Read Hmong Daw Lukas 3 Bible Online

Lukas 3 - Hmong Daw bible

Lukas 3

¹Thaum Tinpeli-us ua vajntxwv kav tebchaws tau kaum tsib xyoos lawm, lub sijhawm ntawd Pauti-us Philaj ua tswvxeev kav lub xeev Yudas. Helauj ua nom kav lub xeev Kalilais thiab Helauj tus kwv Filis ua nom kav lub xeev Itule-as thiab lub xeev Takaunitis; Lixaniyas ua nom kav lub xeev Anpilees,

²Anas thiab Kaiyafas ua ob tug Povthawj Hlob. Lub sijhawm ntawd, Vajtswv qhia Vajtswv Txojlus rau Xakhaliyas tus tub Yauhas tom roob mojsab qhua.

³Yog li ntawd, Yauhas thiaj mus qhuab qhia thoob plaws cheebtsam uas nyob ntawm tus Dej Yauladees hais tias, “Nej yuav tsum tso nej tej kev txhaum tseg thiab ua kevcai raus dej, Vajtswv thiaj yuav zam txim rau nej.”

⁴Qhov no muaj raws li Yaxayas tus uas cev Vajtswv lus sau tseg rau hauv nws phau ntawv hais tias, “Muaj ib tug hais nrov nrov tom roob mojsab qhua hais tias, ‘Cia li kho kev tos tus Tswv; kho kev kom ncaj nws yuav los!

⁵Txhub txhua lub kwjha kom puv, khawb txhua lub roob thiab txhua lub pov roob kom tiaj. Kho tej kev nkhaus kom ncaj, muab qhov siab thiab qhov qis pheej kom tiaj xwm yeem.

⁶Txhua haivneeg yuav pom Vajtswv txojkev cawm dim!’ ”

⁷Muaj neeg coob coob tuaj cuag Yauhas kom Yauhas muab lawv ua kevcai raus dej. Yauhas hais rau lawv hais tias, “Cov niag nab! Leejtwg qhia rau nej hais tias, nej yuav khiav dim Vajtswv txojkev txiav txim uas twb los yuav txog?

⁸Nej yuav tsum ua nej lub neej rau sawvdaws pom hais nej twb tso nej tej kev txhaum tseg lawm. Nej tsis txhob khav hais tias, Anplahas yog nej yawgkoob. Kuv qhia rau nej hais tias, txawm yog Vajtswv muab tej pobzeb no los ua Anplahas cov xeebntxwv los nws yeej ua tau!

⁹Nimno twb muab rab taus tso rau ntawm lub hauvpaus ntoo lawm, twb yuav ntov tus ntoo; txhua tsob ntoo uas tsis txi cov txiv zoo, luag yuav muab ntov thiab muab pov rau hauv cub hluavtaws.”

¹⁰Cov neeg coob coob ntawd nug Yauhas hais tias, “Yog li ntawd, peb yuav ua li cas?”

¹¹Yauhas teb lawv hais tias, “Yog leejtwg muaj ob lub tsho, yuav tsum muab ib lub pub rau tus uas tsis muaj, thiab yog leejtwg muaj mov muaj zaub, nws yuav tsum muab faib rau tus uas tsis muaj.”

¹²Cov neeg uas sau se muaj qee leej tuaj ua kevcai raus dej, thiab lawv nug Yauhas hais tias, “Xibhwb peb yuav ua li cas?”

¹³Yauhas teb hais tias, “Nej yuav tsum sau raws li kevcai xwb, tsis txhob sau tshaj.”

¹⁴Cov tubrog muaj qee leej nug Yauhas ib yam nkaus hais tias, “Ua li peb ne, peb yuav ua li cas?” Yauhas teb hais tias, “Nej tsis txhob yuam leejtwg lossis ntxias luag nyiaj yuav. Nej tau nyiaj hli npaum li cas, cia li txaus siab yuav li ntawd xwb.”

¹⁵Cov neeg uas cia siab ntsoov tos tus cawmseej xav hais tias, Yauhas yog tus Mexiyas ntag.

¹⁶Yauhas hais rau lawv hais tias, “Kuv muab nej ua kevcai raus dej, tiamsis tus uas yuav lawv kuv qab los, nws muaj hwjchim loj dua kuv, kuv twb tsis tsimnyog daws nws txoj nyuag hlua khau. Nws yuav muab nej ua kevcai raus los ntawm Vaj Ntsujplig tus Dawbhuv thiab ntawm hluavtaws.

