Read Hmong Daw Lukas 2 Bible Online

Lukas 2 - Hmong Daw bible

Lukas 2

¹Lub sijhawm ntawd Vajntxwv Aunkuxataus hais rau cov pejxeem uas nyob thoob plaws txhua lub tebchaws uas yog cov nomtswv Loos kav, kom sawvdaws tuaj sau npe.

²Thawj zaug uas muaj sau npe no, yog lub sijhawm uas Kuleni-us ua nom kav tebchaws Xilias.

³Txhua tus nyias txawm mus sau npe rau hauv nyias lub nroog.

⁴Yauxej tawm hauv lub nroog Naxales uas nyob pem Kalilais mus rau hauv lub nroog Npelehees uas nyob nram lub xeev Yudas uas thaum ub yug Vajntxwv Daviv. Yauxej mus rau hauv lub nroog ntawd, rau qhov nws yog Daviv xeebntxwv.

⁵Yauxej coj Malis tus uas nws twb qhaib lawm nrog nws mus sau npe thiab. Thaum ntawd Malis suab ib plab menyuam.

⁶Thaum nkawd tseem nyob hauv lub nroog Npelehees, twb txog caij uas Malis yug menyuam lawm.

⁷Malis yug nws tus metub hlob, nws muab khaubncaws qhwv tus menyuam thiab muab tso pw rau hauv ib lub dab zaub, rau qhov tej tsev so, neeg twb so puv tas lawm.

⁸Nyob thaj tsam ntawd muaj ib cov neeg yug yaj, lawv mus pw zov lawv cov yaj tom teb, thaum tsaus ntuj,

⁹tus Tswv ib tug timtswv los cuag lawv, thiab tus Tswv lub tshwjchim ci ntsa iab tuaj rau lawv, lawv poob siab thiab ntshai kawg li,

¹⁰tiamsis tus timtswv ntawd hais rau lawv hais tias, “Nej tsis txhob ntshai! Kuv los ntawm no yog coj txojmoo zoo uas yog txojkev zoo siab kawg nkaus rau txhua haivneeg los qhia rau nej paub.

¹¹Hnub no nej tus Cawmseej twb yug los rau hauv Daviv lub nroog lawm, nws yog Khetos uas yog tus Tswv!

¹²Nej yuav pom ib tug menyuam mos qhwv khaubncaws pw hauv lub dab zaub, qhov ntawd yog lub cim uas qhia hais tias, tus ntawd yog tus uas kuv hais.”

¹³Tamsim ntawd muaj ib pab timtswv ceebtsheej coob coob los nrog tus timtswv ntawd hu nkauj qhuas Vajtswv li no:

¹⁴“Thov kom Vajtswv tus uas nyob saum ntuj ceebtsheej tau koob meej, thiab thov kom cov neeg uas nyob hauv ntiajteb txhua tus uas ua haum Vajtswv siab tau zoo nyob kaj siab lug!”

¹⁵Thaum cov timtswv ncaim lawv rov qab mus rau saum ntuj ceebtsheej lawm, cov yug yaj txawm sib tham hais tias, “Peb cia li mus rau hauv lub nroog Npelehees thiab mus saib tej uas tus Tswv qhia rau peb lawm.”

¹⁶Lawv ceev nrooj mus rau hauv lub nroog, lawv pom Malis thiab Yauxej, thiab pom tus menyuam pw hauv ib lub dab zaub.

¹⁷Thaum cov yug yaj pom tus menyuam lawm, lawv qhia zaj uas tus timtswv ceebtsheej qhia rau lawv hais txog tus menyuam ntawd rau Malis thiab Yauxej mloog.

¹⁸Txhua tus uas hnov zaj uas cov yug yaj hais ntawd, sawvdaws xav tsis thoob li.

¹⁹Malis khaws tej lus ntawd thiab xav ntsoov rau nruab siab.

²⁰Thaum cov yug yaj rov qab mus, lawv hu nkauj qhuas Vajtswv, rau qhov lawv hnov thiab pom raws li tus timtswv tau qhia rau lawv lawm.

²¹Thaum tus menyuam ntawd muaj yim hnub lawm, yog hnub uas muab nws ua kevcai txiav tawv raws li txoj kevcai txiav, thiab tis nws lub npe hu ua Yexus, raws li tus timtswv ceebtsheej qhia tseg rau Malis thaum tseem tsis tau xeeb tus metub ntawd.

²²Thaum txog lub sijhawm uas Yauxej thiab Malis mus ua kevcai ntxuav raws li Mauxes txoj Kevcai, nkawd txawm coj tus metub Yexus mus pem lub nroog Yeluxalees thiab muab nws fij rau Vajtswv.

²³Raws li muaj lus sau tseg rau hauv tus Tswv txoj kevcai lawm hais tias, “Yuav tsum muab txhua tus tub hlob fij rau tus Tswv.”

²⁴Thiab nkawd nqa ib nkawm nquab liabrwg lossis nquab nyeg mus fij raws li twb muaj lus sau tseg rau hauv tus Tswv txoj kevcai lawm.

²⁵Lub sijhawm ntawd muaj ib tug txivneej hu ua Xime-oos nyob hauv lub nroog Yeluxalees. Nws yog ib tug neeg ncaj ncees, nws hwm Vajtswv thiab niaj hnub tos lub sijhawm uas Vajtswv los cawm cov neeg Yixalayees. Vaj Ntsujplig tus Dawbhuv nrog nraim Xime-oos,

²⁶thiab qhia rau nws hais tias nws yuav tsis tuag ua ntej uas nws pom tus Mexiyas uas Vajtswv coglus tseg.

