Read Hmong Daw Lukas 18 Bible Online

Lukas 18 - Hmong Daw bible

Lukas 18

¹Yexus hais ib zaj lus pivtxwv rau nws cov thwjtim hais tias, kom lawv niaj hnub thov Vajtswv tsis txhob qaug zog.

²Yexus hais tias, “Nyob hauv ib lub nroog, muaj ib tug txiav txim uas tsis ntshai Vajtswv thiab tsis hwm leejtwg li.

³Nyob hauv lub nroog ntawd muaj ib tug pojntsuam uas niaj hnub tuaj thov tus txiav txim ntawd hais tias, ‘Thov koj pab hais rooj plaub uas luag kom kuv!’

⁴Thaum chivthawj tus txiav txim tsis kam hais, tiamsis tom qab ntawd, nws xav hais tias, ‘Txawm yog kuv tsis ntshai Vajtswv thiab tsis hwm leejtwg li los,

⁵tus pojntsuam no pheej tuaj txob kuv, kuv yuav tau pab nws hais kom tas, nws thiaj yuav tsis niaj hnub tuaj txob kuv kom kuv ntxhov siab!’ ”

⁶Tus Tswv hais rau lawv ntxiv hais tias, “Nej twb hnov tus txiav txim uas siab tsis ncaj ntawd tej lus lawm.

⁷Vajtswv haivneeg uas niaj hnub niaj hmo thov Vajtswv pab, Vajtswv yuav tsis pab hais lawv zaj los? Vajtswv yuav tos ntev mam li pab lawv los?

⁸Kuv qhia rau nej hais tias, Vajtswv yeej yuav pab hais lawv zaj sai sai. Thaum Neeg Leej Tub los, cov neeg uas nyob hauv ntiajteb no puas yuav muaj tus uas ntseeg nws lawm?”

⁹Thiab Yexus hais ib zaj lus pivtxwv rau cov neeg uas khav hais tias, lawv yog neeg ncaj thiab lawv saib tsis taus lwm tus li no,

¹⁰“Muaj ib zaug ob tug txivneej mus thov Vajtswv hauv lub Tuamtsev: ib tug yog tus Falixais thiab ib tug yog tus sau se.

¹¹Tus Falixais sawv ntsug thiab nws thov hais tias, ‘Vajtswv, kuv ua koj tsaug, kuv zoo tsis thooj li lwm tus, kuv tsis ua neeg siab hlob, kuv yog neeg ncaj ncees, kuv tsis zes luag tej pojniam thiab kuv tsis zoo li tus sau se ntawd.

¹²Xya hnub twg kuv ua kevcai yoo mov ob zaug, thiab tej nyiaj uas kuv khwv tau los, kuv muab ib feem kaum rau koj.’

¹³Tiamsis tus sau se sawv nrug deb mentsis, nws tsis tsa qhovmuag saib saum ntuj, nws ntaus nws lub hauvsiab thiab hais tias, ‘Vajtswv, kuv yog neeg txhaum, thov koj hlub kuv!’

¹⁴Yexus hais tias, kuv qhia rau nej hais tias, thaum nkawd rov mus tsev lawm, tus sau se yog tus uas ua haum Vajtswv siab, tsis yog tus Falixais. Rau qhov tus uas khav hais tias, nws muaj hwjchim, tus ntawd yuav poob hwjchim, tiamsis tus uas txo hwjchim, tus ntawd yuav tau hwjchim.”

¹⁵Muaj neeg coj lawv cov menyuam tuaj cuag Yexus thiab thov nws cev tes plhws lawv tej menyuam. Thaum cov thwjtim pom li ntawd, lawv txwv tsis pub cov neeg ua li ntawd,

¹⁶tiamsis Yexus hu cov menyuam yaus los cuag nws thiab hais tias, “Cia li tso cov menyuam yaus los cuag kuv, tsis txhob txwv lawv, rau qhov Vajtswv lub Tebchaws yog cov neeg uas muaj lub siab zoo li cov menyuam yaus no tug.

¹⁷Kuv qhia rau nej hais tias, yog leejtwg tsis txais yuav Vajtswv lub Tebchaws ib yam li cov menyuam yaus no, ces tus ntawd yuav tsis tau mus rau hauv Vajtswv lub Tebchaws li.”

¹⁸Cov Yudas ib tug thawjcoj tuaj nug Yexus hais tias, “Tus xibhwb uas muaj lub siab zoo, kuv yuav ua li cas kuv thiaj tau txojsia ntev dhawv mus ibtxhis?”

¹⁹Yexus nug nws hais tias, “Vim li cas koj hu kuv hais tias, tus uas muaj lub siab zoo? Yeej tsis muaj leejtwg siab zoo li, tsuas yog Vajtswv tib leeg xwb.

