hauv nruab thiab los,

¹⁶nws yuav coj cov Yixalayees coob leej rov los cuag tus Tswv uas yog lawv tus Vajtswv.

¹⁷Nws yuav muaj tswvyim thiab muaj hwjchim ib yam li Eliyas tus uas cev Vajtswv lus, nws yuav ua tus Tswv ntej mus ua kom tej txiv tub rov sib haum; nws yuav ua kom cov neeg uas tawv ncauj hloov ua neeg ncaj ncees; thiab nws yuav npaj ib cov neeg rau tus Tswv.”

¹⁸Xakhaliyas nug tus timtswv ntawd hais tias, “Yuav ua li cas kuv thiaj paub tej uas koj hais ko? Kuv twb laus heev, thiab kuv tus pojniam los twb laus laus lawm thiab.”

¹⁹Tus timtswv teb hais tias, “Kuv yog Khali-ees, kuv nyob ntawm Vajtswv xubntiag, Vajtswv txib kuv los qhia txoj xov zoo no rau koj.

²⁰Thaum txog lub sijhawm lawm, yeej yuav muaj raws li kuv hais no tiag, tiamsis vim koj tsis ntseeg kuv tej lus, koj yuav hais tsis tau lus mus txog hnub uas muaj raws li tej uas kuv twb hais rau koj lawm.”

²¹Thaum ntawd cov neeg uas nyob sab nraud tos Xakhaliyas, lawv xav tsis thoob xyov yog ua li cas Xakhaliyas yuav nyob hauv lub Tuamtsev ntev ua luaj li.

²²Thaum nws tawm los, nws hais tsis tau lus rau lawv, nws ua ruam piav rau lawv xwb. Lawv xav hais tias tej zaum yog muaj ib yam dabtsi tshwm rau nws pom hauv lub Tuamtsev.

²³Thaum Xakhaliyas ua haujlwm hauv lub Tuamtsev tas lawm, nws rov qab mus tsev.

²⁴Tom qab ntawd tsis ntev, Elixanpes uas yog Xakhaliyas tus pojniam txawm xeeb tub, Elixanpes nyob hauv tsev tau tsib lub hlis, nws tsis tawm mus qhov twg li.

²⁵Elixanpes hais tias, “Nimno tus Tswv pab kuv thiab nws ua rau kuv tsis txajmuag rau leejtwg li lawm!”

²⁶Thaum Elixanpes xeeb tub tau rau lub hlis lawm, Vajtswv txib nws tus timtswv Khali-ees los rau hauv lub nroog Naxales uas nyob hauv lub xeev Kalilais.

²⁷Tus timtswv ntawd los cuag ib tug nkaujxwb hu ua Malis, tus uas Yauxej uas yog Vajntxwv Daviv tus xeebntxwv twb qhaib tseg lawm.

²⁸Tus timtswv los hais rau Malis hais tias, “Koj yuav tau zoo nyob kaj siab lug! Tus Tswv nrog nraim koj nyob thiab foom koob hmoov ntau kawg rau koj lawm!”

²⁹Thaum Malis hnov tus timtswv hais li ntawd, nws nyuaj siab heev, nws xav tsis thoob li, xyov tus timtswv hais li ntawd, yog hais txog dabtsi.

³⁰Tus timtswv hais rau Malis hais tias, “Malis, koj tsis txhob ntshai, Vajtswv twb foom koob hmoov rau koj lawm.

³¹Koj yuav xeeb tub thiab yuav yug tau ib tug metub, koj yuav tis nws lub npe hu ua Yexus.

³²Nws yuav ua tus tseemceeb, thiab sawvdaws yuav hu nws lub npe hais tias, yog Vajtswv tus uas muaj hwjchim loj kawg nkaus tus Tub. Tus Tswv uas yog Vajtswv yuav tsa nws ua vajntxwv, ib yam li nws yawgkoob Daviv,

³³nws yuav ua vajntxwv kav Yakhauj cov xeebntxwv mus ibtxhis; thiab nws lub tebchaws yuav nyob mus tsis paub kawg li!”

³⁴Malis nug tus timtswv hais tias, “Kuv yog ib tug nkaujxwb, yuav ua li cas muaj tau li ntawd?”