²⁷Hnub ntawd Vaj Ntsujplig coj Xime-oos mus rau hauv lub Tuamtsev. Thaum ntawd Yauxej thiab Malis coj nkawd tus metub Yexus tuaj ua kevcai hauv lub Tuamtsev raws li txoj kevcai qhia tseg,

²⁸Xime-oos muab tus metub los puag thiab ua Vajtswv tsaug hais tias,

²⁹“Tus Tswv, nimno koj twb ua raws li koj coglus tseg lawm, thov koj coj kuv uas yog koj tus tubtxib mus kaj siab lug,

³⁰rau qhov kuv lub qhovmuag twb pom koj txojkev cawm dim

³¹uas koj npaj rau txhua haivneeg lawm.

³²Nws yog lub teeb uas yuav ci mus rau lwm haivneeg pom kev, thiab yuav ua rau cov neeg Yixalayees uas yog koj haivneeg tau ntsejmuag.”

³³Thaum Yexus niam thiab txiv hnov Xime-oos hais txog tus metub li ntawd, nkawd xav tsis thoob li.

³⁴Xime-oos foom koob hmoov rau lawv thiab hais rau Malis uas yog Yexus niam hais tias, “Vajtswv xaiv tus metub no los ua kom cov Yixalayees ntau leej ntog thiab ntau leej sawv. Nws yog ib tug tseemceeb uas Vajtswv txib los, thiab yuav muaj ntau leej tawmtsam nws,

³⁵thiab nws yuav muab tej uas neeg xav hauv nruab siab qhia rau sawvdaws paub, thiab yuav mob koj siab ib yam li rab ntaj chob.”

³⁶Muaj ib tug pojntsuam hu ua Anas, nws yog ib tug cev Vajtswv lus, nws yog Fanu-ees uas yog xeem Aseles tus ntxhais. Nws laus heev lawm, thaum nws tseem hluas, nws yuav txiv tau xya lub xyoo xwb, nws tus txiv tuag lawm. Nimno nws hnubnyoog muaj yim caum plaub xyoos. Nws niaj hnub niaj hmo mus pehawm Vajtswv hauv lub Tuamtsev. Nws ua kevcai yoo mov thiab thov Vajtswv, nws tsis tawm mus qhov twg li.

³⁷

³⁸Tamsim ntawd Anas txawm tuaj txog, thiab nws ua Vajtswv tsaug thiab hais txog tus metub ntawd rau txhua tus uas tabtom tos Vajtswv los cawm cov neeg uas nyob hauv lub nroog Yeluxalees kom dim mloog.

³⁹Thaum Yauxej thiab Malis ua txhua yam tiav raws li tus Tswv txoj kevcai lawm, nkawd rov qab mus tsev rau pem lub nroog Naxales uas nyob hauv lub xeev Kalilais.

⁴⁰Tus metub ntawd loj hlob zoo, nws muaj tswvyim thiab Vajtswv foom koob hmoov rau nws.

⁴¹Yexus niam thiab txiv niaj xyoo mus ua kevcai Hla Dhau nram lub nroog Yeluxalees.

⁴²Thaum Yexus hnubnyoog muaj kaum ob xyoos, lawv txawm rov mus ua kevcai nram lub nroog Yeluxalees raws li nkawd ibtxwm ua los lawm.

⁴³Thaum dhau lub sijhawm ua kevcai Hla Dhau lawm, nkawd rov qab mus tsev, tiamsis tus metub Yexus tseem nyob hauv lub nroog Yeluxalees. Nws niam thiab nws txiv tsis paub.

⁴⁴Nkawd xav hais tias Yexus nrog cov neeg uas nrog nkawd tuaj rov qab mus lawm, nkawd mus tau ib hnub ke, nkawd mam li nrhiav saib nws puas nrog nkawd cov kwvtij thiab cov phoojywg.

⁴⁵Tiamsis nkawd nrhiav tsis pom nws, nkawd thiaj rov qab mus nrhiav nram lub nroog Yeluxalees.

⁴⁶Ces hnub peb nkawd thiaj nrhiav tau nws nyob hauv lub Tuamtsev, nws nrog cov xibhwb zaum ua ke, nws mloog lawv qhia thiab nug lawv.

⁴⁷Txhua tus uas hnov nws teb, xav tsis thoob rau nws tej kev txawj ntse ntawd li.

⁴⁸Thaum Yexus niam thiab txiv pom nws, nkawd kuj xav tsis thoob li thiab. Nws niam txawm hais rau nws hais tias, “Metub, ua li cas koj yuav ua li no rau wb? Koj txiv wb nrhiav koj thiab txhawj koj kawg li.”

⁴⁹Nws teb nkawd hais tias, “Neb yuav nrhiav kuv ua dabtsi? Neb tsis paub hais tias kuv yuav nyob hauv kuv Txiv lub tsev no los?”

⁵⁰Tiamsis nkawd tsis totaub tej lus uas nws hais ntawd.

⁵¹Yexus nrog nkawd rov qab mus rau pem lub nroog Naxales, thiab nws mloog nkawd lus. Nws niam khaws tej lus ntawd rau nruab siab.

⁵²Yexus loj hlob zoo, muaj tswvyim, nws ua haum Vajtswv siab thiab haum neeg siab.