²⁰Koj yeej paub Vajtswv txoj Kevcai uas hais tias, ‘Tsis txhob deev luag pojniam luag txiv; tsis txhob tua neeg; tsis txhob ua tubsab; tsis txhob ua timkhawv tsis tseeb thiab hwm koj niam koj txiv.’ ”

²¹Tus txivneej ntawd teb hais tias, “Tej kevcai uas koj hais ko kuv twb coj txhua nqe thaum kuv tseem yau los lawm.”

²²Thaum Yexus hnov nws hais li ntawd, Yexus hais rau nws tias, “Tseem tshuav ib yam uas koj tsis tau ua. Koj cia li mus muab koj tej qhov txhia chaw muag huv tibsi, thiab muab cov nyiaj ntawd faib rau cov neeg pluag, koj thiaj yuav yog tus uas npluanuj nyob saum ntuj ceebtsheej; tom qab ntawd, koj cia li tuaj nrog kuv mus.”

²³Thaum tus txivneej ntawd hnov Yexus hais li ntawd, nws nyuaj siab kawg li, rau qhov nws npluanuj heev.

²⁴Thaum Yexus pom tus ntawd nyuaj siab heev, Yexus hais tias, “Cov neeg npluanuj yuav mus Vajtswv lub tebchaws mas nyuaj kawg li!

²⁵Ib tug ntxhuav nkag lub qhov koob tseem yoojyim dua ib tug neeg npluanuj yuav mus rau Vajtswv lub Tebchaws.”

²⁶Cov neeg uas hnov Yexus hais li ntawd, lawv nug Yexus hais tias, “Yog li ntawd, leejtwg thiaj yuav dim tau?”

²⁷Yexus teb hais tias, “Tej uas neeg ua tsis tau, Vajtswv ua tau.”

²⁸Ces Petus hais rau Yexus hais tias, “Peb twb tso vajtse tseg thiab tuaj nrog koj mus lawm.”

²⁹Yexus hais rau lawv tias, “Kuv qhia tseeb rau nej hais tias, yog leejtwg tso vajtse, tso pojniam menyuam, tso kwvtij thiab tso niam tso txiv tseg, vim nws xav tau Vajtswv lub Tebchaws,

³⁰tiam no nws yuav tau ntau dua tej uas nws muab tso tseg lawm, thiab lwm tiam, nws yuav tau txojsia ntev dhawv mus ibtxhis.”

³¹Yexus coj nws kaum ob tug thwjtim mus rau ib qho thiab nws hais rau lawv hais tias, “Nej ua tib zoo mloog! Peb yuav mus rau nram lub nroog Yeluxalees, kom txhua yam tiav raws li tej uas cov cev Vajtswv lus tau sau hais txog Neeg Leej Tub lawm.

³²Yuav muaj neeg ntes nws coj mus rau lwm haivneeg, lawv yuav saib tsis taus nws, thuam nws thiab nti qaubncaug rau nws.

³³Lawv yuav muab nws nplawm thiab muab nws tua povtseg, tiamsis tom qab ntawd peb hnub, nws yuav sawv hauv qhov tuag rov qab los.”

³⁴Tiamsis cov thwjtim tsis totaub tej uas Yexus hais; Yexus tsis qhia lub ntsiab lus rau lawv, lawv thiaj tsis paub xyov Yexus hais txog dabtsi.

³⁵Thaum Yexus mus yuav txog lub nroog Yelikaus, muaj ib tug txivneej digmuag zaum ntawm ntug kev thov khawv.

³⁶Thaum tus digmuag hnov muaj neeg coob coob tham zom zaws taug kev tuaj, nws nug hais tias, “Nej ua dabtsi?”

³⁷Lawv qhia rau nws hais tias, “Yexus tus uas yog neeg Naxales tabtom taug kev tuaj.”

³⁸Tus digmuag ntawd hu nrov nrov hais tias, “Yexus uas yog Daviv tus Tub! Thov koj hlub kuv!”

³⁹Cov neeg uas nyob ntawm nws hauv ntej txwv kom nws nyob twjywm tsis txhob qw. Tiamsis nws hajyam qw nrov nrov hais tias, “Daviv tus Tub, thov koj hlub kuv!”

⁴⁰Yog li ntawd, Yexus txawm nres thiab kom lawv coj tus digmuag los cuag nws. Thaum tus digmuag los ze lawm Yexus nug nws hais tias,

⁴¹“Koj xav kom kuv ua dabtsi rau koj?” Tus digmuag teb hais tias, “Tus Tswv, thov pab kom kuv rov pom kev.”

⁴²Yexus hais rau nws hais tias, “Koj cia li pom kev! Koj txojkev ntseeg twb ua rau koj pom kev lawm.”

⁴³Tamsim ntawd nws txawm pom kev, nws nrog Yexus mus thiab ua Vajtswv tsaug. Thaum cov neeg coob coob pom li ntawd, lawv qhuas Vajtswv kawg li.