³⁵Tus timtswv teb hais tias, “Vaj Ntsujplig tus Dawbhuv yuav los rau saum koj, thiab Vajtswv lub hwjchim yuav roos koj. Vim li no sawvdaws thiaj yuav hu tus metub uas dawbhuv uas yuav yug los ntawd hais tias, nws yog Vajtswv tus Tub.

³⁶Koj saib koj tus phauj Elixanpes uas sawvdaws hais tias, nws ibtxwm xeeb tsis taus tub, txawm yog nws laus laus lawm los nimno nws twb xeeb tub tau rau lub hlis lawm,

³⁷rau qhov yeej tsis muaj ib yam dabtsi uas Vajtswv yuav ua tsis tau li.”

³⁸Malis hais tias, “Kuv yog Vajtswv tus ntxhais qhev, thov kom muaj raws li koj hais ko rau kuv.” Ces tus timtswv txawm ncaim Malis mus lawm.

³⁹Tsis ntev tom qab ntawd, Malis txawm sawv kev thiab rau siab ntso mus txog ntawm ib lub nroog uas nyob saum laj roob hauv lub xeev Yudas,

⁴⁰nws mus rau hauv Xakhaliyas tsev thiab hais noj qab nyob zoo rau Elixanpes.

⁴¹Thaum Elixanpes hnov dheev Malis lub suab hais rau nws, ces nws tus menyuam hauv plab txawm nti cuag dabtsi, thiab Elixanpes puv npo Vaj Ntsujplig tus Dawbhuv,

⁴²thiab Elixanpes hais nrov nrov rau Malis hais tias, “Koj yog tus uas tau koob hmoov ntau tshaj plaws txhua tus pojniam huv tibsi, thiab koj tus menyuam hauv plab los tau koob hmoov thiab.

⁴³Vim li cas kuv yuav tau txais txojkev hlub loj npaum li no, kuv tus Tswv leej niam tseem tuaj saib kuv thiab?

⁴⁴Thaum kuv hnov dheev tej lus uas koj hais rau kuv, kuv tus menyuam uas nyob hauv kuv plab zoo siab thiab nti cuag dabtsi.

⁴⁵Koj yuav zoo siab heev, rau qhov koj twb ntseeg hais tias, yuav muaj raws li tej lus uas tus Tswv hais rau koj lawm.”

⁴⁶Malis hais tias, “Kuv lub siab cia li qhuas tus Tswv;

⁴⁷Vajtswv uas yog kuv tus Cawmseej, nws ua rau kuv zoo siab kawg li.

⁴⁸Rau qhov kuv yog nws ib tug ntxhais qhev uas tsis tseemceeb los nws tseem nco txog kuv thiab! Txij no mus txhua haivneeg yuav hu kuv hais tias, tus uas tau koob hmoov,

⁴⁹vim tej uas Vajtswv tus uas muaj hwjchim loj kawg nkaus tau ua rau kuv lawm. Nws lub npe dawbhuv kawg nkaus;

⁵⁰Vajtswv hlub txhua tus uas hwm nws ib tiam dhau ib tiam.

⁵¹Nws tsa nws txhais tes uas muaj hwjchim ua kom cov neeg uas khavtheeb tsis sib haum thiab tawg pab tawg pawg.

⁵²Vajtswv muab cov vajntxwv uas muaj hwjchim txo ntawm lawv lub zwmtxwv, thiab Vajtswv muab cov neeg uas tsis muaj hwjchim tsa rau qhov chaw siab.

⁵³Vajtswv pub tej zaub mov zoo rau cov neeg uas tshaib nqhis tau noj tsau npo. Nws ntiab cov neeg npluanuj khiav mus tes dawb tes npliag.

⁵⁴Nws ua raws li nws tau coglus tseg rau peb cov yawgkoob lawm, thiab nws tau los pab cov neeg Yixalayees uas yog nws cov tubtxib.

⁵⁵Nws nco ntsoov hlub Anplahas thiab Anplahas cov xeebntxwv mus ibtxhis li!”

⁵⁶Malis nrog Elixanpes nyob yuav luag tau peb lub hlis, nws mam li rov mus tsev.

⁵⁷Thaum txog caij uas Elixanpes yug menyuam, nws yug tau ib tug metub.

⁵⁸Nws cov kwvtij neejtsa thiab tej neeg zejzog hnov hais tias, tus Tswv foom koob hmoov rau nws lawm, lawv nrog nws zoo siab kawg li.

