Read Hmong Daw Lukas 24 Bible Online

Lukas 24 - Hmong Daw bible

Lukas 24

¹Hnubkaj thaum kaj ntug txoog, cov pojniam txawm nqa tej tshuaj tsw qab uas lawv twb npaj tseg lawm, thiab lawv mus rau tom lub qhov ntxa.

²Lawv pom daim txiag zeb uas npog lub rooj ntxas twb dov rau ib cag lawm,

³lawv mus saib hauv; tiamsis tsis pom Tswv Yexus lub cev lawm.

⁴Lawv sawv ntsug hauv thiab xav tsis thoob li, tamsim ntawd muaj ob tug txivneej hnav ris tsho ci ntsa iab los sawv ntawm lawv ib sab.

⁵Cov pojniam ntawd ntshai kawg, thiab nyo hau rau hauv av, saib tsis taus ob tug txivneej ntawd li, ob tug txivneej ntawd hais rau lawv hais tias, “Ua li cas nej tuaj nrhiav tus neeg ciaj ntawm cov neeg tuag no?

⁶Nws tsis nyob ntawm no; nws twb sawv lawm. Nej nco ntsoov tej lus uas nws hais rau nej, thaum nej tseem nyob pem lub xeev Kalilais hais tias,

⁷‘Yeej yuav muaj neeg ntes Neeg Leej Tub coj mus rau cov neeg txhaum, muab nws ntsia rau saum ntoo khaublig thiab peb hnub tom qab, nws yuav sawv hauv qhov tuag rov qab los.’ ”

⁸Cov pojniam ntawd nco dheev txog Yexus tej lus,

⁹thiab lawv tawm hauv lub qhov ntxa rov los qhia tej ntawd rau kaum ib tug thwjtim thiab cov uas nrog lawv nyob mloog.

¹⁰Cov pojniam ntawd yog, Malis Madalas, Yauhanas thiab Malis uas yog Yakaunpaus niam; thiab muaj dua ob peb tug pojniam los qhia tej no rau cov timthawj.

¹¹Tiamsis cov thwjtim xav hais tias, tej uas cov pojniam ntawd hais yog tso dag xwb, lawv thiaj tsis ntseeg cov pojniam ntawd tej lus.

¹²Tiamsis Petus cia li sawv tsees khiav mus rau tom lub qhov ntxa; nws khoov xauj hauv lub qhov ntxa, ua ciav tsis pom dabtsi, tsuas pom cov ntaub uas qhwv Yexus lub cev nyob hauv xwb. Nws rov qab los tsev, thiab xav tsis thoob rau tej uas nws pom ntawd.

¹³Tib hnub ntawd Yexus ob tug thwjtim tabtom taug kev mus rau pem lub zos Ema-us uas nyob nrug deb ntawm lub nroog Yeluxalees kwvlam li kaum ib kilumev,

¹⁴thiab nkawd sib tham txog tej uas twb tshwm muaj lawm.

¹⁵Thaum nkawd tseem sib tham thiab sib nug txog zaj ntawd, Yexus txawm los nrog nkawd taug kev mus;

¹⁶nkawd pom Yexus, tiamsis zoo li muaj tej yam ua rau nkawd cim tsis tau nws.

¹⁷Yexus nug nkawd hais tias, “Neb pheej sib tham dabtsi thaum neb taug kev?” Nkawd nres ua ntsejmuag mluas mlob.

¹⁸Ob tug ntawd, tus uas hu ua Kelupas, nug Yexus hais tias, “Tagnrho cov neeg uas nyob hauv lub nroog Yeluxalees puavleej paub tej uas nyuam qhuav muaj tau ob peb hnub los no huv tibsi, tsuas yog koj tib leeg thiaj tsis paub tej ntawd xwb los?”

¹⁹Yexus nug nkawd hais tias, “Tej ntawd yog dabtsi?” Nkawd teb hais tias, “Tej ntawd yog tej xwm uas Yexus tus uas yog neeg Naxales raug. Nws yog ib tug cev Vajtswv lus. Vajtswv thiab tej neeg sawvdaws puavleej pom hais tias, nws tej lus muaj hwjchim thiab nws ua tau tej txujci tseemceeb.

²⁰Peb cov thawj ntawm cov povthawj thiab cov nomtswv muab nws rau Philaj txiav txim tua nws povtseg, thiab lawv muab nws ntsia rau saum ntoo khaublig.

²¹Peb cia siab hais tias nws yog tus uas yuav pab cov Yixalayees dim! Dua li ntawd, txij li muaj tej ntawd los twb tau peb hnub rau hnub no lawm.

²²Cov pojniam uas yog peb pab qee leej tau ua rau peb xav tsis thoob li; thaum kaj ntug txoog lawv mus rau tom lub qhov ntxa,

²³tiamsis lawv tsis pom Yexus lub cev lawm. Lawv rov los qhia rau sawvdaws hais tias, lawv pom cov timtswv ceebtsheej qhia rau lawv hais tias, Yexus twb rov muaj sia lawm.

²⁴Peb cov muaj qee leej mus saib lub qhov ntxa, thiab pom muaj raws li cov pojniam ntawd hais tiag, tiamsis lawv tsis pom Yexus.”

²⁵Ces Yexus hais rau nkawd hais tias, “Ua li cas neb yuav ruam ua luaj li, ua li cas neb tsis ntseeg tej uas cov cev Vajtswv lus tau qhia tseg lawm!