¹⁷Nws tuav rawv rab ntxuam, nws yuav ntxuaj nws pawg nplej, kom cov npluag ya tawm huv tibsi. Nws yuav muab cov nplej zoo ntim rau hauv nws lub txhab, tiamsis nws yuav muab cov npluag pov rau hauv cub hluavtaws uas cig tsis paub tuag.”

¹⁸Yauhas qhia Txojmoo Zoo ntau zaj tsis sib thooj ntuas cov neeg ntawd, kom lawv hloov lawv lub siab.

¹⁹Tiamsis Yauhas cem Helauj tus uas ua nom kav lub xeev Kalilais, rau qhov Helauj yuav Helaudias uas yog Helauj tus kwv tus pojniam, thiab Helauj ua ntau yam phem.

²⁰Helauj tseem ua ib qhov phem ntxiv uas yog nws ntes Yauhas coj mus kaw rau hauv tsev lojcuj.

²¹Tom qab uas sawvdaws ua kevcai raus dej tas lawm, Yexus ua kevcai raus dej thiab. Thaum Yexus tabtom thov Vajtswv, rooj ntug txawm qhib plho,

²²thiab Vaj Ntsujplig tus Dawbhuv uas muaj lub cev zoo li tus nquab los rau saum Yexus. Thiab muaj ib lub suab hais saum ntuj tuaj rau Yexus hais tias, “Koj yog kuv tus Tub uas kuv hlub, kuv txaus siab rau koj.”

²³Thaum Yexus pib ua haujlwm, nws hnubnyoog muaj kwvlam li peb caug xyoo. Raws li sawvdaws xav, Yexus yog Yauxej tub, Yauxej yog Helis tub,

²⁴Helis yog Mathas tub, Mathas yog Levis tub, Levis yog Melekhis tub, Melekhis yog Yanenais tub, Yanenais yog Yauxej tub,

²⁵Yauxej yog Matatiyas tub, Matatiyas yog Amaus tub, Amaus yog Nahus tub, Nahus yog Exalis tub, Exalis yog Nakhais tub,

²⁶Nakhais yog Ma-as tub, Ma-as yog Matatiyas tub, Matatiyas yog Xemis tub, Xemis yog Yauxes tub, Yauxes yog Yaudas tub,

²⁷Yaudas yog Yau-anas tub, Yau-anas yog Lexas tub, Lexas yog Xelunpanpees tub, Xelunpanpees yog Se-atiyees tub, Se-atiyees yog Nelis tub,

²⁸Nelis yog Melekhis tub. Melekhis yog Adis tub, Adis yog Kauxas tub, Kauxas yog Emadas tub, Emadas yog Eles tub,

²⁹Eles yog Yausuas tub, Yausuas yog Eli-exes tub, Eli-exes yog Yaulees tub, Yaulimes yog Mathas tub, Mathas yog Levis tub,

³⁰Levis yog Xime-oos tub, Xime-oos yog Yudas tub, Yudas yog Yauxej tub, Yauxej yog Yaunames tub, Yaunames yog Eliyakees tub,

³¹Eliyakees yog Mele-as tub, Mele-as yog Menas tub, Menas yog Matathas tub, Matathas yog Nathas tub, Nathas yog Daviv tub.

³²Daviv yog Yexais tub, Yexais yog Aunpes tub, Aunpes yog Npau-am tub, Npau-am yog Xalemoos tub, Xalemoos yog Nasoos tub,

³³Nasoos yog Aminadas tub, Aminadas yog Amis tub, Amis yog Anis tub, Anis yog Heloos tub, Heloos yog Peles tub, Peles yog Yudas tub,

³⁴Yudas yog Yakhauj tub, Yakhauj yog Ixaj tub, Ixaj yog Anplahas tub, Anplahas yog Telas tub, Telas yog Nahaus tub,

³⁵Nahaus yog Xelus tub, Xelus yog Le-us tub, Le-us yog Pelej tub, Pelej yog Enpes tub, Enpes yog Selas tub,

³⁶Selas yog Kainas tub, Kainas yog Afaxas tub, Afaxas yog Xees tub, Xees yog Nau-es tub, Nau-es yog Lamej tub,

³⁷Lamej yog Methuxelas tub, Methuxelas yog Enauj tub, Enauj yog Yales tub, Yales yog Mahalalees tub, Mahalalees yog Kenas tub,

³⁸Kenas yog Enauses tub, Enauses yog Xej tub, Xej yog Adas tub, Adas yog Vajtswv tub.