Read Hmong Daw Yauhas 15 Bible Online

Yauhas 15 - Hmong Daw bible

Yauhas 15

¹“Kuv yog tsob tseem txiv hmab, thiab kuv Txiv yog tus uas tu.

²Nws muab txhua ceg hmab uas tsis txi txiv ntshua tawm ntawm kuv mus povtseg. Txhua ceg hmab uas txi txiv nws muab tav kom hajyam txi txiv ncw.

³Tej lus uas kuv qhia nej, twb yog ntxuav kom nej huv ntag.

⁴Nej cia li txuas rau ntawm kuv thiab kuv yuav txuas rau ntawm nej. Tus ceg hmab uas tsis txuas rau ntawm txoj hmab yeej txi tsis taus txiv. Ib yam li ntawd, yog nej tsis txuas rau ntawm kuv, nej yeej txi tsis taus txiv.

⁵“Kuv yog tsob hmab, nej yog cov ceg. Tus uas txuas rau ntawm kuv, thiab kuv txuas rau ntawm nws, tus ntawd yuav txi txiv ncw; yog nej tsis txuas rau ntawm kuv, nej yeej ua tsis tau ib yam dabtsi li.

⁶Tus uas tsis txuas rau ntawm kuv, tus ntawd zoo ib yam li tus ceg hmab uas luag muab txiav povtseg; thaum qhuav lawm, luag yuav muab sua mus pov hlawv kom kub hnyiab tas huv tibsi.

⁷Yog nej txuas rau ntawm kuv thiab nej khaws kuv tej lus cia rau nruab siab lawm, nej xav yuav yam twg, nej cia li thov nej yuav tau yam ntawd.

⁸Yog nej txi txiv ncw, kuv Txiv yuav tau ntsejmuag, thiab yog nej ua li ntawd, nej yuav tau ua kuv cov thwjtim.

⁹Kuv hlub nej ib yam li kuv Txiv hlub kuv; nej yuav tsum muaj lub siab hlub ib yam li kuv.

¹⁰Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.

¹¹“Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li.

¹²Kuv lo lus samhwm yog li no: Nej ib leeg yuav tsum hlub ib leeg, ib yam li kuv hlub nej.

¹³Tus uas muaj kev hlub loj tshaj plaws yog tus uas zoo siab tuag theej nws cov phoojywg.

¹⁴Yog nej ua raws li kuv hais, nej thiaj yog kuv cov phoojywg.

¹⁵Nimno kuv tsis hu nej ua tubtxib lawm, rau qhov tus tubtxib tsis paub xyov nws tus tswv ua dabtsi. Tiamsis kuv hu nej ua phoojywg, rau qhov kuv twb qhia txhua yam uas kuv Txiv qhia rau kuv rau nej lawm.

¹⁶Tsis yog nej xaiv kuv, tiamsis yog kuv xaiv nej thiab tsa nej kom mus txi cov txiv uas nyob mus ibtxhis. Yog nej tuav kuv lub npe thov yam twg, Leej Txiv yuav pub yam ntawd rau nej.

¹⁷Tej lus uas kuv samhwm rau nej yog li no: Nej ib leeg yuav tsum hlub ib leeg.

¹⁸“Yog neeg ntiajteb ntxub nej, nej yuav tsum nco ntsoov hais tias, lawv twb xub ntxub kuv ua ntej lawm.

¹⁹Yog nej nyiam uas raws li neeg ntiajteb ua, ces neeg ntiajteb yuav hlub nej. Tiamsis nej tsis nyiam ua raws li neeg ntiajteb ua, rau qhov kuv twb xaiv nej tawm hauv lub ntiajteb no lawm; yog li ntawd, neeg ntiajteb thiaj li ntxub nej.

²⁰Nej yuav tsum nco ntsoov tej lus uas kuv qhia rau nej hais tias, ‘Tus tubqhe yeej tsis muaj hwjchim loj dua nws tus tswv.’ Yog lawv tsimtxom kuv, lawv yuav tsimtxom nej thiab; yog lawv ua raws li kuv tej lus qhia, lawv yuav ua raws li nej tej lus qhia thiab.

²¹Lawv yuav ua tej no rau nej, vim nej yog kuv li, rau qhov lawv tsis paub tus uas txib kuv los.

²²Yog kuv tsis tau los qhia lawv, lawv yeej yuav tsis muaj txim, tiamsis nimno lawv hais tsis tau hais tias lawv tsis muaj txim.

²³Tus uas ntxub kuv, tus ntawd yeej ntxub kuv Txiv thiab.

²⁴Yog kuv tsis tau los ua tej haujlwm uas tsis tau muaj neeg ua dua rau lawv pom ces lawv yeej tsis muaj txim, tiamsis lawv twb pom tej uas kuv ua lawm lawv thiaj ntxub kuv thiab kuv txiv.

²⁵Yeej yuav muaj li no thiaj raws li tej lus uas sau tseg rau hauv lawv txoj kevcai hais tias, ‘Kuv twb tsis tau ua txhaum los lawv cia li ntxub kuv.’

²⁶“Tus Pab yog Vaj Ntsujplig, nws los qhia Vajtswv zaj uas yog qhov tseeb thiab yog Leej Txiv txib nws los. Kuv yuav kom Leej Txiv txib nws los, thiab nws yuav qhia kuv zaj rau nej.

²⁷Thiab nej yuav qhia kuv zaj, rau qhov nej yeej nrog kuv nyob thaum chivthawj los lawm.