⁵⁹Thaum tus menyuam ntawd muaj yim hnub lawm, lawv tuaj muab nws ua kevcai txiav tawv, thiab lawv yuav tis nws lub npe hu ua Xakhaliyas raws li nws txiv.

⁶⁰Tiamsis Elixanpes teb hais tias, “Tsis yog li ntawd! Yuav tsum tis nws lub npe hu ua Yauhas.”

⁶¹Lawv hais rau Elixanpes hais tias, “Koj twb tsis muaj ib tug kwvtij npe hu li ntawd los sav!”

⁶²Lawv txawm ua ruam piav rau tus metub leej txiv nug saib nws nyiam tis tus metub ntawd lub npe hu li cas.

⁶³Xakhaliyas kom lawv muab ib daim ntawv los rau nws, thiab nws sau hais tias, “Tus metub no lub npe hu ua Yauhas.” Lawv xav tsis thoob li!

⁶⁴Tamsim ntawd Xakhaliyas txawm rov hais tau lus, thiab nws ua Vajtswv tsaug.

⁶⁵Tej neeg zejzog ntshai kawg li, thiab zaj ntawd txawm nrov ncha mus thoob plaws tej zejzog uas nyob pem tej laj roob hauv lub xeev Yudas.

⁶⁶Cov neeg uas hnov zaj no txawm khaws zaj no cia rau nruab siab thiab lawv sib tham hais tias, “Tus menyuam no loj hlob los nws yuav ua dabtsi?” Rau qhov Vajtswv lub hwjchim nrog nraim tus menyuam no.

⁶⁷Xakhaliyas uas yog Yauhas txiv puv npo Vaj Ntsujplig tus Dawbhuv, thiab nws qhia ib zaj uas yuav muaj los yav tom ntej hais tias,

⁶⁸“Peb cia li ua tus Tswv uas yog cov Yixalayees tus Vajtswv tsaug! Rau qhov nws los pab nws haivneeg thiab nws twb tso lawv dim lawm.

⁶⁹Vajtswv txib ib tug Cawmseej uas muaj hwjchim los pab peb. Nws yog Vajtswv tus tubtxib Daviv ib tug xeebntxwv.

⁷⁰Raws li Vajtswv tau coglus tseg rau cov cev Vajtswv lus uas dawbhuv thaum ub los lawm hais tias,

⁷¹nws yuav cawm kom peb dim ntawm peb cov yeebncuab txhais tes. Thiab dim ntawm txhua tus uas ntxub peb.

⁷²Vajtswv hais tias, nws yeej hlub peb cov yawgkoob thiab yeej nco ntsoov tej lus tseemceeb uas nws tau cog tseg lawm.

⁷³Nws coglus tseg rau peb yawgkoob Anplahas hais tias nws yuav pab kom peb dim ntawm peb cov yeebncuab txhais tes, thiab yuav pab kom peb muaj siab tawv ua tau nws tes haujlwm tsis ntshai li,

⁷⁴

⁷⁵kom peb ua tau neeg dawbhuv thiab ncaj ncees raws li Vajtswv lub siab nyiam mus tas peb tiam neej.

⁷⁶“Kuv tus metub, sawvdaws yuav hu koj hais tias, koj yog ib tug cev Vajtswv tus uas muaj hwjchim loj kawg nkaus lus. Koj yuav ua tus Tswv ntej mus kho kev tos nws,

⁷⁷Thiab qhia rau Vajtswv haivneeg, kom lawv paub hais tias, Vajtswv yuav zam lawv lub txim kom lawv dim.

⁷⁸Rau qhov peb tus Vajtswv yog tus uas hlub peb kawg nkaus. Nws txojkev cawm dim ci tuaj rau peb ib yam li tus duab tshav ntuj ci thaum sawv ntxov,

⁷⁹thiab yuav ci mus rau txhua tus uas nyob hauv qhov tsaus ntuj uas yog txojkev tuag, thiab yuav coj tau peb mus taug txojkev uas peb yuav tau nyob kaj siab lug.”

⁸⁰Tus metub ntawd loj hlob zoo thiab nws muaj tswvyim heev zuj zus, thiab nws nyob tom roob mojsab qhua mus txog hnub uas nws tawm los rau cov Yixalayees pom.