²⁶Puas yog tus Mexiyas yeej yuav raug tsimtxom thiab tom qab ntawd nws yuav tau nws lub tshwjchim ci ntsa iab?”

²⁷Yexus txawm piav Vajtswv Txojlus uas hais txog nws, nws xub pib qhia tej uas Mauxes sau thiab tej uas cov cev Vajtswv lus txhua tus sau tseg lawm.

²⁸Thaum lawv mus yuav txog lub zos uas lawv mus ntawd, Yexus txawm ua li nws yuav dhau plaws mus.

²⁹Tiamsis nkawd cheem hais tias, “Koj nrog wb so ntawm no, rau qhov twb yuav tsaus ntuj.” Yexus thiaj mus nrog nkawd so.

³⁰Thaum Yexus nrog nkawd zaum noj mov ntawm rooj, Yexus muab ib lub ncuav los nws ua Vajtswv tsaug thiab muab faib rau nkawd noj.

³¹Yam uas plooj ntawm nkawd lub qhovmuag txawm tshem hlo lawm, nkawd thiaj paub hais tias, yog Yexus, tamsim ntawd Yexus cia li ploj ntais ntawm nkawd mus lawm.

³²Nkawd sib tham hais tias, “Thaum peb taug kev tuaj, nws nrog wb tham thiab piav Vajtswv Txojlus rau wb mloog, mas wb lub siab kub lug cuag li hluavtaws hlawv puas yog?”

³³Tamsim ntawd nkawd txawm sawv tsees rov qab mus rau nram lub nroog Yeluxalees, thiab nkawd mus rau ntawm kaum ib tug thwjtim thiab lwm tus uas tuaj nyob ua ke ntawd,

³⁴thiab lawv sib tham hais tias, “Tus Tswv twb sawv rov los lawm tiag tiag! Nws twb los tshwm rau Ximoos pom lawm!”

³⁵Nkawd txawm piav tej uas nkawd pom thaum nkawd taug kev mus, thiab thaum tus Tswv muab ncuav ntais faib rau nkawd noj, nkawd thiaj paub hais tias yog Yexus tiag rau lawv mloog.

³⁶Thaum nkawd tseem tabtom piav txog tej uas nkawd pom ntawd rau cov thwjtim mloog, tamsim ntawd tus Tswv txawm los sawv nruab nrab ntawm lawv, thiab hais rau lawv hais tias, “Nej cia li tau nyob kaj siab lug.”

³⁷Lawv poob siab thiab ntshai kawg, lawv xav hais tias yog lawv pom dab.

³⁸Tiamsis Yexus hais rau lawv hais tias, “Ua li cas nej ntshai ua luaj li? Vim li cas nej tsis ntseeg?

³⁹Nej cia li saib kuv ob txhais tes thiab kuv ob txhais kotaw, nej thiaj yuav paub hais tias yog kuv tiag. Nej cia li cev tes kov kuv, nej thiaj li yuav paub, rau qhov dab tsis muaj nqaij tsis muaj txha li uas nej pom kuv muaj no.”

⁴⁰Thaum Yexus hais li ntawd, nws txawm xyab hlo nws ob txhais tes thiab ob txhais kotaw rau lawv saib.

⁴¹Lawv zoo siab kawg thiab xav tsis thoob li, tiamsis lawv tseem tsis tau ntseeg tiag; Yexus nug lawv hais tias, “Nyob ntawm no, nej puas muaj dabtsi noj?”

⁴²Lawv muab ib daim nqaij ntses ci cev rau Yexus,

⁴³Yexus txais mus noj tabmeeg lawv sawvdaws.

⁴⁴Yexus hais rau lawv hais tias, “Tej no yog tej uas kuv twb qhia rau nej thaum kuv tseem nrog nej nyob: Rau qhov txhua yam uas Mauxes hais thiab tej uas cov cev Vajtswv lus sau tseg rau hauv Phau Ntawv Nkauj uas hais txog kuv ntawd puavleej yuav tiav.”

⁴⁵Yexus txawm ua rau lawv totaub Vajtswv Txojlus,

⁴⁶thiab Yexus hais rau lawv hais tias, “Twb muaj lus sau tseg lawm hais tias, tus Mexiyas yeej yuav raug kev tsimtxom thiab peb hnub tom qab, nws yuav sawv hauv qhov tuag rov qab los

⁴⁷nej yuav tsum tuav nws lub npe mus qhia txojmoo zoo rau txhua haivneeg hauv qab ntuj no hais tias, Vajtswv yuav zam txim rau tus uas tso nws tej kev txhaum tseg. Nej cia li pib qhia hauv lub nroog Yeluxalees.

⁴⁸Nej yuav tsum ua timkhawv qhia tej no rau sawvdaws paub.

⁴⁹Kuv yuav muab yam uas kuv Txiv coglus tseg lawm rau nej. Tiamsis nej yuav tsum nyob hauv lub nroog Yeluxalees tos mus txog thaum uas nej tau lub hwjchim uas yuav los saum ntuj los.”

⁵⁰Yexus coj lawv tawm hauv lub nroog Yeluxalees mus txog nram lub zos Npethanis. Nws tsa tes foom koob hmoov rau lawv.

⁵¹Thaum nws foom koob hmoov rau lawv tas, nws txawm ncaim lawv thiab Vajtswv coj nws mus rau saum ntuj lawm.

⁵²Lawv pehawm nws thiab rov mus rau pem lub nroog Yeluxalees, lawv zoo siab kawg li,

⁵³thiab lawv niaj hnub mus nyob hauv lub Tuamtsev ua Vajtswv tsaug.